Read Lamkang DOWLLO 9 Bible Online

DOWLLO 9 - Lamkang bible

DOWLLO 9

¹Pdainu Soul la ktadaal luwp luwp daatti, Mukpu siikhu rek ke eayou rang ngi thiimpu kparthaang hin chetda

²mleija mma ngi lamthu snu psel ku mii khat mdo dut thok khat ava bowlda Jerusalem tha mdoṭhi lam nra, Damaskas ki synagog rek hinkira mhin chethi khewlda.

³Tunva hanto kchetti Damaskas naida, ungu tunkat daatti parwaan ki mar awng khatti klop dokda.

⁴Ungta mma dul leenni tluwda, ungta Soul, Soul, talu leiji suwk atupthuw a?” dida mhin kthe krowl khat mma ngi aryaa da.

⁵Ungta mma ngi theda, “Nah, ku ptida, Mukpu?” Ungbi Mma ngi theda, “Neia nang ngi suwk ado pthuw slii Jisu ava ping.

⁶Pdainu kardel ra khuwpii ava thung ngi valut, ungta nang ngi tak tlo nadi tdit akthe pik chra.

⁷Mdo cheṭhi mmiiṭhi rekva krowl aryaa lamda, ungu ku khat lee mdodee maan leiji, kpau pchaang kma rip chdaat lamda.

⁸Soul li dul leenki kardelda; ungu mmik mpahar thungta, do khat lee pre mma ngi deime; ava leiji mmaanni mkhut tha kjowng lamda Damaskas thu lu ṭhi lamda.

⁹Ungta nii kdum lik thung ngi khuw deime, ungu kchaa knee kma am chdaat da.

¹⁰Tunva mmiing Anania mdo dit siikhu khat Damaskas thung ngi amda. Mukpu ngi mhin ktardet da theda, “Anania.” Ungta mma ngi theda, “Mukpu hava thu ka am daat imping.”

¹¹Ungta Mukpu ngi mhin theda, “Kardel ra sekthleng ring mdodit lamṭhuwm thung ngi va, ungu Judia phungka thung ngi Tarsas ki mmiing Soul mdodit miilai khat athlaam; mleija asuw, mma ngi mṭhil chaakka,

¹²ungta mmiing Anania tdit miilai khatti arvang lutda, mma ngi khuw mdodee chaak nra mleen mkhut kikhiin pik chra ava deida.

¹³Pdainu Anania ngi arthawngda, “Mukpu, hava miilai mlei thung ngi Jerusalem thu ka am kintiing rek hin kṭhakma mdo tlot knempok neiji aryaa chnu.

¹⁴Ungta hava tha Nah amiing ku own mii mkheng mdo bowl nra thiimpu kinreel rek hinki rutan mdo phaak dok.”

¹⁵Pdainu Mukpu ngi mhin theda, “Va, mleija ktlok chati rek, ungta kruwng rek ungu Isreel chapa rek hinni Nei kmiing kuhur rangki sok muklo ra kdo kchol chaak dok.

¹⁶Mleija mma ngi Nei kmiing tummi kja kakham kdung ngi kparteelra.

¹⁷Ava leiji Anania ngi vada ungu inn ava thung ngi lutda. Ungta mleen ni mkhut khiingda theda, “Ku u knao Soul, ditta nang ngi khuw adodee chaak nra, ungu pthla kchiir ri adim nra, nang ngi arvatna lamtha ahin ktardet Mukpu Jisu ngi neia mdo tsii ava ping.”

¹⁸Ungta tunkat daatti mmik leenki do klip khat hepdaat dokhat tlada, ungbi mma ngi khuwdeida. Ava dilli mma ngi ripda baptis louda

¹⁹ungu then chaada mrutangda. Mleija mma ngi Damaskas thung ngi siikhu rektu nii ksotti kcheengda.

²⁰Ungta synagog thung ngi mma ngi Jisu paryaam tengda, theda, “Mma Isowr Chapa.”

²¹Ungbi karyaa mii mkheng nga ngak chda, ungu the lamda, “Jerusalem thu hava miing ku own kcha rek ke eayou miilai ava pme mo? Ungta bowl lamda thiimpu kinreel rek maiṭhuwm mi mdoṭhi nrangki hava tha kthleng.”

²²Pdainu Soul ava kheel set setti mrutangda, ungta Jisua Khrista ava kat dida Damaskas thungki Jihudia rek hin plungren mdohur nraanki theda.

²³Nii roiksotti ma am diltha, Jihudia rekki mma ke eayoura kurthlong lamda,

²⁴Pdainu mkurthlon in Soul li deida. Mmaanni ke eayou rangki suwnjaan knai kma paltong sut pṭoi lamda,

²⁵pdainu msiikhu rekki bowr thu kdom lamda jaanni rowngbang taplaan lamda.

²⁶Ungta mma ngi Jerusalem tha arvangda siikhu rek arlakki lut chnuwmda; ungta mkheng inni mma ṭi chlamda, mleija siikhu khatti rin chlamme.

²⁷Pdainu Barnabas ava ngi lou chda, ungu kenyee rek hin arvan ṭhida, ungta tak heppi mma ngi lam tha Mukpu deida mkarbiik ṭhii chaak, ungu Damaskas thung ngi tak heppi Jisu miing nga plung ktangar ri mparyaam tdit thethut pik lamda.

²⁸Ava leiji mma ngi Jerusalem thu lutda thuwkda,

²⁹Mukpu miing ngi plung ktangar ri paryaamda. Ungta mma ngi Grik pauvi kpau Jihudia rek mraal kpii ngi karteen ṭhi lamda; pdainu mmaanva ke eayoura thlaam lamda.

³⁰Ungta mu u mnao rekki ava deida, Kaisaria tha arjung ṭhi lamda, ungu Tarsas tha sidok lamda.

³¹Ava dilli Judia ungta Galil ungu Samaria rinlop mkheng kdaai ungta kpunchoi pik pha chlamda; ungta Mukpu kṭi ungu pthla kchiir lungam piikki tlowngda tipnem set setda.

³²Tunva Pitor ra mmaan mkheng thung ngi chet tlowngda, Lydda tha ka am kintiing rek hin rukva arjungda.

³³Ava tha mma ngi mmiing Anias mdo dit kum tret lik thung ngi karjam chdaat, kyeng kcha miilai khat kurdut ṭhida.

³⁴Ungta Pitor ri mhin theda, “Anias, Jisu Khrista ngi atipdam chaakka, kardel ra akowm apintiing.” Ungbi tunkat datti mma ngi kardelda.

³⁵Ungta Lydda leh Sharon thung ngi ka am mii mkheng ngi mma deida, ungu mmaanni Mukpu hin kinle chlamda.

³⁶Tunva Joppa thungki siikhu khat mmiing Tabitha tdit Dorkas am ntha vangda. Mma ava kṭha nong leh plungnei ji dim chda.

³⁷Nit ava thung ngi koida diyou chda; ungbi mmaanni alṭhu dok lamthida, tuwn knung reep innka thung ngi pi iip lamda.

³⁸Lydda ava Joppa ktinel tekki ma am leiji, Pitor ra ava tha ka am daatta tdit siikhu rekki aryaa lamda, “Neen kihin kbei sekki mhai thlen pik chaan,” dida mhin kaktham chra miilai knii sii lamda.

³⁹Ava leiji Pitor ri ripda mmaan tu kilṭhi ngi vangda. Ungta mma ngi marvan thungta, tun knung reep innka thung ngi hankal ṭhi lamda. Ungu meikhunu mkheng ngi ṭap lamda, Durka ngi mrin mpha thu mdo trit buw rek leh phrik rek mhin tdet lamda, rip daat lamda.

⁴⁰Pdainu Pitor ri mmaan mkheng nga duwn pthuwk lamthida, tirdiilda ungu ṭhil chda; ava dilli mma ngi kdiyou kluwng ktong tha karheelda theda, “Tabitha, kardel.” Ungbi mma ngi mmik pakhap da, ungu Pitor mdee thungta kardelda ko ongda.

⁴¹Ungbi Pitor ri mkhut piida tiprip da. Ava dilli kintiing rek leh meikhunuh rek own da mhin inni parlaan da.

⁴²Ungta Joppa mii mkheng ngi ava deida, ungu Mukpu hin mii knempokki rin chda.

⁴³Ungta mma ngi Simon mdo dit saavun kukhok miilai khat ava hin niikhuw ksotti Joppa thu kcheen ṭhi lamda.