Read Lamkang ROMIA 10 Bible Online

ROMIA 10 - Lamkang bible

ROMIA 10

¹Ku u knaorek, nei kuplung ngi bin chnu ungta Isowr hin kdo ṭhil pik nlamki mlei ava mdo ktlan pik nlam rangki kurthuwk.

²Isowr tummi mmaanni plung muplut chaak in, pdainu dei kat chlamme tdit neiji sakhhi kuhur pik lamma.

³Mleija Isowr hinki kurjung rinkindit ava deipandi chlamme, ungta mmaan dobin chaak ava thlaam lamda, Isowr rinkindit hin kirpii lamme.

⁴Mleija Khrista ngi Nowlam ki mdonna mkurthut leiji, krin kcha miipum ktai ava kpindit pik chra.

⁵Mousi ngi kjit da, mleija Nowlam dil kṭoiji rinkindit ktlo miia kring chra.

⁶Pdainu krin cha thu rinkindit rekki theda, “Parwaan tha ku kakal rangda?” dida plung thu thema. (Ditta Khrista mdo arjun pṭum nrang lei kthe kurthuwk)

⁷Mata “Kungi dulti ril tha jungklut rangda?” (Ditta Khrista ava kdiyou thungki mdo hunṭhi nrang lei).

⁸Pdainu ava ngi tak mtheda? pauna ava naan ner leen leh plung thung ngi knai tekka, (Ditta krin chaki pauna karyaam);

⁹mleija naan nerri Jisua Mukpu ungta Isowr ri kdiyou thungki mdo prin pinlet dida the thuwda plung thu arin chaak inbi, akaktlan pik chraan.

¹⁰Mleija plung ngi mdobin chaak leiji mii ava mdo pindit pik, ungta nerri mdo the thut chaak leiji mdo ktlan pik.

¹¹Laaika ngi theda, “Mma krin kcha miipum ktaiva ningkja duni me.”

¹²Mleija Jihudia rek leh Grik rek arlakki mkar thlei nra ame; Mukpu ava katta mkheng inki Mukpu, ungu Mma ku own kcha mii mkheng hin msuwanthuw kpii kcha kurthuwk.

¹³Mleija, “Mukpu miing ku own kcha miipum ktaija kaktlan pik chra.”

¹⁴Pdainu mmaanni Mhin krin cha kma pava tak heppi ku own lamrangda? Ungta mmaanni mdo aryaak liit maan Mma hin tak heppi krin cha lam rangda? Ungu kparyaam ktaak daattu mmaanva tak heppi karyaa lam rang da?

¹⁵Mdosi kma donle miirek va tak heppi kparyaam rang da? mdo kjit dok lulu, “Kṭha paumin kparyaam rek khu ava tija thu mrungchen kṭha chdaat ta!”

¹⁶Pdainu mmaan mkheng inni kṭha paumin pṭoi lamme; mleija Isaijah ngi theda, “Mukpu, neen mkaryaak pik in ku ngi mrin chaak da?”

¹⁷Ava leiji krin cha ava karyaa thungki, ungu karyaa ava Khrista doparyaam thungki.

¹⁸Pdainu neiji kikhewlla, mmaanva aryaa memo? mdo aryaak kat in; mleija mmaan krowl ava dultipaam mkheng thu, ungta mmaan pauna rekka dultipaam mdonna dekki kchet dok.”

¹⁹Neiji kikhewl nowlla, Isreel miiva dei pindi liit memo? Rukringi Mousi ngi theda, “Chati khat kurthuwk kma rek hin khei apthe nikdi; ka aak chati leen plung apthit nik di.”

²⁰Ava dilli Isaijah ngi plung ktangarri theda, “Nei makthlaam kma rekki Neia mpha chlamda; Nei mkikhewl kma rek hin kdaksaa ktardet nu.”

²¹Pdainu Isreel hin Mma ngi theda, “Kupṭoi kma leh paukleek rek hin niiluwnni kukhut khiing tlit daak nikdi.”