Read Lamkang ROMIA 11 Bible Online

ROMIA 11 - Lamkang bible

ROMIA 11

¹Ava mkurthut tu neiji aju khewl inni, Isowr va mmiirek mipthlei mo? Anto liit pme nei kdaksaa kat rukka Isreel miiping, Abraham charuwl thungki, Benjamin sumkhur khat ping.

²Isowr va chodu reeppi mdodee dok mmii rek ava pthlei me. Elijah mlei thu Laaika dothe ava naanni dei maan timo? Isreel miirek raal kpii ngi mmava Isowr hin tak heppi mthe?

³“Mukpu, mmaanni Nah akhulpu rekka eayou lamda, Nah asuwlbuwr rek eakrep lamda, ungta kthina daatti ka am imping, ungta mmaanva krinkhu mthlaam inna.”

⁴Pdainu Isowr va mhin tak heppi marthaan? “Baal hin pkhuppi tardiilda kukuwn kma Nei kdaksaa kat tumra mii pun tikheu kdo arkhiik daat ka am.”

⁵Ava leiji tun rukva plungnee ngi mdo kchol kekleem mruk ka am daatta.

⁶Pdainu plungnee lei mkurthut bi, nong rek lei kurthuwk nowlme; anto mkurthut ma lebi, plungnee ava plungnee ngi am nowl nime.

⁷Anto mkurthut tu talu rang? Isreel miirekva mdo thlaam inna pha chlamme, mdo kcholli mphaak chaakka, pdainu angṭhe rekka kapchai reen lamma,

⁸hanto mdo kjit dok lulu, “Isowr ri mhin inni kuk mok pthla pii lamda, snii kpha thu mmik inni dei lamme, maknaa inni aryaa lamme.”

⁹Ungta Devid ti theda, “Mmaan tebol ava ktaang leh makman naan khat kurthuwk so, khur leh mraal ava mtum in kurthuwk so;

¹⁰mdo dee ma nraan mmik inna jiing chso, ungu kṭuw knai liit kma tkum chlam so.”

¹¹Ava leiji neiji kikhewlla, mmaanva mtluk nraanki khusiir mparthit inmo? Anto liit pme! Pdainu Isreelli khei mdothe nra, mmaan pnu ton leiji ktlok chati rek hin mkirliin naan kurthuwk.

¹²Tunva mmaan pnu tonni dultipaam suwanthuwna, ungta mmaan doparma ngi ktlok chati rek suwanthuwna mkurthutbi, mkurhum tip innu, tija pang thu knem rangda!

¹³Tunva ktlok chati rek naan hinni neia kpau ping. Ktlok chati rek hinkira kenyee khat kukurthut leiji, neiji knong tlot ava kdo kjat chaak

¹⁴nei kmii Jihudia rek khei pthe nda, ungu mii angṭhe mdo ktlan nrangki kurthuwk.

¹⁵Mleija mmaan do pthleiji dultipaam mdo pipinna mkurthut bi, mdolo pik nlamki mlei ava kdiyou dok thungki rinkhu kpha kcha ava kma donle talu rang?

¹⁶Thenpen phel ava rukri reeppi kseeng theiji tlaai mdown chaakbi, mkheng kheng ngi kchiir ra; ungta murjuwng mseen bi, mbaak rukka kseengra.

¹⁷Pdainu mbaak rek angṭhe beng chasora, ungu nang nga nowm kruwn khatti mben nathu ajomphun sora, kruwn dak ava thungki msuwanthuw aphaak chaak ve inbi,

¹⁸mbaak rek tunni napal tlot nma. Nang ngi napal atlotbi, nang ngi murjuwng ado bom ava pme, pdainu murjuwng ngi ado tbom ava abin phaak cha.

¹⁹Nang ngi the nadi, “Nei mdo tjomphun nra mbaak rekka kbeng kcha a.”

²⁰Ava mkindit kat kurthuwk. Mmaanna mdo rin chaak maan leiji kbeng kcha lam, pdainu nah ado rin chaakki krip kcha pti. Ava leiji pohok chma pdainu aṭi cha.

²¹Mleija Isowr ri mbaak kat rap klu maktlan mabi, Mmava nang ruk aktlan pik nime.

²²Isowr wonsat leh plungthit atin cha: Ktluw kcha rek hin muplung mdo tipchai, pdainu nah hinva Isowr wonsat ka am, Mma wonsat kurnowlda ado tpurdon pik; antole mkurthut chaak mabi, nang rukka akaprah buk pthiira.

²³Ungta murson rek rukka mdo rin chaak maan thu ma am tlit daat maanbi, mmaan rukka kjom phunra, mleija Isowr va mdo jomphun nowl nlam rangki rutan mdo thloi.

²⁴Mleija nowm kruwn ding khat kat nang ava athlam bukda ungu daksaa kurdu kma, innkruwn dingleen atjomphun chaakbi, mdaksaa katki baak rek mmaan mdak kat kruwn ava dingleen va kheel siingi kjom phun pik chra.

²⁵Ku u knaorek, naan plungbin ni ksing lulu karbin chmaan, hava kukthuk pau ava naan dodee ra neiji kngei chaakka: Ktlok chati rekki kurhummi marvan du khim khai, Isreel miirek angṭhe hin plung kapchai set set daat ra,

²⁶Ungta ava leiji Isreel mii mkheng nga kaktlan pikra; mdo kjit dok lulu, “Kṭenthuw pik ava Siyon thungki kthleng nga, Jakob charuwl thungki kṭhakma rekka klou pthiira;”

²⁷“Neiji mmaan pnu rek klo pthii mpha thu, mmaan tu kilṭhi ngi hava Nei kpaurina.”

²⁸Kṭha paumin ktong thangva mmaanna naan akahal kchaan kurthuwk lam, pdainu mdo kchol dok rek ktong thangva mmaanna mpuhle tumva wonsat mdolo rek kurthuwk lam.

²⁹Mleija Isowr ki leemna chla rek leh mdo own rekka msuwkṭha.

³⁰Mpha khat thu naanni Isowr pau ado leek in lulu, pdainu tunva mmaan pauleek leiji wonsat arlaan chaak inna.

³¹Ava leiji mmaan hin wonsat mdo tdet lulungi mmaan rukva wonsat mdo arlaan chaak nraan, tunva mmaan ava paukleek kurthuwk lamme.

³²Mleija Isowr va mii mkheng wonsat mdolo nra, mii mkheng ngi pau mdo leek nra ktlo kurthuwk.

³³O Isowr suwanthuw leh lousing ungta mdodee pindit ava tija thung ngi kukthuk chdaatta! Mma dokṭewlla tathlaam pchaan me ungu Mma lamṭoija tdee pchaan liit me!

³⁴“Mleija Mukpu poibinna kungi dei don, mdit mata kungi kparseel rang da?”

³⁵“Mdit mata Mma dochoi pinlet ra kungi Mhin chla mpiikda?”

³⁶Mleija do mkheng nga Mma hinki Mma thungki Mma hintha ka am. Mma hin kṭuw knaima laarnee jiam so. Amen