Read Lamkang ROMIA 13 Bible Online

ROMIA 13 - Lamkang bible

ROMIA 13

¹Miipum ktaija paamkpu diikpu kurdu ngi jiam so. Mleija Isowr hin kma donle rutan kthloi mii ame, ungu ka am daat rek ava Isowr dosil na jesang kurthuwk.

²Ava leiji, rutan kthloi rek krokma mii ava Isowr do kchol kro kma kurthuwk, ungu krokma miia kekṭewlra.

³Mleija paamkpu rekka kṭha nong ngi tipṭit rangki ava pme, pdainu kṭhakma rangki rutan kthloi mii ava naanni ṭini maan timo? Ava mkurthutta kṭha atlo in, ungu mma dorot pik arlaang chnaandi,

⁴mleija mma naan ṭhat nra Isowr sra owr kurthuwk. Pdainu naanni karmak atlot inta, aṭi chaan; mleija do mdopsit marangki mkaangksaang hurme; mma Isowr sra owr, karmak ktlo hin muplung thit kupthlung ra.

⁵Ava leiji, Isowr plungthit rang kat daat ser maan, pdainu poithuw daat rukva miilai khat va mma kurdu ngi ma am kat ra.

⁶Mleija hava mlei thung ngi naanni khasna ado piik in, ditta hava nong kat tummi rutan kthloi rek ava Isowr nong ktlo rek kurthuwk lam.

⁷Ado tuwl in mkheng nga apiin, khasna ado piik nraan thung ngi khasna apiin, ado piik nraan hin apiin, ado kjat raan hin akjat in, kheel siingi ado kjat nraan hin kheel siingi akjat in.

⁸Khat leh khat wonsat kurlo kma donle, ku mii khat lee hinki leenlei khat lee pre tuwl maan; mleija mveen wonsat klo mii ava ngi Nowlam mdo purhum.

⁹“Nang ngi losang ṭhima, Nang ngi mii eayou ma, pruma, nang ngi kheithe ma,” dida paureenda, ungta paureen murson rukka hava thung ngi mparchin tpom dok, “Nah adaksaa lulungi aveen wonsat alo cha.”

¹⁰Wonsatti mveen hin karmak tlome; ava leiji wonsatta Nowlam kurkhum.

¹¹Hava daat kma hava talu ṭhang tdit naanni adodee in, tunva naanni ki iip thungki akardel nraanki mpha ava kvei dokka, mleija ru kri thokki nenni trin chaak in thungki hinva tunva kirliin na ava knai tekka;

¹²Jaan ava lamkla ngi kvei kcha a, suwn knai tekka, nenni kjiingnu ki nongrek ava var pthiin che ungta mar awngki phow ava hiilnaa inche;

¹³nen ndaksaan ava suwnni kchet lulungi chet inche, lamchet kapta ungu ju kipri, kṭhakma ktlo, plung krip kma, kar ai kalrai leh kheithe chang tlaak ktlo ava ma pthiin che.

¹⁴Pdainu Mukpu Jisu Khrista ava hiilnaa da, ungu daksaa ningthlun nra daksaa nong tlo maan.