Read Lamkang ROMIA 16 Bible Online

ROMIA 16 - Lamkang bible

ROMIA 16

¹Kenkria ki rinlop thung ngi dikannu khat kurthuwk nen nchernuwn Phobe ava neiji kdorot pik dok,

²mleija mma ava naanni Mukpu hintha kintiing kurhuiji ado tarlaan pik chaak nraan, naan hin mma do kat nra ava abom chaan, mleija mma ava mii maknem leh nei kdaksaa kat ruk mukbom kchaan.

³Jisu Khrista nong thung ngi knong sukṭhi Prisila leh Akuila kurvui chaak lamma,

⁴nei krinkhu tummi mmaanni mlowl mjur pik chlamda, nei kthina ngi panpaak chlam maang, pdainu ktlok chati rek rinlop mkheng rukva mpanpaak chaak lamma;

⁵mmaan inn thungki rinlop rekka kurvui chaak lamma. Khrista hin Asia thungki rukri reeppi plungren kuhur, kwonsat lo Epinetias ava kurvui chaakka.

⁶Naan arlakki kdung nong klou kcha Mery ava kurvui chaakka.

⁷Nei krilam kthuwk rowng inn thu kdo amṭhi Andronikias leh Junias ava kurvui chaak lamma; mmaanna kenyee rek arlakki tdee ra khat ungta nei kdu ngi Khrista hin ka am dok miirek lam.

⁸Mukpu hin nei kwonsat lo Amplitias ava kurvui chaakka.

⁹Khrista hin nen nongsuk ṭhiin Urbanas leh kwonsat lo Stakhias ava kurvui chaak lamma.

¹⁰Khrista hin mdorot dok Apillas ava kurvui chaakka. Aristobulas phungka thu ka am rekka kurvui chaak lamma.

¹¹Nei krilam kthuwk Herodion na kurvui chaakka. Narsisas phungka thungki Mukpu hin ka am rekka kurvui chaak lamma.

¹²Mukpu nong ktlorek Triphana leh Triphosa ava kurvui chaak lamma. Mukpu hin kdung ngi nongksu nei kwonsat lo Presisa ava kurvui chaakka.

¹³Mukpu nong ktlo thung ngi titin chaak ra khat kurthuwk Ruphas leh mma nuh ungu nei knuh ruk kurthuwk mmaan ava kurvui chaak lamma.

¹⁴Asinkritas, Phlekon, Hermis, Patrobas, Harmas, ungta mmaan tu kilṭhi mu u mnaorek ava kurvui chaak lamma.

¹⁵Philologas, Julia, Nerias, leh mchernu, ungta Olympas leh mma tu kilṭhi kintiing rek mkheng nga kurvui chaak lamma.

¹⁶Kchiir khat doputti khat leh khat ekurvui chaan. Khrista rinlop mkheng ngi aturvui chaak inna.

¹⁷Ku u knaorek, neiji akthe chaak inna, naan do kurchuk dok ava ksinchaak ungta tparsat luida msik msikki ktlo miirek ava aser inra atin in.

¹⁸Mleija anto lu hep kdu miirek va nenki Mukpu Khrista sok lome, pdainu mthen pjor in ungta mpauṭhat inle mnerjaan inni do kdei cha kmarek plung huwn chaak nlamda.

¹⁹Mleija naanni pau ado pṭoi in ava mkheng hinni mkandan slii daat thu mleija ava leiji naan leen neia kanpa kcha ping. Naanni kṭha thung ngi ksing lulu, kṭhakma thung ngi ado dee pandit ma nraan;

²⁰ava dil rongi kdaai ki Isowr ri seitaanna naan khuther ri kuknuwr pthiira. Nen ki Mukpu Jisu Khrista ki plungnee ngi aju kurthlo ṭhi chaanso.

²¹Nei knongsuk ṭhi Timothi leh Lusia ungta Jason ungu nei krilam kthuwk Sosipater mmaanni aturvui chaak inna.

²²Hava chethi kikjit, Tartias neiji Mukpu hin akurvui chaak inna.

²³Rinlop mkheng leh nei mhai kupthlung kcha Kajas ava ngi aturvui chaak inna. Khuwpii sumbuwr karkhii Erastas leh nenki nu u nnao in Kurtas ava ngi naan aturvui chaak inna.

²⁴(Nenki Mukpu Jisu Khrista plungnee ngi akheng inna aju kurthlo ṭhi chaan so. Amen.)

²⁵Tunva neiki kṭha paumin dil kṭoiji ru akaptan pik in kapchaang, ungta Jisu Khrista mdo paryaam dil kṭoiji, kum roiksotti, tuprutti mdo arkhiik pthii, kurthluk pau mdo tpandan pik dil kṭoiji Mma hin aksil chaak naanna,

²⁶pdainu tunva khulpu rek dokjit ava ngi chati rek mkheng hin mtidet dokka, krin cha kupṭoi mlei thung ngi, kṭuw knai kma Isowr paureen dil kṭoiji akthe pik dok inna.

²⁷Ksing Isowr khdaat chrel hinni Jisu Khrista thu kṭuw knai ma laarnee ka am kurthuwk so! Amen.