Read Lamkang ROMIA 2 Bible Online

ROMIA 2 - Lamkang bible

ROMIA 2

¹Ava leiji, O mii kekṭewl nang, kuku kurthuwk daat joti nah aptlot pik nime; mleija ktlok khat ado kṭewl psuk leiji, adaksaa athina ngi mraal kirpii kcha pti, mleija kekṭewl nangva antolu hepdaat ado tlot kcho.

²Hantolu ktlo miirek leen Isowr do kṭewl ktla tdit neenni kdee in.

³O miilai, nang ngi havalu ktlorek kṭewl thitinu, nah adaksaa katti tlo lam tinu, Isowr do kṭewl rang thungki karthlet rang ngi karbin kcha ptimo?

⁴Mdit mata hantojaki Mma wonsat mdo khaan leh mdo diil ava doksi thleer kma atlot mo? Isowr wonsatta plungren hurna ktongtha kṭhi tdit dei mtimo?

⁵Pdainu plung kapchai leh plung ado parthlen nuwm ma leiji, Isowr plung thitti rinkindit kṭewl mpurphuwn nit thungkira plungthit ava adaksaa ngi apurtuwlla.

⁶Mleija Mma ngi miipum ktaija mma mma nong tlot dil kṭoiji kpinlet pik ra:

⁷diilda kṭha ktlongi laarnee leh kunlor kphara ungta kmawng kro kma tummi kthlaam miirek hin kṭuw knai kma ki rinkhu kpiira;

⁸pdainu mdaksaa kparning da ungu kindit kuṭoi kma, pdainu kṭhakma nong kupṭoi miirekka plungthit leh kheel siiki plung thit kdura.

⁹Kṭhakma ktlo miipum ktai leenni suwkthuwk leh kja kakham ka amra, rukri ngi Jiudia rek ungu Grik miirek ruk anto kurthuwkra,

¹⁰pdainu kṭha ktlo miipum ktai tumva, rukringi Jihudia rek ungta Grik rek ruk laarnee leh kunlor ungu kdaai ka amra.

¹¹Mleija Isowr va ksanksui tdetme.

¹²Nowlam ktaakki pnu ktla mii mkheng nga, Nowlam ktaakki kmawng chra, ungu Nowlam kurdu ngi pnu ktla mii mkheng nga Nowlam ava ngi kekṭewlra.

¹³Mleija Isowr maiṭhuwmki rinkindit rek ava Nowlam mdo aryaak lei pme, pdainu Nowlam ktlo miirekka kpindit pikra.

¹⁴Nowlam kthloi kma ktlok chati rekki nowlam ava nopa ngi mtlot in mpha thu, mmaanni nowlam thloi lam mjoso, mmaan mdaksaan na nowlam kurthuwk.

¹⁵Mmaan plung thu mdo kjit dok ava ngi nowlam tdit mdo tdet, muplung bin in rukva sakhi piida, ungta mpoithuw in msik msik ava ngi kulrot nlamda, mdit mata ro lamda

¹⁶nit ava thu Isowr ri neiki kṭha paumin dil kṭoiji, Jisu Khrista ar awng ngi, miirek dotlot tuprut nong ava kekṭewl ra.

¹⁷Pdainu nah adaksaa ava Jihudia miilai ping kardida, Nowlam kthenda ungta Isowr tu akarnai naki napal atlot,

¹⁸ungu Mma plungbin deida, ungu Nowlam dothe pik leiji kinreel sii kdingi abin,

¹⁹ungta nah kinditti mik ktot rek kṭhi pik khat, kjiing thungki miirekki ar awng khat ping adit,

²⁰ka ak kpindit pik khat, kmorek avaki chukpu khat ping adit bi, lousing leh kindit kurkhum ndok Nowlam athloi ja,

²¹ava ngi nang ngi mii murson purchuk thiti, nah adaksaa kpurchuk nimtimo? Kupru kupsulli aparyaam chunva, kupru ptimo?

²²Ku mii khat leengi losang kṭhi rome dithiti, nangva losang aṭhimo? khut dosak pthla ning tiprip thiti, luwbuk Inn thungki alrot mo?

²³Nowlam thung ngi kpohok kcha nang, Nowlam kupkuiji Isowr ado kjatma pme mo?

²⁴Mleija ava mdo kjit dok, “Naanni mlei kurthuwk intinu ktlok chati rek arlakva Isowr kjowm kcha ngi kpau lam.”

²⁵Naanni Nowlam apṭoi inbi, vunmor ado reen kat raan; pdainu naanni Nowlam apkui inbi, vunmor ado reen inna kreen kma lulura.

²⁶Ava leiji vunmor kreen kma miilai khatti, Nowlam dothe markhiik chaakbi, mma ngi vunmor mdo reenma ava kreen lulu kurthuwk memo?

²⁷Ava dilli tikjit dok kthloi ungta vunmor kreen pdainu Nowlam kupkui naan ava mdaksaa vunmor kreen kma pdainu Nowlam karkhii rek mmaanni mraal akpii raan.

²⁸Mleija mduwn daatti Jihudia mii kurthuwk ava Jihudia miilai kat pme, mdaksaa duwnki vunmor mdo reen daatti mdo pindit pik ava pme.

²⁹Thungki ngi Jihudia mii kurthuwk ava Jihudia miilai kat kurthuwk, ungta mkindit katki vunmor kreen ava plung kthena kurthuwk, plung kurthlut ungu tikjit ava pme. Mma kpanpaak rang nga miirek pme pdainu Isowr ra.