Read Lamkang ROMIA 4 Bible Online

ROMIA 4 - Lamkang bible

ROMIA 4

¹Ava mkurthut tu daksaa dil kṭoiji nenni npah in Abraham mlei thu talu the chenaan?

²Mleija nong rekki Abraham ma mpinrit pikbi, ava mlei thung ngi mnapal tlot nra ka am, pdainu Isowr maiṭhuwm pme.

³Mleija Laaika va tak mthe? “Abraham mi Isowr rin chda, ungta mma ava rinkindit ti mdolo pik.”

⁴Tunva nong ktlo ku mii khat ava chla ngi tai pikme pdainu lei ktuwlli mdolo.

⁵Ungta ku mii khatti nong ktlo kma pdainu kpinrit Isowr Mma rin chda, Mma mdo rin chaakki rinkindit kdingi lo pikda.

⁶Mma leiji nong ktaak mii ava hin Isowr ri rinkindit dida phowl kṭha mdo piik lulungi Devid rukva hanto theda:

⁷“Naan thungki karmak ptlot pikda, ungta mupnu ton in thungki kdo pirliin pik miirek ava msuwkṭha;

⁸Mukpu ngi pnu kdingi mdolo pik mara mii ava msuwkṭha.”

⁹Hava phowl kṭha mdo piikka vunmor kreen rek hin daat mo, mata vunmor kreen kma rek hin rukda? Krin cha thu Abraham hin rinkindit kdingi mdolo pik diin minnu ntheen.

¹⁰Ava mkurthut tu tak heppi mdo piik da? Vunmor mreen dumo mata mreen dilda? Vunmor mreen dil pme, pdainu mma ngi mreen duki.

¹¹Mma ngi vunmor mreen dungi krin cha mdo thloi ava ngi rinkindit ki titinna mata kbiinamki vunmor kreen mdo arlaan chaak. Mmaan hin rinkindit kdingi mdolo pik vunmor kreen mlaiji krin cha mii mkhengki mpah mkurthut nrangki lei.

¹²Ungta vunmor kreen daat kma, nenki npah in Abraham mi vunmor mreen dungi krin cha doṭoi nrang tha oida, hanto vunmor kreen rek pah kurthuwk.

¹³Abraham leh mma charuwl rek hin dultipaam ava mma do kurthuwk ra dida pau mdoreel dok ava Nowlam leiki pme, pdainu krin chaki rinkindit mkurthut lei.

¹⁴Nowlam kupṭoi mii hin daatti kpii mkurthut bi, krin cha ava dosime ungta paureel ava do khat lee kurthuwk nime.

¹⁵Mleija Nowlamva plung thit mdo thuw ṭhi, pdainu Nowlam amna thungva, Nowlam kupkui ruk ame.

¹⁶Ava leiji plungnee ki plungreel ava krin cha thu amda, ungta mma charuwl rek mkheng hin mdo piik, Nowlam kupṭoi rek hin daat pme pdainu Abraham dorin thung ngi krin cha rek ruk kurthuwk, mleija mma nen nkheng inki npah in.

¹⁷Mleija hanto kjitda, “Neiji nang ava chati rek maknem ki mpah akpurthua.” Mma ngi Mhin mdo rin chaak, kdiyou rek hin rinkhu kpii ungta ka amkma ava ownda kpa am Isowr maiṭhuwm ki.

¹⁸“Nah acharuwl rekka,” dida mhin mdothe pik lulungi, chati rek maknemki mpah mkurthut nra kilrin chpa kmangi kdung rinda bin chda.

¹⁹Kdiyou tiing tiing cha, mleija mma kum arjaa khat arveel kurthuwkda, mma ngi ava mbin mpha thu mdit mata mnumei Sarah ava kdongnu kurthuwkda ava kpha thu mdo rin chaak ava down liit me.

²⁰Isowr paureel thung ngi plung kunchul tlome, kheel setsetti rin chda Isowr punlorda,

²¹Isowr paureel dok ava ktlo pchaang kat ra kdingi kdung bin chda.

²²Ava leiji mma do rin chaakka, “Rinkindit kdingi mdolo pik.”

²³Pdainu “Mma mdolo pik,” kdi ki pauna rekva mma tum daatti mdo kjit pik pme,

²⁴pdainu nen ntum ruk kurthuwk. Kdiyou thungki kring kardel nenki Mukpu Jisu krin kcha nen ruk miido talo pik in,

²⁵nenki pnu ton leiji midiyo pik inda, ungta nen mikpindit pik raan ring kardel da.