Read Lamkang ROMIA 5 Bible Online

ROMIA 5 - Lamkang bible

ROMIA 5

¹Ava leiji, nenki Mukpu Jisu Khrista nenni trin chaak lei inni mipindit pik inda, Isowr tu kilṭhi ngi kdaai tphaak chaak in.

²Mma ar awng ngi nenni tri naan thu kheel siiki wonsat hava pha chaan min ungta Isowr kullaar kthem thu plung ngi bin psuk in minnu tkanpat chaak in.

³Ava kheel dekki nenni kja kakham thung ngi tkanpat raan, kja kakhammi kakhaang thuwṭhi da,

⁴ka khaang kchangi plung kurkhum thuwṭhi da, ungta plung kurkhummi plungbin thuwṭhi da,

⁵plungbin va tkinsiir in pme, mleija nen nhin mido tpiik chaak in Pthla Kchiir ava ngi Isowr wonsat ava nen nuplung ril thung ngi miptlon pik chaanda.

⁶Nenni nsowl chaak slii thuwnni Khrista ngi mpha kcha deekki Isowr krin kma tummi diyouda.

⁷Rinkindit miilai khat tummi khat mdiyora ava kparsa langlang, anto daat joso kṭha miilai khat tumva khatti kdiyou nuwm cha kro.

⁸Pdainu nenni pnu ktong nkurthut slii arlaanni nen ntum raan Khrista diyouda Isowr ri Mma ki wonsat mihai tdee chaanda.

⁹Tunva ava ngi mlei kurthuwkda, nenna Mma hii ngi mido tpindit pik dok lei inni, Isowr plungthit thung ki Mma ngi kheel dekki mikaktlan pik chraan.

¹⁰Mleija nenni Mma nhal chaak slii arlaan, Mchapa diyo ngi nnenna Isowr hin mipipinpik dok inda, tunva mido tpipin pik lei inni, kheel setti Mma rinkhu ngi miktlan chaanda.

¹¹Ava daat kma, pdainu nenki Mukpu Jisu Khrista ki ar awng ngi Isowr hin tkanpat chaak in, Mma ar awng ngi tunva nenni kpipin pik tarlaan chaak in.

¹²Ava leiji, dultipaam thu miilai khatti pnu thuwṭhida ungta pnu thu diyouda, ungta mii mkheng ngi pnu mdo arve leiji kdiyou ava mii mkheng leen kurjouda.

¹³Nowlam mpiik du liitti pnu ava dultipaam thu ka am dok, pdainu Nowlam am nma thungva pnu ame.

¹⁴Anto daat joso Adam kingi Mousi kpha kdiyouvi paalda, Adam mi paureel mdo leek lulua kurthuwk mjoso miirek leenni pnu ktong tdit amda, Mma ava kurjung rangki khat ava lulu.

¹⁵Pdainu pnu kirvei ava leemna chla lulu pme. Mleija miilai khat pnu arve ngi mii knempok mdiyobi, Isowr wonsat lo Miilai khat ditta Jisu Khrista wonsat leemna chla ava ngi mii knempok mdo pdim pik.

¹⁶Ungta leemna chla ava miilai khat pnu ton hep lua kurthuwk me. Mleija khat pnu arve ava mraal piida kekṭewl li mdil mdoṭoi, pdainu leemna chlava pnu ktong mii knempok ava mdo pindit pik.

¹⁷Miilai khat pnu ton leiji kdiyou ava ngi mpaalbi, wonsat leh leemna chla karlaang kcha rekka kheel siingi Miilai khat ditta Jisu Khrista thu rinkhu ngi kpaal chra.

¹⁸Miilai khat pnuton ava ngi mii mkheng mraal mdo piik lulungi, Miilai khat rinkindit nong tlotti mii mkheng ngi rinkhu kpha chra.

¹⁹Mleija miilai khat doleekki mii knempokki pnu mdo arve lulungi, Miilai khat pau pṭoiji mii knempok rinpindit pik chda.

²⁰Karmak nong mnem nra Nowlam arvang lutda, pdainu pnu mnem set set na thung ngi kheel siiki plungnee nemda,

²¹ava leiji kdiyou ki pnu ava ngi mpaal lulu,plungnee rukva nenki Mukpu Jisu Khrista ngi Kṭuw knaima rinkhu rinkinditti kpaalra.