Read Lamkang ROMIA 7 Bible Online

ROMIA 7 - Lamkang bible

ROMIA 7

¹Ku u knaorek, Nowlam kdei rek hin neiji kpau kcha ping, mleija mii ava ngi mrin lim thungva Nowlam mi mbowl tdit naanni dei maan timo?

²Innknei dok snu ava mi innpu mrin khim khai thungva Nowlam ava ngi mdo bowl daat; pdainu mi innpu mdiyo dok bi, mi innpu mlei thu mma kintek kcha a.

³Minnpu mrin slii daat arlaanni, mma ngi ktlok miilai khat hin inn mnei bi, mma ngi losang mṭhia. Pdainu mi innpu mdiyo dokbi, mma Nowlam ava thungki kintek mphaak chaakka, ungu mma ngi ktlok miilai khat hin inn mnei bi, mma ngi losang ṭhime.

⁴Anto lulungi ku u knaorek, naan ava kdiyou dok thungki kring kinle ktlok khat Mma hin naanni Khrista daksaa ngi Nowlam thu kdiyou in pti, mleija Isowr tummi nenni thei tchui raan.

⁵Nenni daksaa kurthuwkki nrin slii thuwn, Nowlam do pthuw ngi, nenki pnu poibinni, ndaksaan thungki khatti kdiyou tumra thei mchui nra nong ktlo kurthuwk.

⁶Pdainu tunva kdiyou rangki paam suwkki ka am nen ava Nowlam thungki mipintek inda, mleija mdo kjit dok pliw ava kurdu ngi nenva soklo maanmin, pdainu pthlaki rinkhu ren thung ngi sok talo chaak in kurthuwk.

⁷Ava mkurthuttu nenni tak the che naandi? Mleija Nowlam ava pnu mo? Anto liit mso. Anto kurthuwk daat joso Nowlam mlei mkurthuw mabi, neiji pnu kdodee ma tlaang rang nga. “Nang ngi kheithema,” dida Nowlammi mthe tlaang mabi, kheithe ava neiji kdei kurthuwk ni maang.

⁸Pdainu paureen thu mpha kcha mdo phaak ava ngi, hangmal ki kheithe mkheng ngi mnam duwlda. Nowlam ktaak pnu ava kdiyou.

⁹Mpha khat thu neia Nowlam ktaakki ka am cha ping, pdainu paureen mthlen thungta, pnu ring kinleda ungu neia kdiyou ping;

¹⁰rinkhu paureel ki paureen ava katti neia kdiyou kurthuwk ping.

¹¹Mleija paureen thung ngi mpha kcha mdo phaak leiji, pnu ngi neia mhuwng chda, ungta ava ngi mii eayou da.

¹²Ava leiji Nowlamma kchiir, ungta paureenna kchiir, ungu kindit ungta kṭha.

¹³Ava mkurthuttu kṭha ava ngi neia mdo tipdiyo mo? Anto liit pme. Mleija pnu ava pnu kdingi mdo tdet nra, kṭha mdodit ava ngi nei kdiyo nra nei kthung ngi nong mtlotbi, ava pnu, ungta paureen ava ngi tpartena kheel dekki pnu marve chaakka.

¹⁴Nowlam ma pthla ktongki tdit nenni ndee in, pdainu neia pnu kurdu ngi mdojur dok daksaa ktongki ping.

¹⁵Nei kdaksaa kat dotlot ava neiji dei pandi chmaang. Mleija nei kdo ngei ava neiji tlo maang, pdainu neiji kdo pder chaak ava kat neiji tlo nu.

¹⁶Tunva nei kdo ngeima ava neiji ktlotbi, Nowlam ma kṭha tdit neiji krotta.

¹⁷Ava leiji ava ktloa nei nowl pme, pdainu nei kthung ngi ka am pnu.

¹⁸Mleija nei kthung, ditta nei kdaksaa thung ngi kṭha do khat lee pre ame tdit neiji kdee chaak. Neiji kindit tlo nuwmnu, pdainu neiji tlo pchaang maang.

¹⁹Mleija nei kdongei kṭha ava neiji tlo pchaang maang, pdainu nei kdongei liitma kṭhakma ava neiji tlonu.

²⁰Tunva neiji kdotlot nuwm liitma ava neiji ktlotbi, ava ktloa nei nowl pme, pdainu nei kthung ngi ka am pnu.

²¹Ava leiji neiji kindit ktlot nuwm thu kṭhakma ngi mdo titnel tek ava Nowlam khatti pha chnu.

²²Mleija nei kdaksaa ril kthlung ngi Isowr Nowlam thung ngi kanpa chnu,

²³pdainu nei kdaksaa thungki Nowlam msik khat ava ngi nei kuplung bin ava tu rawl kurduk ṭhida, ungta nei kdaksaa thungki khat ava ngi pnu Nowlam thu suwkki mdo tithiik pthii ava neiji kdee chaak.

²⁴Neia suwkthi kcha ping! Daksaa thungki kdiyou hava kungi neia makṭen thuw chrang da?

²⁵Nenki Mukpu Jisu Khrista leiji Isowr panpaak chaan che! Ava leiji nei kdaksaa kat rukva kuplungbin tu kilṭhi ngi, Isowr Nowlam soklou cha kurthuwk ping, pdainu kdaksaa tu kilṭhi ngi pnu Nowlam ava sok kdolo chaak.