Read Lamkang ROMIA 8 Bible Online

ROMIA 8 - Lamkang bible

ROMIA 8

¹Ava leiji, tunva Jisu Khrista hintha ka am rek hin mraal piime.

²Mleija Jisu Khrista hinki rinkhu pthla ki Nowlammi neia pnu leh kdiyou Nowlam thungki mpantek chda.

³Mleija daksaa sowlna Nowlam ava Isowr ri tlo dokda: Mma Chapa khat ava pnu kurhui daksaa lulungi ungu pnu tummi sida, daksaa thu pnu ava mraal piida,

⁴daksaa dil kṭoiji kchet kma pdainu pthla dilkṭoiji nen nthung inni Nowlam dongeen ava mkurkhum nra.

⁵Mleija daksaa dil kṭoiji ka am miirek va daksaa dil kṭoiji poibin da, pdainu pthla dil kṭoiji ka am miirek va pthla poibinni bin lamda.

⁶Daksaa poibin ava kdiyou kurthuwk, pdainu pthla poibin ava rinkhu leh kdaai kurthuwk.

⁷Mleija daksaa poibin ava Isowr kusnuwm kma kurthuwk; avangi Isowr ki Nowlam dil ṭoime, ktlo pchaang ruk kurthuwk me;

⁸ungta daksaa ktongtha ka am rekva Isowr ning tupthlung me.

⁹Pdainu naan athung inni Isowr pthla ma ambi, naanna daksaa ktongki pmaanti, pthla ktongki in pti. Khrista pthla kthloi kma ku mii khat ava Mma hinni ame.

¹⁰Pdainu naan athung ngi Khrista ma ambi, pnu leiji naan adaksaan ava diyou chdaat jownti, rinkindit leiji naanki pthla ava kring cha.

¹¹Kdiyou dok thungki Jisu ktipring pinle Mma pthla ava naan thung ngi ma ambi, Jisu Khrista kdiyou dok thungki ktipring pinle, Mma ava ngi naan thu ka am Mma pthla rukva kdiyou chrangki naan rinkhu akiprin pik chraan.

¹²Ava leiji ku u knaorek, nenni daksaa dil kṭoiji kring tkurthut ma nraan, daksaa ki leenlei tutuwl in ava pme.

¹³Mleija naanni daksaa dil kṭoiji kring akurthut inbi, diyou chnaandi, pdainu daksaa nongtlot ava naanni a eayo pthiinbi, ring naandi.

¹⁴Mleija Isowr pthla doṭhi mii mkheng ava Isowr chapa rek lam.

¹⁵Mleija kṭi ngi atluk chaak nraanki suwk owrki pthla ava naanni ado arlaan in ava pme, pdainu naanni mchapa kurthuwkki, pthla ava ado arlaan chaak in. Nenni “Aba, Apah!” diin minnu to own chaak in.

¹⁶Nenna Isowr naole in pmin tditki Mma pthla ngi nen napthla hin sakhi mihur pik inda.

¹⁷Ungta mnaole nkurthut inbi, alrou tphaak chaak raan, mleija Mma tu kilṭh ingi ngi nen ruk mpunlorbi, ungu Mma tu kilṭhi suwk nthuw ṭhiinbi, Isowr alrou kpha chrangki, ungta Khrista tu kilṭhi ngi alrou kpha sap tkurthut raan.

¹⁸Mleija tuntunki suwkthuw ava nen nhin mdo tdet rangki laarnee ava tu tpinṭim rang nga hui chme.

¹⁹Mleija mdo seem rekki Isowr Chapa kandang ra ava ning kakraalli arda chlamda.

²⁰Mleija mdoseem rekva doksi kma mma mma dongeiji am lamme, pdainu plung ngi mdobin psuk chaak in Mma kurdu ngi am lamda;

²¹Mleija mdo seem rek kat rukka mdobowl lam thungki pintek don, Isowr naole kurthuwkki kintekki kunlor kpha chlamra.

²²Mleija snii kpha thu mdo seem rek mkheng ngi, nao kuplu thungki kdung kṭou heppi chel mdo chan ṭhiin ava nenni ndee in.

²³Ungta mdo seem rek daat kma, pdainu pthla avaki thei rukringi kthloi nen ndaksaan katti, nen ndaksaan mido tiktlan pik nraan, tuprutti chelchang in minnu, mchapa rek lulungi mido tujuw chaak nraan tardat chaak in.

²⁴Mleija nenni plung ngi tbin psuk chaak leiji mido taktlan in. Tuntunni kdei daatti plung ngi tbin in ava kbin psuk tkurthut in pme. Mleija mdodee ava ku ngi kbin psuk rangda?

²⁵Pdainu nenni tdeema ava plung ngi tbin psuk leiji, kdung kdiil chatu kilṭhi ngi tardat chaak in.

²⁶Anto lulungi nenni nsowl chaak naan thu pthla ava ngi mido tbom in; mleija nenni tak heppi tiṭhil chaak raan tdit dei maan min, pdainu Pthla Mma katti mchelchan tu kilṭhi ngi, pauna rek kurthluk langlang tu mithe pik chaanda.

²⁷Ungta miirek plungbin kthlaam Mma ngi pthla ngi pthla poibin ruk mdodee, mleija Isowr dongei dilkṭoiji kintiing rek tumra pthla ngi the pik lamda.

²⁸Isowr ri Mma poibin dil kṭoiji, mdo own Mma wonsat lorek tu kilṭhingi mṭhat nra do khim khai nong mdo tlot tdit nenni ndeen.

²⁹Mleija Mma ngi chodu reeppi mdodee dok mmaan ava, mu u mnaorek arlakki rukri reeppi kṭou mkurthut nra, Mma chapa kdu jikki pankai pik chlamda.

³⁰Ungta Mma dopankai pik dokrek ava rukka Mma ngi tu own ruk own chlamda; ungu mdo own dokrek ava tpindit ruk pindit pik lamda; ungta mdo pindit pik dok rek ava tpunlor ruk punlor chlamda.

³¹Ava mkurthut tu hava mlei thung ngi tak the chenaan? Isowr ava nen ntum mkurthut tu, ku ngi nraal mikpii raan?

³²Mchapa kparkhaal kma pdainu nen nkheng in tummi kpii dok Mma va, Mchapa tu kilṭhi ngi do mkheng nga nen ruk mipiin nime mo?

³³Isowr do kchol dokka ku ngi mraal kpii rangda? Kpindit pikka Isowr;

³⁴Mraal kpii rang nga ku da? Diyou dok da, kdiyou dok thungki kring kinle, Isowr khut chang ktongtha ka am, nen ntummi pauvi mikthe pik cha ava Jisu Khrista pmemo?

³⁵Khrista wonsat thungki ku ngi mikṭhen raanda? Suwkthuw rangmo, ku owr kcha rangmo, kja kakham mo, poitham rangmo, kheel siiki kja kakham mo, mdit mata kaang ksaang rangda?

³⁶Hanto mdo kjit lulu, “Nah tummi neenna niiluwnni me eayou inda; mdo eayo rangki jao lulu neenna mbin inda.”

³⁷Eme, havale mkheng thungki nnenna kheel siingi Mma wonsatti kapchaang riim tkurthuw in.

³⁸Mleija neiji kbin katta, mleija kdiyou daat don, rinkhu daat don, Waan tamsii daat don, kapchaang rek daat don, tuntunki daat don, karvang rangki daat don, rutan daat don,

³⁹kparthaang daat don, ktlum daat don, mdit mata mdo seem mkheng thungki talu talu kurthuwk daat don nenki Mukpu Jisu Khrista hinki Isowr wonsat thungki nnenna miṭhen pchaang liit in nime.