Read Lamkang ROMIA 9 Bible Online

ROMIA 9 - Lamkang bible

ROMIA 9

¹Neiji Khrista ki mkindit kthe kcha ping, ahuwng chmaan ring, pthla kchiir amleiji kuplungbin ni sakhi kuhur kurthuwk ping,

²mleija neia kheel siiki kja kakhammi kuplung thung ngi mhai pja chda.

³Mleija suruwl dil kṭoiji ku u knao rek leh krilam rek tummi nei kdaksaa katti pauhur kdo phaak chaak nra Khrista hinki kdet buk ava kngei kro ping.

⁴Mmaanna Isreel miirek lam, ungta mmaan hinni mchapa kurthuwk, laarnee ki paurina, Nowlam kpii, luwkbuk, ungu paureel ava ka am,

⁵mmaan thung ngi npuh le rilam ka am, ungta daksaa dil kṭoiji Khrista ava mmaan rilam thungki kthuwk. Mkheng tuwn ka am Isowr ava kṭuw knaima msuwkṭha. Amen.

⁶Pdainu Isowr pauna ava do tipsit ma nrang pme. Mleija Isreel charuwl thungki mkheng ava daatti Isreel miirek ava pme.

⁷Ungta mmaanni Abraham charuwl rek mkurthut lei inni mkheng inni Mma naole ava pme; pdainu “Nah charuwl la Isek thungki ra,” dida theda.

⁸Hava ki mleija Isowr naole ava daksaa dil kṭoi ava pme, pdainu paureel naole ava charuwl rek kdingi mdo tai.

⁹Mleija paureel dothe ava hava, “Mpha hava arveelli Neiji kinle nikdi ungta Sarah ngi chapa khat kthloira.”

¹⁰Ungu anto daat ava pme, pdainu Rebika rukva nenki npah in Isek tdit miilai khat ava nao muhur mpha thu,

¹¹mmaan mṭou du liitti, kṭha mata kṭhakma ava mtlot du ngi, kukchol dilkṭoiji Isowr poibin mkurnowl tlit daat nra, nongrek, lei ava pme, pdainu mdo own dok leiji,

¹²Rebika hin theda, “Upa ngi mnaopa sok klora,” dida.

¹³Mdokjit dok ava lulungi, “Jakob pa wonsat mdolo pdainu Esau va kipder ra,” dida.

¹⁴Ava mkurthuttu nenni tak the chenaan di? Isowr ktong thangva ksan ksui ka ammo? Anto liit pme!

¹⁵Mleija Mma ngi Mousi hin theda, “Neiji wonsat kdolo hin wonsat lo nikdi, ungta Neiji plung kdo pneipsuk hin plung pnei nikdi.”

¹⁶Ava leiji miilaiji mdobin ava lei pme, mdit mata mnongtlot lei pme, pdainu Isowr wonsat leen kurthuwk.

¹⁷Mleija Laaika ngi Pharon hin theda, “Neiji ahin rutan kdo tdet nra, dultipaam mkheng thu Nei kmiing ava ngi mkaryaam nra, hava kat leiji Neiji nang nga ado kupthuw kurthuwk.”

¹⁸Ava leiji Mma ngi mdobin psuk ava hin wonsat loda, ungta Mma ngi plung mdo tipchai nra mii ava hin plung mdo tipchai psuk.

¹⁹Ava mkurthutbi naanni kihin the naandi, Talu lei Mma va karmak mdo phaak tlit da? Mleija kungi Mma poibin kmat rangda?”

²⁰Pdainu Isowr hin pau karthawng purlup miilai nang ava ku ptida? Mdosak ava ngi ksa hin, “Talu lei anto ado tseemda didonle karthawng rangmo?”

²¹Tnek ksa ava ngi bul khdaat thungki louda khatti nong kṭha thungki ra ungta ktlok khatti pang sin tsinton rangki mdo sak nrangki bul leenni mdo pchaan amemo?

²²Mma ngi muplungthit mdo tdet nra ungta mrutan mdo tpandan nra, kokrop chrangki mdo seem plungthit ki uwm ava kheelli kdiilṭhi mkurthut tu,

²³wonsat ki uwm rek tummi Mma laarnee suwang sii, chodu reeppi laarnee tumra mdo purchuwl dok ava,

²⁴Mma do own dok nen nhin ruk Jihudia rek hin daat kma pdainu ktlok chati rek hin ruk Isowr ri ktidet nuwm mkurthuttu tak kthuwkka?

²⁵Hosea thu Mma ngi hanto mdothe dok lulu, “Nei kmiirek kma mmaan ava, ‘Nei kmiirek’ dida Neiji own lam nikdi, Ungta wonsat kdolo ma mii ava, ‘Nei kwonsat lo’ dida own nikdi.’ ”

²⁶“Ungta ‘Naanna Nei kmiirek kmaanti,’ dida mhin inni kdothe na mun kat thung ngi, ‘Kring Isowr chaparek didonle mmaanna ko own lamra.’ ”

²⁷Ungta Isaijah ngi Isreel mlei thung ngi owngda theda, “Isreel chapa rek naanna truwn ava thungki sitphui jangi nem chdaat jownti; kthlowm tek kaktlan pik ra.

²⁸Mleija Mukpu ngi Mma paudon ava dultipaam tu kbeisekki kupṭuw pthiira.

²⁹Ungta Isaijah ngi hanto mdo the dok lulu, “Waanmii luwngpa ki Mukpu ngi, nen nhin naole mmaak mabi, nenna Sodom hep lulu don, Gomorah lulu tkurthut chaak raan.”

³⁰Anto mkur thuttu nenni tak the chenaandi? Mleija rinkindit kchen pṭoi kma ktlok chati rekki, ditta mmaanni mdo rin chaak lei inni rinkindit pha chlamda;

³¹pdainu Nowlam dil kṭoiji rinkindit kchen pṭoi Isreel miirekva Nowlam kpurkhum ava pchaangme.

³²Tak lei da? Mleija mmaanni mdo rin chaak inni chen pṭoi lamme, pdainu nongrek tummi kchen pṭoi lulu kurthuwkda. Mmaanni khusiir mdo parthit nraanki lung ava leenni khusiir mparthit chaak inna.

³³Ava mdo kjit dok lulu, “Asuwn, Siyon thung ngi miirek khusiir parthit nrangki lung khat, ungta mtluk nraanki lung klin khat Neiji kthiik daatta; ungta Mma krin cha miia ningkja du nime.”