Read Lamkang 1 KORINTHIA 10 Bible Online

1 KORINTHIA 10 - Lamkang bible

1 KORINTHIA 10

¹Ku u knao rek, naanni hava ado dee raan ava neiji kngei chaakka, ditta nenki npah le mkheng nga armei tingi am lamda, mkheng inni truwn thu chet lamda,

²ungta mkheng inni armei leh truwn thu Mousi hin baptis tlo lamda,

³ungu pthla ktongki then mkheng inni chaa lamda,

⁴ungta pthla ktongki dii ava mkheng inni nee lamda. Mleija pthla ktongki diia mdil in kṭoi daat lungpii ava thungki mmaanni nee lamda, ungta lungpii ava Khrista.

⁵Anto daat joso mmaan mii maknem ma Isowr ningthlun na lam pme; mleija mmaan na kbowk laiji mdovar pthi lam.

⁶Mmaanni kṭha kma mdo tlot in lulu ngi nenni tatlot ma nraan, tunva hava lea nen ntummi pau mdo kham.

⁷Mii murson rek lulu ngi khut do sak pthla luwbuk maan; mdo kjit dok hava lulu, “Mii rekki kchaa knee ra ku ong lamda, ungta kardaam ra rip lamda.”

⁸Mii angṭhe ngi pang turkuiji kturkui chlam da, ungu pun som knii lei kdum ava nii khdaat thu mdiyo in lulu ngi nenva pang turkuiji kturkui chmaan che.

⁹Nenki Mukpu pirsin nmaan che, mii angṭhe ngi anto lu tlo da, pruwl rekki mdo ptuk yo lam lulu ngi;

¹⁰mdit mata mmaan angṭhea thlou chuchu lamda ke ea krep ava ngi mdo eakre lam lulu ngi thlou maan che.

¹¹Tunva hava lea paukham lulu ngi mhin inni kthuwk, pdainu kum ṭut nrangki nen mido tpurchu naan tummi hava lea mdo kjit dok.

¹²Ava ngi mlei kurthuwk da, krip ping dida kbin miiva ktluw kro ping adi sora cheek asin chso.

¹³Mii do parteel pchaan ma kepthleem ava ngi ado tapchaan ma nraan lei ki. Isowr ra lam trin chaak kuhui, ungta naan rutan kheelli ado tipthleem raan na Mma ngi rome, pdainu kepthleem thungki akarthle chaak nraan mlam ruk akpurdon pik chraan, mleija naanni ado diil dei raan.

¹⁴Ava leiji, nei kwonsat lorek, khut do sak pthla rek luw kbuk aser chaan.

¹⁵Neiji ksing miirek hin kpau lulu ngi kpau kcha ping; nei kdo the pau ava asingreel inni akṭewl chaan.

¹⁶Mukpu maal thu nenni phowl kṭha tparlaan in tong ava ngi Khrista hii them sap da knee tkurthut in pme mo? Nenni tupkui in thenpen ava ngi Khrista daksaa kthem sap tkurthut in pme mo?

¹⁷Mleija thenpen khdaat ava ngi nnen mii knempok ka daksaa khdaatti mdo tpurthuw, mleija nen nkheng inni thenpen khdaat talo sap in.

¹⁸Isreel mii rek ka abin in; tlaai down kchaa miirekka suwlbuwr plap pmemo?

¹⁹Ava mkurthuttu neiva tak the nik da? Khut do sak pthla hin then mdo down ava do khat, mdit mata khut do sak pthla ava do khatti abin inmo?

²⁰Ava pme, ktlok chati rek tlaai down na Isowr hin pme tarnam rek hin mdo piik in dinu neiva kthe ping. Naanni tarnam rek tu plap akurthut raan neiva ngei chmaang.

²¹Naanni Mukpu tong thungki leh tarnam rek tong thungki nee ve pchaang nimaan ti. Naanni Mukpu tebol thungki leh tarnam rek tebol thungki maal ve pchaang ni maan ti.

²²Mukpua khei mdo the nra nenni Mma plung pthit che naan mo? Nenna Mma kekheel li nru in ktang mo?

²³“Do mkheng nga pum ro kro,” Pdainu do mkheng nga do ksi ava pme. “Do mkheng nga pum ro kro,” Pdainu do mkheng nga kiplin kapsaang ra ava pme.

²⁴Ku mii khat lee ngi mdaksaa tum daatti parning mso, pdainu mveen tummi athlaam so.

²⁵Saa jurna thu mdo jur khim khaija plung ngi kpurdun susu da pau kikhewl liit kma achaa in.

²⁶Mleija “Dulti leh mthu ka am do khim khaija Mukpu do.”

²⁷Krin cha kma rek thungki khatti kmaal rang ngi atu own chaak in, ache maan kro kma mkurthutta, amaiṭhuwm inni mdo down khim khai plung msikki kbin kma, pau kekhewl liit kma achaa in.

²⁸Pdainu ku mii khatti, “Havaa khut do sak pthla hin tlaai mdo down ava,” kdingi atithe pik inta, akthe pik in mii ava tum lei, ungta aplung bin lei inni,

²⁹aplung bin in kma akthe pik in tummi chaa maan. Mleija nei kuplung bin ava talu lei ktlok khat plung bin kurthuwk rang da?

³⁰panpaak da neiji kchaak bi, neiji kdo panpaak loi ava talu leiji neia kṭha kma ngi mdo tithe psuk da?

³¹Ava leiji naanni kchaa mdit mata knee mata nong ktlo khim khai thu Isowr laarnee ngi atlo in.

³²Jihudia rek hin mdit mata Grik rek hin mata Isowr rinlop hin khusiir mdo parthit nraan nong tlo maan.

³³Mmaan mdo ktlan pik nra, neiji kdaksaa kparning kma mii knem pok tumra thlaam nu, knong tlot khim khai thu mii mkheng ning thlun nra neiji ktlo cha kurthuwk ping.