Read Lamkang 1 KORINTHIA 12 Bible Online

1 KORINTHIA 12 - Lamkang bible

1 KORINTHIA 12

¹Tunva ku u knao rek, pthla ktongki chla mlei thu neiji ado kthe pik maan rang nga ngei chmaang.

²Naanni ktlok chati akurthut in mpha thu, khut do sak Pthla ka aak kcha hin lele tha ado tiṭhiin tdit neiji kdo dee.

³Ava leiji, Isowr pthla do pthe ngi, “Jisua pauhurri abuk so!” dida ku khat lee ngi pau the me. Ungta Pthla Kchiir kma donle ku khat lee ngi, “Jisua Mukpu,” dida the me tdit naan dodee pandit ra ava neiji kngei chaakka.

⁴Tunva chla ava msik msik pdainu Pthla khdaat.

⁵Mnong nga msik msik, pdainu Mukpua khdaat;

⁶ungta msik msik nong ktlo ka am, pdainu Isowr khdaat ava ngi mii pum ktai hin mkheng nga pii chda mdo mu pik.

⁷Mii mkheng ṭhat nra mii pum ktai hin Pthla ava pandan pik chda.

⁸Khat hin thangva Pthla ava ngi lousing pii chda, ungu ktlok khat hin thangva Pthla ava katti kdei kcha ki piida,

⁹ktlok khat hin thangva Pthla ava katti krin ki pii chda, ktlok khat hin thangva Pthla khdaat ava ngi kapdam ki pii chda,

¹⁰ktlok khat hin thangva tngana ki nong ktlo ki pii chda, ktlok khat hin thangva pau kphuwng ki pii chda, ktlok khat hin thangva Pthla rek ktin kcha ki pii chda, ktlok khat hin thangva msik msik pauvi kpau ki pii chda, ktlok khat hin thangva msik msik pau kpurlup ki kpii kcha.

¹¹Mma poibin dil kṭoiji havale mkheng nga mma mma ki tummi them pik da, khdaat chrel Pthla ava katti them pik lamda.

¹²Mleija daksaa khdaat ava ngi msing knempokki ma am lulu ngi, daksaa msing mkheng nga knempokki am chdaat joso daksaa ava khdaat mkurthut leiji Khrista ruk anto.

¹³Mleija Jihudia rek daat don Grik rek daat don suwk owr daat don kintek mii daat don, Pthla khdaat ava ngi mkheng nga daksaa khdaat thu baptis ptlot da, ungta mkheng nga daksaa khdaat thungki mdo pneek sap lam.

¹⁴Mleija daksaa ava msing khdaatti mdo tpa am ava pme, pdainu msing knempok.

¹⁵Khu ngi “Neia khut pmaang,” dida kthe mkurthut bi, “Neia daksaa thungki pmaang,” ava leiji daksaa thungki pme tdit ro nime.

¹⁶Knaa ngi, “Neia mik kukurthut ma leiji, neia daksaa thungki pmaang,” dida mthe bi, ava leiji daksaa thungki pme dida tithe rome.

¹⁷Daksaa mkheng nga mik mkurthuttu, taryaak nrang nga talu rang da? Daksaa mkheng nga knaa mkurthut tu, mikrim mdo pniim nrang nga talu thung rang da?

¹⁸Pdainu anto katti Isowr va kchol da, khat khat ava msing ngi mi parnaak ṭip inda.

¹⁹Mkheng nga msing khdaat mkurthut bi, daksaa talu rang da?

²⁰Anto lulu ngi msing ava knempokki ka am, joso daksaa ava khdaat.

²¹Mik ki “Nang nga aju kriing maang,” dida khut hin kthe pchaang me mdit mata vei khat nowlli luw ava ngi, “Nang nga aju kriing maang,” dida khu hin kthe pchaang me.

²²Anto paa le rang ngi, daksaa thungki ksowl sii kcha msing ava ngi msit ka am sii,

²³ungta arleek setti tak kjat nra ame kdingi nenni tbin psuk in daksaa thungki msing rek ava hin tha kheel sii ngi tak kjat kat ra, ungta nenki do ksi kma msing ava kheel sii ngi kṭha ruk ka am,

²⁴msing thungki kṭha sii ava nenni do tipsit lu in pme. Pdainu nenni tkinsiir psuk in msing hin Isowr ri kheel sii ki tak kjat piida daksaa ava mdo punlom.

²⁵Ungta daksaa thu mkurnur ma nraan, pdainu msing rek ava ngi khat leh khat tuk mkursut nraan lei.

²⁶Msing khatti kja mparteel bi, mkheng kheng inni mdo jat ṭhi in; msing khatti kanpa mphaak bi, mkheng kheng inni mdo kanpat ṭhi in.

²⁷Tunva naanna Khrista ki daksaa in pti ungta naan mii pum ktaija msing in pti.

²⁸Ungta Rinlop thu Isowr va ru kri reeppi kenyee rek, mknit na thu khulpu rek, muk kdum na thu chukpu rek, ava dilli tngana rek nong ktlo rek, ava dilli kapdam rek, kbom rek, ber suda nong ktlo rek, msik msik pleiji kpau rangki kchol da pthuwk da. ka am.

²⁹Mkheng nga kenyee rek mo? Mkheng nga khulpu rek mo? Mkheng nga chukpu rek mo? Mkheng nga tngana rek ktlo lammo?

³⁰Mkheng inni kapdam ki chla mthloi inmo? Mkheng inni pleiji kpau lammo? Mkheng inni pau mpurlu inmo?

³¹Pdainu kanthang sii ki leemna chla ava angeen chaan. Ungta kinreel sii ki lam ava neiji aju tdet in nik di.