Read Lamkang 1 KORINTHIA 14 Bible Online

1 KORINTHIA 14 - Lamkang bible

1 KORINTHIA 14

¹Wonsat aptuwn chaan, ungu kheel sii ngi Pthla ktongki chla plung klut, kheel siingi pau kphuwng ki arngai chaan.

²Mleija ku mii khatti pleiji mpaubi mii rek hin kpau ava pme, pdainu Isowr hin kpau kurthuwk; mleija ku mii khat lee va mdo dee pandit pme, pdainu Pthla ngi mma ava kukthuk pau mdo pthe.

³Khat ktong thang nowlva pau kphuwng nga mii rek kpunchoi pik, ungta kup ksop ungu plung ngamna pau mdo the pik.

⁴Pleiji kpau miiva mdaksaa mthina ktong ki mdo the, pdainu pau kphuwng rek va Rinlop hin mdo the pik.

⁵Tunva naan akheng inna msik msik pleiji apau raan ava neiji kngei chaakka. Pau kphuwng rekka pleiji kpau hinva kheel setti klin, mleija Rinlop hin kthe pik mkurthut nra ktlok khatti mdo purlu pik ra.

⁶Tunva ku u knao rek, neiji pleiji pau da ahin thaanni kthleng kukurthuttu talu msit ka am rang da? Kpandan pik, mdit mata kdei dok, mata pau kphuwng mdit mata kpurchuk kma donle msit ame.

⁷Rinkhu ktaak krowl tingsai daat don riseem daat don mkrowl ava kdu jikki kdum kma donle, ku ngi tak heppi kdei pandi rang?

⁸Ungta pengkhul krowl ava mukrowl kthlei lik likki mdummu rawl karna ra ku kirsim rangda?

⁹Ava leiji naan asingreel in thung ngi tdee pandit ma pauvi kpau ma ammu, mdo the ava tak heppi ku ngi kdei pandi rang? Mleija naanni tirthli thu kpau lulu kurthuwk chnaan di.

¹⁰Dultipaam thu msik msik pauvi kpau ka am pok munra, ungta mlei ktaak tdit khat lee amnime;

¹¹pdainu pau ava ki mlei neiji kdei kukurthut mabi, neia kpau slii mii ava hin thangva paam ktlokki mii kurthuwk nik di ungta kpau slii mii ava nei kihin thangva paam ktlokki mii kurthuwk ra.

¹²Ava leiji naan asingreel in thung ruk va, Pthla ktongki kandang ra kdung ngi angei inta, Rinlop linsaan nra kheelli atlo in.

¹³Ava ngi mlei kurthuwk da, pleiji kpau miiva kpurlup rutan rang leiji aṭhil chso.

¹⁴Mleija plei khatti neiji kṭhil chaakbi, kapthla va mṭhil chaakka, pdainu kpoi bin chaak ka mthei chui me.

¹⁵Neiva tak tlo nik di? Kapthla tu kilṭhi ngi kdo ṭhil chaak ra ungta kpoi bin ruk va kdo ṭhil chaak ra; kapthla tu kilṭhi ngi neiji laa kdo the ra ungu kpoi bin tung ruk va laa kdo the ra.

¹⁶Anto mkurthut mabi, Pthla ngi Isowr kpanpaak mkurthut bi, kdei pandi kma mii va ado the in kdei liit kma pa daattu tak heppi “Amen” di don kthe rang?

¹⁷Mleija naanva kokhoppi panpaak naan di pdainu ktlok miia the pik maan ti.

¹⁸Neiji naan hin msik msik pauvi karkheelli kpau leiji Isowr kpanpaak chaakka;

¹⁹Rinlop thu neiji msik msik kpurchuk plei khdaat ava ngi pauna rek pun sowmmi pau kdo the rang hinva, kpoi bin tu kilṭhi ngi neiji pauna rek parnga daat kpau ra ava neiji kdo ngei chaak.

²⁰Ku u knao rek, plung bin thu kmo kurthuwk maan; kṭha kma thu nao kdowng ekurthuwk in, pdainu plung bin thungva plung apurchuwl in.

²¹Nowlam thu hanto kjit da, “Plei msik msik ungta paam ktlokki nerri hava mii rek hin tha, mmaanni maryaak pik liit lam mdaat joso, Neiji pau nik di,” dida Mukpu ngi theda.

²²Pleiji msik msik pau kthe ava krin cha rek tum pme, pdainu krin kma rek tum kurthuwk, pau kphuwng nga krin kma rek tum mkurthut slii daat chunva krin cha rek tum ruk kurthuwk.

²³Ava leiji, Rinlop mkheng ngi thuwk kunpun da, mkheng inni msik msik pleiji mpau inbi, ungta duwnki rek leh krin kma rekki mthu mlu inbi, mong kukto kchaan pti di donle mmaanva the ni memo?

²⁴Pdainu mkheng kheng ngi pau aphuwng sora, ungta krin kma rek leh duwnki rek marvan lubi, mkheng leiji mma ngi plung ren hur don, mkheng leiji mma ngi plung kpurdun ra.

²⁵Mma ngi muplung ril thungki kthe thuw chra, ungta ava leiji, naan arlakki do dak kat katti Isowr ka amma, di donle kuwn daat donle Isowr luw kbuk chra.

²⁶Anto mkurthuttu talu da ku u knao rek? Naanni athuw kurku in mpha thu, laabuh khat, ungta akurchu nraan ki khat, kpandang ki khat, pleiji kpau ki khat, pau kpurlu pikki khat, ava naan mii pum ktaiji ado thloi in. Havale mkheng mkarmet nrang lei atlo in.

²⁷Ku mii khatti pleiji kpau mkurthutta, pauna knii mdit mata kdum tipkheel mso, karnaak deekki atheso; ungta miilai khatti apurlu pik cha so.

²⁸Pdainu pau kpurlu pik ra ku khat lee ma am mata mmaan mii pum ktaija Rinlop thu rim kdi am chlam so, ungta mdaksaa leh Isowr hin daatti pau chso.

²⁹Khulpu rek miilai knii mdit mata miilai kdum ava ngi pau lamso, ungu ktlok rekki mdo theenna talu tdit apinrit pik chlam so.

³⁰Kuk ong daat ktlok khat hin pau mpandan pik ta, ru kri kiva rim kdi am so.

³¹Mleija mmaan mkheng nga kurchuk chra, ungta tuk kso na pau ava mmaan mkheng ngi khat khatti aphuwng lamso.

³²Ungta khulpu rek Pthla rek ava khulpu rek kurdu ngi ka am lam.

³³Mleija Isowr ra mii plung chei kparche ki Isowr ava pme, pdainu kdaai ki Isowr. Kintiing rekka Rinlop rek mkheng thu anto lulu,

³⁴Snu rekka Rinlop thu rim kdi am chlam so. Mleija mmaan paura ava rot pik me, pdainu Nowlam ruk va mdo the ava lulu ngi, mii kbommi am lamso.

³⁵Mmaanni do mdee chaak nuwm inta, mi inn thaanni mi innpu in akhewl chlam so. Mleija Rinlop thu snu khat kpau ava ning kjana.

³⁶Talu da! Naan tu kilṭhi ngi Isowr pauna ava kthuwk mo? Mdit mata naan hin daatti kthlung mo?

³⁷Khulpu khat ping kirdi da ku mii khatti mkarbin bi, mdit mata Pthla ktongki ping dida mkarthe bi, neiji naan hin kdo kjit ava Mukpu paureen khat tdit mma ngi adei chso.

³⁸Ku mii khatti hava mtin chaak mabi, mma ava tin pik chni me.

³⁹Ava leiji neiki ku u knao rek, pau kphuwng thu plung aplut chaan, ungta msik msik pleiji kpau ra ava mat maan;

⁴⁰pdainu mkheng nga karmang deek ungu karnaak deekki atlo in.