Read Lamkang 1 KORINTHIA 15 Bible Online

1 KORINTHIA 15 - Lamkang bible

1 KORINTHIA 15

¹Tunva ku u knao rek, naan hin neiji kdo paryaam kṭha paumin arlaang chaan ti, knetti ari chaak nraan neiji aju pbin phaak chaanni.

²Naan do rin chaakka do ksi kma mkurthut ma, knet merri akjown chaak inbi, ava ngi naanna akaktlan chraan.

³Mleija nei ruk va kdo arlaan chaak ru kri reep ki mkinreel ava naan hin ak parlaan chaak inna, mleija Laaika dil kṭoiji, Khrista ngi nen nupnu ton leiji mdiyo pik inda.

⁴Tditta Mma ava alruwl lamda, Laaika rek dil kṭoiji mnii kdumna nitti ring kinle da,

⁵ungta Mma ngi Sephas hin ktardet da, ava dilli sowm lei knii rek hin ktardet da.

⁶Audilli Mma ngi arjaa parnga kheel dek mu u mnao rek hin vei khdaatti ktardet da, mmaan arlakki mii maknem ma tun kpha thu ka am daat lam, ungu mii angṭhea ki iip chdok lam.

⁷Audilli Mma ngi Jeems hin maktardet dilli kenyee rek mkheng hin ktardet da.

⁸Ava mkheng ṭut na rel tha, mpha liit kma thu kṭou cha khat nei kihin ruk va mhai tdet chda.

⁹Mleija neia kenyee dida mdo to own ra ava kurhui chmaang, kenyee rek arlakki neia kdil sii cha ping, mleija neiji Isowr Rinlop suwk pthuwk nu.

¹⁰Pdainu neia Isowr plungnee ngi hanto heppi ka am cha ping, ungu nei kuktong ki Mma plungnee ava do ksi kma lua kurthuwk me. Anto kurthuwk daat joso, nei kurthuwk mdaat joring, mmaan hinva neiji kheel betti nong kdo lo, pdainu Isowr plungnee ngi neia mkurthlo ṭhi chda.

¹¹Au mkurthut bi, nei kurthuwk mjo ring mdit mata mmaan kurthuwk joso, ava leiji neenni paryaam innu ungta ava leiji naanni ado rin chaak in.

¹²Tunva Khrista ngi kdiyou dok thungki kring kinle karyaam mkurthuttu, tak heppi naan mii angṭhe va kdiyou dok thungki kring karheel ame kdingi ado the inda?

¹³Pdainu kdiyou dok thungki kring karheel ma am mabi, Khrista rukka ring kinle che don;

¹⁴Khrista ngi mrin kinlet mabi, nen do paryaam ava do sime, ungta naan do rin chaak rukka do sime.

¹⁵Nen daat ruk va Isowr hin tha plei knei kurthuwk in min, mleija Isowr ri Khrista mdo prin pinlet kdingi sakhi hur pik in minnu, Mma ava ring kinle me tdit mkindit bi, kdiyou rek rukka ring kinle me.

¹⁶Mleija kdiyou rekki mrin kinlet maan bi, Khrista rukka ring kinle me.

¹⁷Khrista ngi mrin kinlet mabi, naan do rin chaak rukka do sime ungu naanna pnu thu kikter thlit daat in pti.

¹⁸Anto mkurthut bi Khrista hin ki iip dok rek rukka kmawng kcha lamma.

¹⁹Hava rinkhu ki tum daat rang ngi neni Khrista kbin cha nkurthut inbi, nenna mii mkheng thungki ktuwl sii kcha tkurthut inna.

²⁰Pdainu tluw da ki iip dok rek thungki ru kri reep ki mthei, Khrista ava kdiyou dok rek thungki kring kinle kat.

²¹Mleija miilai khat ava ngi mlei kurthuwk da kdiyou ma am lulu ngi, Miilai khat ava ngi mlei kurthuwk da kdiyou dok thungki kring kinle tdit ka am.

²²Mleija Adam thung ngi mii mkheng mdiyo lulu ngi, Khrista thung ngi mii mkheng nga kring ra.

²³Pdainu mii pum ktaija mma mma ki ngi kparnaak ra; Khrista ava ru kri reep ki thei, au dilli Khrista ngi murjun mpha thu Mma mii rek ra.

²⁴Audilli Mma ngi Isowr tditta Mpah hin tha Kruwngpaam ava mparlaan mpha thu, paam kpu rek do paalna khim khai leh rutan khim khai ungta ru ktang khim khai, me eakre pthi dok diltha, mṭut na ava kurthuwk ra.

²⁵Mleija Mma rawlmii mkheng Mma khu pja tingi mthiik du khim khai Mma ngi kpaal ra.

²⁶Mṭut na relli rawlmii rek ava Mma do eakre ra ava kdiyou.

²⁷“Mleija Mma khu pja tingi do mkheng nga Isowr ri thii dok da.” Pdainu “Do mkheng nga Mma tingi mthiik dokka,” kdingi mthe mpha thu, Mma tingi do mkheng kthiik pik ava Isowr.

²⁸Do mkheng nga Mma tingi mthiik dok le, Mma tingi do mkheng kthiik pik ava tingi Mchapa mdak kat rukka ka amra, mleija Isowr ra mii pum ktai hin do khim khai kurthuwk.

²⁹Anto mkurthut ma lebi, kdiyou chang kdonni baptis ktlo mdo dit ava tak mdo thena da? Kdiyou rekki mrin kinlet liit ma rang ngu, mmaan kchang ngi mii rek va talu leiji baptis mdo tlot inda?

³⁰ṭhang ktai thu talu leiji neia kja kcha ping da?

³¹Ku u knao rek, nenki Mukpu Jisu Khrista hin tha, naanki mlei thu nei knaar lin chaak na ava ngi neia mnii ktai ji kdiyou cha ping!

³²Dultimii pau nopa ngi neiji Ephisia thu nowmsaa rek tu kurbun kukurthuttu, ava neiva tak psit nik da? Kdiyou rekki mrin kinlet ma rang ngu, “Nenni chaa nee daat in che, mleija pduk niiva tdiyo chaak raan.”

³³Kurhuwng chmaan: “Kṭha kma kthloppi lamchet kṭha mdo eakre lu.”

³⁴Kindit poibin thu am in, ungu pnu tla kurnowl maan. Mleija mii angṭhe va Isowr dei chme. Hava naan ningkja nra neiji kdo the.

³⁵Pdainu ku mii khatti kthera, “Tak heppi kdiyou rekka kring kinle rangda? Tak hep kdu ki daksaa ngi kthuwk lam rang ki da?”

³⁶Ka aak miilai nang! Nah achiivar ava mdiyo mabi mowng nime.

³⁷Ungta achiivar ava kuk mowng rangki chipti dak var mti, kehu daat don, mdit mata chiimuh murson daat don mmuh thlaang thlaang dat avar ra.

³⁸Pdainu Isowr do kchol dil kṭoiji mdak piida, ungta mmuh mmuh dil kṭoiji mdak ka am.

³⁹Mleija daksaa mkheng nga kurdu sap ava pme, pdainu miilai tumva msik khat ungta saa tumva ktlok khat, puwa tumva msik khat ungu tuwlva tumva msik khat nowl.

⁴⁰Parwaan ki daksaa ungta dulti ki kthuwk daksaa ka am; pdainu parwaan ki laarnee ava khdaat, ungu dulti ki laarnee ava msik khat.

⁴¹Kniw laarnee ngi msik khat, ungta thla laarnee ngi msik khat, ungu bursi rek laarnee ngi msik khat nowl; mleija laarnee thungva bursi khatta bursi khat hin msik khat.

⁴²Ava leiji kdiyou dok rek rin karheel nrang nga anto hep daat ra. Kring kinle ava kmawng kro rang pme.

⁴³Pang varri mdo var, pdainu laarnee ngi mowngda; ksowl lang lang ngi mdo alruwl, pdainu ru ktang lang lang ngi kring kinle.

⁴⁴Dultimii daksaa ngi mdo var ava Pthla ktongki daksaa ngi kring kinle, dultimii ktongki daksaa ma ambi, Pthla ktongki daksaa ruk ka am ra.

⁴⁵Hanto ngi kjit da, “Ru kri ki miilai Adam ma kring dulti miilai kurthuwk da”; Dil knao relki Adam ma rinkhu pthla kpii ava.

⁴⁶Pdainu Pthla ktong kia ru kri verki ava pme pdainu daksaa thlaang thlaang ngaal, au dilli Pthla ktongki.

⁴⁷Ru kri ki mii ava dulti thungki tnek miilai; miknit na mii ava parwaan ki.

⁴⁸Tnek mii mkurthut lulu ngi, dulti miirek ava tnek tum kurthuwk; parwaan ki mii ava anto lulu ngi parwaan mii rek lam.

⁴⁹Nenni dultimii arling heppi tkurthut in lulu ngi parwaan ki mii arling ava nnenni tdut jik raan.

⁵⁰Ku u knao rek, neiji hava kthe chaakka; daksaa leh hii ava ngi Isowr Kruwngpaam thlung chip pchaang nime, kmawng kro ava ngi kmawng kro kma ava pha chip pchaang nime.

⁵¹Asuw in! Neiji naan hin kukthuk pau khat kthea. Nen nkheng nga ti ii in nime, pdainu

⁵²mṭut naki pengkhul mdum mpha thu, kuk notti mik tak kcha heppi, nen nkheng inna karthleng che naan di. Mleija pengkhul kdumra, ungta kdiyou rekki kmawng kma rang ngi kring kinle ra, ungu nnenna karthleng che naan di.

⁵³Mleija kmawng chra ava kmawng kmarang ngi karthlengra, ungu kdiyou chra daksaa ava diyou liit nime.

⁵⁴kmawng chra ava ngi kmawng kmara ava mmaak mpha thu, ungta kdiyou chra ava ngi kdiyou kmara ava mmaak mpha thu, mdo kjit dok hava ava kurkhum rora: “Kapngam ava ngi kdiyou ava mupjol dokka.”

⁵⁵“kdiyou, nah dopchaanna tu ungda? O kdiyou, nah akruw jella tu ungda?”

⁵⁶Kdiyou kruw jel ava pnu, ungu pnu rutanna Nowlam.

⁵⁷Pdainu nenki Mukpu Jisu Khrista ava ar awng ngi, kapchaang cha ava nen nhin mi pii inda, Isowr kpanpaak cha kurthuwk so.

⁵⁸Ava leiji, nei kwonsat lo ku u knao rek, mpha ktai thu Mukpu nong alou chaan, Mukpu nong ktlo ava msit ktaak pme tdit naanni ado dee in.