Read Lamkang 1 KORINTHIA 16 Bible Online

1 KORINTHIA 16 - Lamkang bible

1 KORINTHIA 16

¹Tunva kintiing rek tummi sum mdo ṭhai ki mlei: Neiji Galatia ki Rinlop rek hin kdo the pik lam lulu ngi, naan ruk va anto lulu ngi atlo in.

²Nei kthlen mpha thu, taṭhai ma nraan, mma mma do pthuw chaak ava hapta ki mnii khat na thok nitti, naan mii pum ktaiji mkhut mkhut thu sum ava apurtuwl so.

³Ungta neiji kthlun mpha thu, naan do kulrot na rek ava chethi tu kilṭhi ngi, Jerusalem tha naan chla piik ava mdo dak nraan neiji sii lam nik di.

⁴Nei rukka kahan ra kro mkurthut bi, mmaan tu han kilṭhi rolai inni.

⁵Neiji Masidonia kaklaan dok dil tha avel ro ni kaan di, mleija Masidonia sethleng ngi chet chnuwm nu.

⁶Ungta neiji kipjiin kche nrang khim khai thu, naanni ado tdak chaak nraan, neiji aju am ṭhi bong inda mdit mata phalbi lik thu aju am ṭhi nikaan di.

⁷Mleija hanto kvang slii ngi ado kukurdut ṭhi raan ava ngei chmaang; Mukpu do rot mkurthut bi, neiji ado ka am ṭhi bong raan ava kdo ngei chaak.

⁸Pdainu Pentikos mphaak du khim khai Ephisia thu am daat nik di.

⁹Mleija nei knong mkurchuwl nra thurngot khat kparjaa ngi mhai pvan pik chda, ungta nei mhai kro kma rek knempokki ka am lam.

¹⁰Timothi mthlen ta, naan arlakki kṭi ktaakki ma am nra mhai sut pṭoi pik chaan; mleija nei knong tlot lulu ngi mma ruk va Mukpu nong mdo tlot slii.

¹¹Ava leiji ku mii khat lee ngi ning kpu uikma lu tlo mso. mma ngi nei kihin mdil mkinlet nra kdaaiji lamtha mhai dak pik chaan, mleija neiji mma ava ku u knao rek tu kilṭhi rangki karngai chaak daatta.

¹²Nenki nu u nnao in Apollo mlei thungva, ku u knao rek tu kilṭhi ngi naan ado tvel chaak raan ava mhin kdung kdo the chaak, pdainu tun tunni naan hin mthlen ra ava mma poibin kurthuwk chme, mpha khat thu mma ngi thleng chlai so.

¹³Mik khut ahar inra, krin cha thu rip mer chaan, plung ata pngar inra ruktang ngi am in.

¹⁴Nong ado tlot naan mkheng thu wonsat kurlo ngi atlo in.

¹⁵Tunva ku u knao rek, Akhaja thung ki chodu reeppi plung ren kuhur Stiphanas leh mphungka in ava naanni ado dee in; mmaanni kintiing rek nong ktlo thu mdaksaa inna kdung reenni plung plut lamda;

¹⁶hanto kdu miirek khim khai ava tingi mhai am pik chaan dinu aka ktham chaak inna.

¹⁷Stiphanas leh Phortunatas ungta Akhaikas lengi mdo taktlan pik lam leiji kanpa kchaam ping, mleija naan am nma thu mmaanni tuphut lamda;

¹⁸mleija mmaanni nei kapthla ruk naan ruk arda mipro pik chaan da. Hanto hep kdu mii rek ava naanni mhai tin pik chaan.

¹⁹Asia thungki rinlop rekki aturvui chaak inna. Akuila leh Prisila ungu mmaan inn thungki Rinlop tu kilṭhi ngi Mukpu hin kdung aturvui chaak inna.

²⁰Ku u knao rek mkheng inni aturvui chaak inna. Kchiir kurputti khat leh khat kurvui chaan.

²¹Poul nei ku khut katti kjit nu akurvui chaak inna.

²²Mukpu wonsat klo kma ku mii khat ava pauhur adu chaso. Nenki Mukpu kurjung kurthuwk so!

²³Mukpu Jisu plungnee ngi aju kurthlo ṭhi chaanso.

²⁴Jisu Khrista thu, neiki wonsat ava akheng in hinni am so. Amen.