Read Lamkang 1 KORINTHIA 3 Bible Online

1 KORINTHIA 3 - Lamkang bible

1 KORINTHIA 3

¹Pdainu ku u knao rek, neiva pthla ktongki miirek hin kpau lulu ngi kpau ava pchaang chmaang, pdainu daksaa ktongki miirek lulu kurthuwk ki Khrista ktongki nao kdowng rek lulu hin kpau kcha ping.

²Arnuw dii ngi ado kpamaal chaak in, then kapchai apii maan ring; mleija naanna kirsim mlai in pti, ungu tun ruk va kirsim liit mlai inti.

³Mleija naanna tun kpha thu dak ktongki mii kurthuwk in pti. Mleija naan arlak thu kheithe changtlaak ki akar ea akalrai in thungva daksaa ktongki miicham thlaang thlaang ngaal kurthuwk maan timo?

⁴Mleija ku mii khatti theda, “Neia Poul mii ping,” Ungta ktlok khatti theda, “Neia Apollo mii ping,” Kdingi adothe in ava miicham thlaang thlaang ngaal kurthuwk maan timo?

⁵Ava mkurthuttu Apollo ava ku da? Poul la ku da? Sra owr rek mmaan thu naanni rin chaan tinu, Mukpu ngi mmaan mii pum ktai hin mdo piik chaak lulu.

⁶Neiji phunnu Apollo ngi dii let da, pdainu Isowr ri pmowng da.

⁷Ava leiji kphun ruk dii klet ruk do ksi ava pme, pdainu kupmowng Isowr ava daat.

⁸Kphun leh dii klet ava khdaat, ungta mikniing inni mnong tlot in dil kṭoiji marda man in karlaang chlam ra.

⁹Mleija neenna Isowr nong klouve in ping, ungu naanna Isowr bil, Isowr inn sak ava in pti.

¹⁰Nei kihin mdo tpiik chaak Isowr plungnee dil kṭoiji ksing inn sak lulu ngi neiji mmun pṭhang nu, ktlok khatti mleen mdo sak. Ava tun tak heppi sa nikdi kdingi mii pum ktaji tuk asut chaso.

¹¹Mleija inn mun mdo pṭhan dok ditta Jisu Khrista ava tunni ku khat lee ngi inn mun pṭhang me.

¹²Tunva ku mii khatti innmun mdo pṭhan dok tun ni jeering, thiir, jeering kpowl, mman klu lang lang dinglung, arnaa kṭong, charuh,

¹³ava mii pum ktai nong thu kpandang ra; mleija Nit ava ngi ktidet ra, mleija mii pum ktaiji tak hep kdu ki nong mtlot tdit ki meiji pirsin na thi donle, mei tu kilṭhi ngi kpandang ra.

¹⁴Ku mii khat do pṭhan dok tunni mdo sak ava ma am daat bi, mma ngi mnah karlaang chra.

¹⁵Ku mii khat nong tlot ava mkaak chaak bi, mma kja chra, pdainu mei thungki lulu ngi, mdaksaa kat ta kaktlan pik ra.

¹⁶Naanna Isowr ki luwbuk Inn, ungta Isowr pthla naan thu ka am tdit dei maan timo?

¹⁷Ku mii khatti Isowr luwbuk Inn me eakre bi, mma ava Isowr ri ke eakrep ra. Mleija Isowr luwbuk Inn na kchiir, ungta naanna luwbuk Inn ava in pti.

¹⁸Ku mii khat lee ngi mdaksaa kurhuwn chaak mso. Naan arlakki ku mii khatti hava dultipaam thu ksing sii ngi mkarbin ta, mma ngi msin nra aak chaso.

¹⁹Mleija hava dultipaam ki ksing nga Isowr hinva ka aak. Mleija hanto kjit dokda, “Mmaan sin na thu Mma ngi pmen lamda,”

²⁰Ungta veikhat nowlli Laaika ngi hanto theda, “Ksing poibin na do ksi pme tdit Mukpu ngi dei da.”

²¹Ava leiji ku mii khat lee ngi mii rek do tlot pchaan rang leiji napal tlo mso. Mleija do mkheng nga naan ado,

²²Poul daat don, Apollo daat don, Sephas daat don, dultipaam daat don, kring daat don, kdiyou daat don, ka am daat don, dil ki rang daat don, mkheng nga naan ado;

²³ungta naanna Khrista do kurthuwk in pti; ungu Khrista ava Isowr do.