Read Lamkang 1 KORINTHIA 5 Bible Online

1 KORINTHIA 5 - Lamkang bible

1 KORINTHIA 5

¹Naan arlakki pang turkuiji kturkui cha mii ka amma tdit ki pau mson pik chlam da, ungta anto lua ktlok chati rek arlak daat ruk va ka am pme; mleija miilai khatti mpah numei iiṭhi da.

²Ungta naanni ava kanpat loi in tinu! Ava kchang nga aplung in kja rang pme mo? Ava ktlo miilaija naan arlak in ki akneng pthiin.

³Mleija dakki am mjo ring pthla va ado ka am ṭhiin, ungu neiji ava tha ka am daat kukurthut bi, kṭewl dok nik di.

⁴Hanto lu nong ktlo mii ava Mukpu Jisu miing ngi neiji kekṭewlla. Naanni akurku in mpha thu, nenki Mukpu Jisu Khrista ki rutan tu kilṭhi ngi kapthla va ado ka am ṭhiin.

⁵Mukpu Jisu nit thu pthla mdo ktlan pik nra, mdaksaa mmaan chaak nrangki tummi mii ava seitaan hin aparlaan pthiin.

⁶Anapal tlot inna ṭha chme. Thowl kṭiik suwnni thowlpen knempok mdo archik ava dei maan timo?

⁷Naan ava thowl ktaak lulu mpen ren akurthut nraan, thowl pliw ava aktleu dok in. Mleija nenki taplaanna rangki Jao nao Khrista ava eayou lamda.

⁸Ava leiji, khusiir tparthit nra ktlo ungta kṭha kma thowl kmaal mdo tlot in thowl pliw ava chaa maan che, pdainu thowl ktaak thenpen kartleu ungu kindit ava nenni chaan che.

⁹Nei kchethi thu pang turkuiji kturkui miirek tu akurchuwm ma nraan neiji naan hin kikjit chaakka;

¹⁰hava dultipaam thu pang turkuiji kturkui cha, mdit mata hangmal leh namtrom nong ktlo, mata khut dosak pthla luw kbuk kdo the na liit pme, ava mkurthutbi, hava dultipaam thungki asun raan tha kthuwk ra.

¹¹Pdainu makchang ra naan hin kdo kjit ava ku mii khatti mu u mnao miing hurda pang turkuiji kturkui cha mdit mata hangmal, mata khut do sak pthla luw kbuk, kar ai kalrai, ju kipri, mdit mata namtrom nong ngi klowng hava lu ma amta kurhou ṭhi maan kdo dit na ava pme, hanto lu kdu mii ava then maal ṭhi maan.

¹²Mleija talu rangsu dida neiji duwnki mii ava kṭewl nikdi? Naan do kṭewl rang nga rinlop thu ka am rek ava rang pme mo?

¹³Duwn kia Isowr ri kekṭewl chra. “Naan arlakki kṭha kma nong ktlo miia akneng pthiin.”