Read Lamkang 1 KORINTHIA 7 Bible Online

1 KORINTHIA 7 - Lamkang bible

1 KORINTHIA 7

¹Tunva naan do kjit pau avaki mleija pselpa khat tumva snu khat ava mdo thown liit mangi kṭha.

²Pdainu pang turkuiji kturkui ki kepthleem ma am leiji, pselpa khim khaiva mdaksaa ki tummi numei alou chso, ungta snu khim khaiva mdaksaa ki innpu athloi chso.

³Mi innpu ngi mnumei hin kindit mdo piik ra ava apii chso, anto lu ngi mnumei rukva mi innpu hin atlo so.

⁴Mleija mnumei ja mdaksaa tumra paalme, pdainu mi innpu ra; anto lulu ngi mi innpu ruk va mdaksaa ki kpu ngi paal me, pdainu mnumei.

⁵Mlei pummi ado kulrot naan kma donle khat leh khat kpirthlei maan, ditta naanni adaksaan ado kjown pchaan maan leiji seitaanni ado tipthleem ma nraan, adaksaanna kṭhil cha thu plung klut sappi ka ammi kṭhara.

⁶Paureen nu neiji hava kdo the chaak ava pme mrot na kthe kcha ping.

⁷Tditta mii mkheng nga nei kdaksaa lulu ra ava neiji kngei kcha ping. Pdainu mii pum ktaija mma mma ki leemna chla mdo phaak, hava chla dil kṭoiji khat ungu ava chla dil kṭoiji khat Isowr hinki mdo phaak chaak.

⁸Inn knei snu klou kma ungu meikhu rek hin neiji kthe chaakka, mmaan ava nei klulu ngi sangtlaakki ma am chaak in ava ngi kṭha ra.

⁹Pdainu mmaanni mdaksaan mkurjown pchaan maanbi, inn knei snu klou atlo lamso. Mleija mei kakaa heppi mdo khaan raan kchang nga inn knei leh snu klou ava ngi kṭhara.

¹⁰Inn knei leh snu klou dok rek hin neiji mnong raan kpiik chaakka, nei pme pdainu Mukpu, mleija mnumeiji mi innpu mdo kinṭhen ṭhi rang pme.

¹¹Pdainu mnumeiji ava ktlo mkurthut bi, msangtlaakki am chdaat so, mdit mata mi innpu tu karpipin chdok so. Ungta mi innpu va mnumei bowr ktlo pthi rome.

¹²Ktlok rek hin neiji kthe chaakka, Mukpu pme, mleija unao khatti krin kma numei thloida, snu ava ngi mma tu ma amve rangbi, mma ngi mbowr mdo tlot pthi rang pme.

¹³Snu ku mii khatti krin kma innpu mthloibi, ungu snu ava ngi mma tu ma amve rangbi, snu ava ngi mi innpu bowr ktlo pthi rome.

¹⁴Mleija krin cha kma innpu ava mnumei ki ar awng ngi kartleu chdok, ungta krin cha kma numei ava mi innpu ki ar awng ngi kartleu chdok. Anto kma donle anao le in ava kartleu nime, pdainu mmaan ava anto lu ngi kchiir ra.

¹⁵Pdainu krin cha kma saangram rekki mkinṭhen nuwm inbi, kinṭhen chdaat lamso; anto lu hep daat pau thungva kṭahpa ruk kchernu ruk bowl me. Mleija Isowr va kdaai rangki mido tu own chaak in.

¹⁶Mnumei nangva a innpu ado ktlan ado ktlan mara ava tak heppi dei nada? Innpu nangva anumei ado ktlan ado ktlan mara ava tak heppi dei nada?

¹⁷Mukpu ngi mii pum ktai hin mdo sil na dil kṭoiji, ungta Isowr do own dil kṭoiji mii ava ngi amso. Rinlop rek mkheng thu nei kdo sil na ava hava.

¹⁸Mma ngi mo own mpha thu vunmor kreen dok mii ka ammo? Mma ngi vunmor mdo reenna kbii mdolo pthi nra mlam thlaam mso. Vunmor kreen mlai ku mii khat ka am mo? Vunmor mdo reen nra mma ngi thlaam mso.

¹⁹Vunmor kreen ruk kreen kma ruk do khat lee tai pik me, pdainu Isowr paureen rek karkhii ava daat ra.

²⁰Mii pum ktaija mma mma mdo own na ava thu am chdaat so.

²¹Suwk khatti a am mpha thu ato own mo? Do khat lee ngi bin ma, pdainu nang ngi kintek aphaak pchaan bi, ava adaksaa ngi kheelli asin ton cha.

²²Suwk khat lulu ngi Mukpu do own dok mii ava Mukpu hinni kintek kcha miilai. Anto lulu ngi mo own mpha thu kintek mii ava Khrista suwk khat.

²³Naanna mman pummi ado tren dok in; miirek suwk pmaanti.

²⁴Ava leiji, ku u knao rek, mii pum ktai ava ngi mma mma mdo own chaak na thu amso.

²⁵Tunva innknei snu klou mlai mlei thu Mukpu pau pṭum neiji thloi chmaang, pdainu Mukpu wonsatti talo kurhui miilai khat heppi nei kpoi bin akthe pik chaak inna.

²⁶Tun tunki kja kakham dil kṭoiji, mii ava ngi ma am daat ava lulu ngi ma am chaakki kṭhara kdingi neiji kbin chaakka.

²⁷Nang nga anumei khat hin kurbowl pti mo? Kintek ra thlaam ma. Nang nga anumei khat hinki kintek ptimo? Snu thlaam ma.

²⁸Pdainu nang ngi snu alo bi, apnu ame, ungta nalanao khat ti inn mnei bi, mupnu ame. Anto daat joso inn knei snu klou miilai ava dultipaam ki kja kakham kpha chra, ungu ava aju paphaak nuwm chmaan ring.

²⁹Ku u knao rek, nei kdo the chaak nuwmma hava, mpha ava ktoi tekka; tun ki kupṭhun ni mnumei kthloi miirekva khat lee kthloi kma lulu ngi am so.

³⁰Kurnung karbaang da ki am miirek va, mmaanni kurnung karbaang kma lulu ngi amso, ungta kanpa mii rek va kanpa kma lulu ngi am so, ungu kren mii rek va do khat lee kthloi kma lulu ngi am so.

³¹Ungta dultipaam kparteel mii rek va mmaanni kparteel sii kma lulu ngi am lamso. Mleija tun tunki dultipaam ava kvei chra.

³²Naanni lamkrin cha thu kintekki a am raan ava neiji kngei chaakka. Snu klou kma miiva tak heppi Mukpu ning pthlung chnik da kdingi Mukpu nong thu pluung mdo plut.

³³Pdainu snu klou dok mii va tak heppi mnumei ning pthlung nikdi dida dultipaam nong thu plung plut da.

³⁴Ungta muplung bin ava kanṭheek da. Ungu inn knei mlai snu mdit mata nala va mdaksaa leh mapthla ava tak heppi kchiir rang kdingi Mukpu nong thu plung mdo plut, pdainu inn knei dok snu va tak heppi mi innpu ning pthlung chnik di kdingi dultipaam ki nong thu plung mdo plut.

³⁵Havaa naan akat nraan lei neiva kdo the chaak, naan tun ni mparsat set nra neiva kdo thiik ava pme, pdainu naan ṭhat bet nra ungta plung kinṭheek kma kurhui deekki Mukpu hin plung ado piik nraan lei.

³⁶Ku mii khatti inn mdo thlot dok nala ava hin kṭha ngi marngai dema, kdung reen kbinni mtardou bi, ungu anto kat ra mkurthut bi, mdo ngei ava mma ngi atlo chdaat so; mmaanni phal lamso, ava pnu pme.

³⁷Pdainu plung krip dok ku mii khat va karsiik dok kma lu kma, pdainu mpoi bin mkurjown pchaan mabi, inn mdo thlot dok nala ava mdo maak pthi nra plung mreel bi, mma ngi kṭha ngi atlo so.

³⁸Ava leiji mma inn thlot dok snu ava klou mii ruk va kṭha ngi klou chra; ungta snu klou kma mii ava ngi kṭha bet ra.

³⁹Mi innpu mrin daat khim khai thu mnumei ava mma do bowl thu ka am chdaat. Mi innpu mdiyo dok bi, mma ngi mdo ngei hin kintekki inn knei cha kro, avaa Mukpu hin daat ra.

⁴⁰Pdainu nei kdo kṭewl chaak va mma ngi anto ma am chaakki kanpa bet chra. Ungta neiva Mukpu pthla kthloija kdingi karbin kchaam ping.