Read Lamkang 1 KORINTHIA 9 Bible Online

1 KORINTHIA 9 - Lamkang bible

1 KORINTHIA 9

¹Neia kintek cha pmaang mo? Neia kenyee khat pmaang mo? Nei va nenki Mukpu Jisu dei chmaang mo? Naanna Mukpu hin nei knong lo lei kmaan timo?

²Ktlok mii rek hin kenyee khat kurthuwk mdaat joring, naan hinva kurthuwk kcha ping; mleija Mukpu hinki kenyee khat kukurthut naki kbii ava naan in pti.

³Nei mhai kparsin rek hinni neiji karthe loi kchaam ping.

⁴Kchaa knee ava nen plung bin daat pme mo?

⁵Kenyee rek murson ungta Mukpu naopa le ungu Sephas le lulu ngi numei kṭhi ava nen nuplung bin daat pme mo?

⁶Mdit mata krin nraan nong ktlo thu kma pthi kmara ava Barnabas leh nei daat mo?

⁷Rawlmii khat lulu ngi mdaksaa ki partlai da sok klou ku ka am da? Rik rou phun thida mthei kchaa kmara ku ka am? Jao lop khat seel thida marnuw dii knee kma ku ka am da?

⁸Dultimii rutanni neiva havaa the maang mo? Nowlam ruk va hanto jikki the memo?

⁹Mleija Mousi Nowlam thu hanto kjit da theda, “Buh ado pther bing silpa ava mner ktuh ma.” Isowr do bin psuk chaak ava silpa mo?

¹⁰Mkheng nga nen ntummi Mma va kthe kurthuwk memo? Nen ntumra avaa mdo kjit dok, mleija kukhoi ruk va ktum ka amra kdingi akhoi so, ungta mdo pther rukva ktum ka amra kdingi ather so.

¹¹Pthla ktongki kṭha ava neenni naan arlakki kvar cha kukurthut innu, daksaa ktongki dona neenni naan hinki kdo phaak inna knem reen mo?

¹²Ktlok mii ngi naan hinki hava mdo arngai kat ra mkurthuttu, neenva karkheel sii ngi arngai ni maan ring mo? Anto chdaat joso, do dak katti neenni sinton maan ring, pdainu Khrista ki kṭha paumin ktong tha kapkhaan liit kma neenni kdo tlot in khim khai thu kdo diil chaak in.

¹³Mleija luwbuk Inn thu nong ktlo ra mdo thiik rek va luwbuk Inn thungki then chaa lamda, ungta suwlbuwr bengi sok klou rek va tlaai down thungki mtum in ka am tdit naanni dei maan timo?

¹⁴Hanto lulu ngi, kṭha paumin kparyaam mii rek va kṭha paumin thu mrin nraan leiji then mdo phaak raan, dida Mukpu ngi pau mdo reen dok.

¹⁵Pdainu hava le thu nei kdo tlot kat ra khdaat pre neiji the chmaang, mdit mata nei ktummi anto kat mkurthut nra neiji kjit chmaang. Mleija nei knapal tlot ava ku mii khatti do khat lee mipsit ma rang ta, neia kdiyo chaakki kṭha siira.

¹⁶Mleija neiji kṭha paumin kparyaam bi, knapal tlot nra ame. Mleija nei kleen ni kdo tlot ma kro liit kma ngi amda. Mleija neiji kṭha paumin kparyaam mabi neia ksuw kthi kurthuwk ping!

¹⁷Mleija nei kuplung binni havaa ktlo kukurthut bi, neiji mnah pha chnikdi; pdainu nei kuplung bin ki mkurthut mabi, mnong ra neia mdo tsil chaak na ping.

¹⁸Ava mkurthuttu neiki mnah ava talu rang? Hava daat ra, ditta kṭha paumin kparyaam thu neiji kdo tlot kat ra ava ktlot mabi, kṭha paumin na leemna ngi kparyaam kurthuwk nik di.

¹⁹Mleija mii mkheng thu kintek chdaat joring va, nei kdaksaa ngi karkheel betti mii kdo phaak chaak nra mkhengki suwk owr ri ka am cha ping.

²⁰Jihudia rek kdo thuw ṭhi nra, Jihudia rek thu neiji Jihudia khat lulu ngi am nu; Nowlam kurdu ngi ka am mii rek kdo thuw ṭhi nlamra, nei kdak kat ava neiji Nowlam kurdu ngi am cha mjo ring, Nowlam kurdu ngi ka am rek heppi, Nowlam kurdu ki khat lulu ngi ka am cha ping.

²¹Nowlam duwn tha ka am rek neiji kdo thuw ṭhi nlamra, Isowr Nowlam kleek lulu ngi, pdainu Khrista Nowlam kurdu ngi, Nowlam duwn tha ka am rek hin, Nowlam duwn ki heppi ka am cha ping.

²²Ksowl cha mii kdo thuw ṭhi chaak nra, ksowl cha mii hin nei rukka ksowl cha ping. Hava mkheng ngi mii angṭhe mdo ktlan pik chaak nra, mii mkheng hin neia do mkheng kurthuwk kcha ping.

²³Neiji kṭha paumin thu ktum kdo phaak chaak nra, ava tummi neiji hava mkheng kdo tlot chaak.

²⁴Kchen parteek thu mkheng inni chen da, pdainu miilai khdaatti mnah mdo arlaan naanni dei maan timo? Ava leiji ado phaak chaak nraan chen in.

²⁵Klee kparteek khim khaiji do mkheng thu mdaksaa ava kurjowng. Mmaanva kmaang chrangki laarkhum mdo arlaan in, pdainu nenna kmaang rangki ava pme.

²⁶Kṭha a, neiji kuptuwn kma kchen kurthuwk maang, tarthli kraang kip prei khat lulu ngi neiji tlo maang;

²⁷pdainu ktlok rek hin kparyaam dok dil tha nei kdaksaa ava kurhui kma kro ping kdingi kdaksaa ava kchung kbii tpa amnu suwkki ka am ping.