Read Lamkang 2 KORINTHIA 1 Bible Online

2 KORINTHIA 1 - Lamkang bible

2 KORINTHIA 1

¹Isowr poibin dil kṭoiji Jisu Khrista ki kenyee khat Poul leh nenki nu u nnao in Timothi ngi Akhaja mkheng thungki kintiing rek mii mkheng tu kilṭhi ngi Korinthia thu ka am Isowr Rinlop rek hin tha:

²Nenki Npah in Isowr leh Mukpu Jisu Khrista hinki plungnee leh kdaai naan hin am so.

³Nenki Mukpu Jisu Khrista ki Mpah ungta Isowr kurthuwk, wonsat knei langlangki Mpah ungu plung ngam mkheng ki Isowr,

⁴plung ngam ava tu kilṭhi ngi nen ndaksaa inna Isowr ri plung ngam mi pii chaanda, mleija ava leiji kja kparteel rek nen ava ngi plung ngam tpiik pchaan nraan, nen njat naan mkheng thu plung ngam mi hai pii chaan so.

⁵Mleija Khrista jat kham ava kheel siingi nenni hur ṭhi in minnu, ava leiji Khrista thu plung ngam nenni kheel sii ngi tphaak chaak in.

⁶Neenni kja kakham kparteel inbi, ava naanki plung ngam leh kirliing ado phaak nraan lei; ungta plung ngam mtipiik inbi, ava naan plung ngamna, neen kjat kakham in lulu ngi naanni kja kakham adiil dei chaan.

⁷Neenni kdet liit kma plung aju pkai psuk innu; mleija naanni neenki kja kakham ado tphaak ṭhiin ava dei innu, naan ruk va neenki plung ngam ado tphaak ṭhi chaak in.

⁸Mleija ku u knao rek, Neenni Asia thu kja kdo parteel chaak in ava naan dodee ma rang nga ngei chmaan ring; mleija neen ktuwn inki bowr krik ava kheel sii ki ava ngi mdo tnen lei inni, krinkhu inna kring rang ruk va bin chmaan ring.

⁹Kdiyou rangki nenni talu leiji tarlaan inda kdingi bin chaannu; pdainu nenni nen ndaksaa tunni kbin psuk kma pdainu kdiyou rek kipring pinle Isowr hin tbin psuk chaak in.

¹⁰Tiṭit kirvei kdiyou thungki Mma ngi mi ṭenthuw chaanda, ungta mi kṭen pthuwk chraan; Mma ngi vei khat mido tiṭen pthuw chaak nraan, Mma hin nenni kdung plung ngi bin psuk chaan che.

¹¹Kṭhil cha thu naan ruk va ado tbom chaak kat raan, ditta ava leiji mii knempok doṭhil pikki neen kihin suwṭhat mdo trot pik nraan ki tummi, mii maknemmi neen kchang kdon ni kanpa kpha chlam ra.

¹²Mleija neen knapal tlot chaak inna, hava dultipaam thungki neenki kindit rinpaumin, kheel sii ngi naan ktong tha, dultipaam ki lousing pme, pdainu Isowr plungnee leh Isowr ktongki plung klut.

¹³Mleija neenni naan hin do khat lee kjit chmaan ring pdainu naan do pat leh ado dee pandit in ava daat; naanni kurkhummi deipandi chnaan di kdingi kbin psuk chaak inna.

¹⁴Naanni deithuw maanti, mleija Mukpu Jisu nit thung ngi neenni naan hin naar ado kiplin psuk chaak in lulu ngi, naanni neen kihin naar mhai plin psuk chnaan di.

¹⁵Mleija hava anto kat kurthuwk, ditta naanni suwṭhat vei knii ngi ado phaak chaak nraan, ru kri ngi naan hin tithlen ra ava neiji kdo ngei chaak.

¹⁶Masidonia tha kche thu lamtha ado kvel chaak nuwm in, ungta Masidonia ki naan hin kdil kinle da, ungu Judia kira lamtha neia naanni ado tdak chaak raan ava kdo ngei chaak.

¹⁷Hava kdo tlot nuwm reen leiji plung krip kma lulu kurthuwk mo? Daksaa dil kaṭoiji ka am lulu ngi oji dinu kdo the dok ava neiji eme di teng nu kthe mo?

¹⁸Isowr ava lam trin chaak kurhui kat mkurthut leiji, naan hin thangva ong leh maang ame.

¹⁹Mleija Silvanus leh Timothi ungu neiji naan arlakki Isowr Chapa Jisu Khrista kdo paryaam in ava ong leh maang ava pme; pdainu Mma hin thangva mpha ktai thu ong daat.

²⁰Mleija Isowr paureel dok mkheng nga Mma hin ong kurthuwk. Ava leiji nenni Isowr laarnee hin tha Mma thu Amen talo in.

²¹Pdainu naan tu kilṭhi ngi Khrista thu mi kapṭhan pik ava Isowr, ungu rutan mi hai pii inda;

²²nen nleen inni Mma ngi kbii mi hai nam pik inda ungta pau palreen lulu ngi nen nuplung thu Pthla mi hai pii chaan da.

²³Pdainu plungril deida sakhi mukuhur pik Isowr ava neiji kaktham chaakka, mleija neiji naan ado ksan nraan ki Korinthia tha kthleng nuwm ava pmaang.

²⁴Neenni naan dorin chaak tun tha mkinreel li am inni di chmaan ring; naan kanpat nrang leiji nong ado ktlot ṭhi in, mleija naanni krip merri ado rin chaak in.