Read Lamkang 2 KORINTHIA 11 Bible Online

2 KORINTHIA 11 - Lamkang bible

2 KORINTHIA 11

¹Neiji mruk ka aah chaak na thu ado tdiil pik chaak nraan kngeija. Mhai diil ṭhi chaan!

²Neiji naanna Isowr ktong kingi khei akthe chaak naanna, mleija nalanao kartleu dang ngi khdaat chrel innpu Khrista ava hin inn mdo tathlot dok in.

³Pdainu pruwlli mril kakhaa ngi Ev mdo huwn chaak lulu ngi, naan plung bin ruk Khrista hin plung klut ungu kartleu deekki luw ado buk in thungki lele dung ngi akṭhi raan mo kdingi neia kṭi kchaam ping.

⁴Mleija ktlok khatti thleng sora neen kdo kparyaam in kma ktlok Jisu mparyaam inbi, mdit mata karlaang dok naanni ktlok khat ava hinki pthla msik khat arlaan inbi, mata ado arlaan dok in ava ktlok khat hinki kṭha paumin msik khat arlaan inbi, naanni mma ava kirsim dokki arot inna.

⁵Naanni kunton dokki kenyee rek ado dit in mmaan hinva neia mjiing ktla bet ruk va karbin chmaang.

⁶Kpau thu neiji pau chdei mdaat joring, kdei kma kia kurthuwk me, mlam ktai thu do mkheng nga neenni ado ktidet chaak dok in.

⁷Isowr ki kṭha paumin neiji naan hin mman ktaakki kdo paryaam leiji, naan akinreel nraan nei kdaksaa ava ningkja kdu rakki pnu thu ktla kcha pingmo?

⁸Neiji naan sok ado klo chaak nraan, ktlok Rinlop rek hinki mmaan do bom arlaang nu kulrowt chaak lam.

⁹Ungta neiji naan aka am ṭhiin mpha thu, ungu kthloi chaak ma thu, neiva ku khat lee bowr tiprik chmaang, mleija Masidonia ki kthleng ku u knao rekki, nei kdo kriin chaak ava mhai purdon pik chlam da. Ava leiji chodu ki lulu ngi neiji dil thang ruk va abowr in tiprik chni maang.

¹⁰Khrista ki mkindit ava nei kthu amda Akhaja paamkowl thu neiji napal kdo tlot chaak thungki neia rim kdi am ni maang.

¹¹Ungta talu lei da? Neiji naan wonsat ado klo maan lei mo? Nei kdo tlot ava Isowr ri mdo dee.

¹²Ungta neen knong tlot in lulu ngi nong ktlot in dida napal ktlo rek mmaan neiji ktipde buk du khim khai, neiji kdo tlot slii ava tlo kurnowl thlit daat nik di.

¹³Mleija hanto lu hep daat mii ava kindit kma kenyee rek lam, mmaan mdaksaa ava Khrista ki kenyee rek kdingi kpurdu jik lamda kuhuwng kcha nong ktlo rek lam.

¹⁴Ungta tngana pme, mleija seitaan daat rap klua mdaksaa ava mar awng ki waan tamsii ping ngi kardi da kpurdu jik.

¹⁵Ava leiji sra owr rekki mdaksaan rinkindit ki sra owr rek mupdut jik bi, ava arleek set pme. Mmaanki mṭut na ava mnong tlot inni karthawng ra.

¹⁶Neiji kthe chaak nowlla, ku khat lee ngi ka aak ki mhai bin mso; pdainu naanni bin chdaat jown ti, nei ruk va mruk napal kdo tlot chaak nra, ka aak lulu ngi mhai lo pik chaan.

¹⁷Nei kdo the chaak ava Mukpu rutan khim khai kthe ava pmaang pdainu ka aak khat ti napal thu plung krip mer cha ping.

¹⁸Mii knempok ki dultipaam ktong tha napal mdo tlot leiji, nei ruk va napal kdo tlot chaak.

¹⁹Mleija ksing naanni ka aak rek ava kanpa kanpa ngi ado diil ṭhiin!

²⁰Mleija ku mii khatti naanna suwk owr rekki ata tlot in, mdit mata ata chaak dok in, mata aju tkat na chaak in, mdit mata do ksi thleer kma ata tlot in, mdit mata amai thaanni ado titpeen in ava naanni adiil dei chaan.

²¹Ava tumva neenna kdung ngi ksowl kchaan ping, dida nei kning kja nra neiji kdo the kat chaak ra. Pdainu ku mii khatti napal mtlot nuwm rekrek bi, ka aak khatti neiji kpau cha ping, ava tummi nei rukka napal ktlot chaak nuwmma.

²²Mmaanna Hebru mii rek mo? Nei rukka ava ping. Mmaanna Isreel mii rek lammo? Nei rukka ava ping. Mmaanna Abraham charuwl rek lammo? Nei rukka ava ping.

²³Mmaanna Khrista sra owr rek lammo? Neia makṭha bet khat ava ping. Mong kokto miilai khat pau lulu ngi neiji kpau kcha ping. Kdung nong ktlo ngi pkheel nu, rowng inn thu ka ammi pkheel nu, tatai pchaan ma kchung hurnu, maknem thu kdiyou der der cha ping.

²⁴Neiji Jihudia rek kchung kbii vei som plii thungki khat ktla ava vei parnga chak thu kdo arlaan.

²⁵Kchung ngi vei kdum mbun chlam da; vei khat thu lung ngi mdeeng lamda. Vei kdum chak thu arkuwngpii kukui thu jaaunu; jaan khat leh kunthun nii khat truwn thu am chdaat nu;

²⁶neiji kche ktlown na maknem thung ngi dii klin thu, taku rek khut thu, kmii rek khut thu, ktlok chati rek khut thu, khuwpii thu, kbowklai, truwn thu, kindit kma ku u knao rek, hava mkheng thu khu siir parthit na thi ndaat lu.

²⁷Kdung ngi nong klou ungta mdo owr chaak thu, mik khut harnu jaan krah, poitham ning kraal, maknem thu then ktaakki puwrthlowk kpurlo nu, kjiil ksik thu dona ktaakki ka am kcha ping.

²⁸Ungta murson rek kthe kma, Rinlop mkheng tummi plung kjiing ava mnii ktaiji nei ktunni kparchip thlit da.

²⁹Ksowl cha mii hin neia sowl maang mo? ktluw kcha mii hin neiva plung pjiin maang mo?

³⁰Neiji napal ktlot kat rangbi, nei ksowl chaak na rek thu neiji napal ktlot chaakka.

³¹Mukpu Jisu Pah Isowr, ava kṭuw knai liit kma tpanpaak chaak ra, Mma ngi nei kipleinei rang nga mdo dee dok.

³²Damaskas thu kruwng Aretas ava ngi ka am paam kpupa ngi nei mkukjowng rangki Damaskas khuwpii ava seel psuk da,

³³pdainu neia bowr thung ngi khuwsuwng thu mupṭum lamda, mma khut thungki karthlet kcha ping.