Read Lamkang 2 KORINTHIA 12 Bible Online

2 KORINTHIA 12 - Lamkang bible

2 KORINTHIA 12

¹Neiji napal kdo tlot kat ra; ava ngi do khat leea phaa chni maang, pdainu neia Mukpu ki mik kleng rek leh mdo tpandan thu chet kurnowl thlit daat nik di.

²Kum sowm lei plii kvei dokka, neiji Khrista ki Miilai khat deinu, ava mu kdumna parwaan tha arjuk ṭen dok da mdak pummo mdak ktaak tdit neiji dei chmaang, Isowr va mdee.

³Ungta hava Miilai ava paradais tha arjuk ṭen dok da, mdak pummo mdak ktaak tdit neiji dei chmaang, Isowr va mdee.

⁴Ungta mii dothe dema, tithe deliit ma, pau Mma ngi aryaa da.

⁵Hava Miilai kchang ngi neiji napalla kdo tlot chaak, pdainu nei ktumva ksowl chaak na kma donle neiji napal tlo chni maang.

⁶Neiji napal tlo chnuwm joring, ka aak khatta kurthuwk ni maang, mleija neiji mkindit the nik di. Pdainu ku mii khat lee ngi nei mdei da, mdit mata nei kihin ki aryaa da kheel sii ngi mdo tbin psuk ma nra, neiji ava tlo ni maang.

⁷Ungta mdo tpandan pik knem reen ava ngi knaar mlin reen ma nra, kdak thu tirliing khat mpii da, knaar kdo plin ma nra, ungu nei mkuknuwr ra seitaan tamsii khat amda.

⁸Hava mlei thu mdo tmaak pthi nra, Mukpu hin vei kdum chak neiji ktham chnu;

⁹Pdainu Mma ngi kihin theda, “Nah atumva Nei kuplungnee ava kokhop kcha a, mleija ksowl thu Nei krutan ava kinreel.” Khrista rutan nei kleen ni makbaan thlit daat nra, kheel setset ti neiji ksowl chaak na thu kanpa kanpa ngi napal tlo chnik di.

¹⁰Mleija Khrista tummi ksowl chaak na thu, ning er pau kdo aryaak na thu, mtu owr chaak thu, kja kakham thu, kheel siingi kja kparteel ava ngi nei kning kthlung rekrek cha; mleija neia kru mdown mpha thu kru ktang.

¹¹Neia ka aak kcha ping! Namtrommi naanni ado tpurthuw in, mleija neia naan do panpaak chaak katkat rang ping. Mleija neiji do si cha mdaat joring kunton dok kenyee rek hinva juwm liit maang.

¹²Mkindit kenyee ki titinna rek ava naan arlakki kdiil dei kcha mkheng ngi titinna rek leh tngana rek ungu klin klin nong rek kdo tlot chaak dok.

¹³Mleija nei kdaksaa ngi abowr in tiprik chmaang, Rinlop murson rek hinva naanni ado ptham in talu ka am da? Hava karmak ava mhai ptlot pik in.

¹⁴Naan hinni kthlen nrangki ku kurthlonna hava ngi mvei kdumna. Ungta neia abowr in rina kurthuwk ni maang, mleija naan do ava neiji thlaam maang, pdainu naan akthlaam in ping; mleija mnaole ngi mnuh mpah tumra pning me, pdainu mnuh mpah ngi mnao le tumra mdo pnin pik.

¹⁵Ungta naanki raothla tumra neiji kdo thloi chaak ava kdung kanpa kanpa ngi partlai chnik di. Neiji kdung reenni wonsat ado klo in leiji ktlowm suwnni wonsat mlo naan mo?

¹⁶Pdainu nei kdaksaa ngi abowr in tiprik chmaang tdit naanni ro naan di, neiji lousing ktlotta didonle ku mii khatti ahuwng chaan donle aju kpiman chraan.

¹⁷Neiji naan hinni kdo sii rek ku mii khat lee hin kakat na chaak mo?

¹⁸Neiji Titas ksop nu, ungu mma tu kilṭhi ngi mnaopa pṭoi nu. Titas va naan ata kat naan mo? Pthla khdaat ti nenni tlo maan min mo? Kal khdaat ti tkhiin in pme mo?

¹⁹Naan amaiṭhuwm inni neenni kdaksaan na karthe loi duwk duwkki abin thlit daat inmo? Isowr do sut na thu neenni Khrista ki ngi kpau kcha in ping, ungu nei kwonsat lo rek, mkheng nga naan alin asaan nraan ki.

²⁰Mleija neiji kthlen luwng thu nei kdo ngei ma ava naan hin kphaak khot, ungta naan do ngei liit ma nei kihin aphaak inbi,ava kṭitta; tditta kar ai kalrai kro, kheithe changtlaak, plung kthi, daksaa kparning, titih ktadah, kho kthe, kpohok, chei karche cheep chowppi ka am kro.

²¹Neiji kthlen nowl mpha thu, Isowr ri naan amaiṭhuwm inni kjuwm rakki muktlo kro kdingi kṭitta. Ungta chodu ngi pnu ktla dok rek leh kbuwr thungki plung ren kuhur kma rek, pang turkuiji kturkui kcha, ungu kindit kma turkui ktlo mii maknem ava tummi neiji kurnung karbaang da kṭap kro ping.