Read Lamkang 2 KORINTHIA 13 Bible Online

2 KORINTHIA 13 - Lamkang bible

2 KORINTHIA 13

¹Neiji naan hin kthlen ra ava hava ngi mvei kdum nra. Pau kthuwk lu ma amta miilai knii mkurthut mata miilai kdummi sakhira.

²Chodu ngi pnu ktla rek leh ktlok mkheng hin neiji pau kdo kham dok, ungu neiji mvei knit na avel innu ka am daat thungki lulu ngi, nei ktaakki tun rukva pau kakham pik lamma, neiji vei khat kthlen nowlbi, purhui lam nimaang.

³Khrista ngi nei kthung ngi kpau tdit naanni ado dee kat in. Naan akdiil ṭhi in mpha thu Mma ava sowl liit me, pdainu naan thu kdung ngi mru ktang.

⁴Mleija ksowlli Mma ava Khros leen mdo pthoi in, pdainu Isowr rutanni kring. Mleija Mma thung ngi neenna ksowl kchaan ping, pdainu naan ado kdiil ṭhi inni Isowr rutan Mma ava tu kilṭhi ngi neenna ring chnik kaan di.

⁵Naanni krin cha thu arpom thlit mo arpom thlit maanti tdit kdaksaan ni ado kpirsin naan. Adaksaa inna kpirsin in. Naan thung ngi Jisu Khrista ka am tdit dei maan timo? Kpirsin thung ngi naan ak kro kmaan kurthuwk kat.

⁶Neenna mdo rot ma pme, tdit naanni pha naandi kdingi neiji kbin chaakka.

⁷Pdainu naanni karmak nong ado tlot ma nraan, neenni Isowr hin kṭhil chaak inna. Neenni kpirsin kurdut ṭhi ra kakandan ma nraan, pdainu neenni kapchaang dok kma kurthuwk daat jown ring, naanni kindit ado tlot nraan leiki.

⁸Mleija neenni kindit kro kma ngi do khat lee tlo pchaang chni maan ring, pdainu kindit tum daat ra.

⁹Mleija neenni ksowl chaak in thu, ungta naan ru mtan mpha thu, neenna kanpa kcha in ping. Naanni mkinreel akurthut nraan neenni kṭhil chaak inna.

¹⁰Kṭhit pthi rang kma pdainu ksa rang leiji, Mukpu ngi nei kihin mdo tpiik chaak rutan ava ngi, neiji naan hin kthlen mpha thu, kapchai reenni ado kthe ma nraan, naan hinki lam kakarlat slii thu, neiji hava kdo kjit chaak.

¹¹Mṭut na rel tha ku u knao rek, ak kthaan chaak inna. Mkinreel ekurthuwk in, nei kpau the chaak ava knaa mhai tkiin pik chaan, khat leh khat ekulrot naan, kdaaiji am in, ungta wonsat leh kdaaiki Isowr ri aju kurthlo ṭhi chaan so.

¹²Kchiir do putti khat leh khat kurvui chaan.

¹³Kintiing rek mkheng ngi aturvui chaak inna.

¹⁴Mukpu Jisu Khrista ki plungnee ungta Isowr wonsat ungu Pthla Kchiir do thloppi akheng inna aju ṭhi chaan so.