Read Lamkang 2 KORINTHIA 2 Bible Online

2 KORINTHIA 2 - Lamkang bible

2 KORINTHIA 2

¹Mleija veikhat avel nowl inda aplung in kdo pjat ma nra kuplung kdo reel chaak dok.

²Mleija neiji naan plung dun nra ktlo kukurthuttu, neiji plung kdo pjat mii ava kma donle neia ku ngi plung ngam mhai kpii chrangda?

³Ungta plung kanpa mhai kpii chrang rek hinni neiji plung kja kdo phaak ma nra, mleija nei kakanpat bi, naan akheng inki kanpa tdit naan akheng inni ado dee kat kat in, neiji kdo tlot kikjit cha ping.

⁴Mleija kdung plung kakham, plungkja, arthli knempok kbuw ngi kdo kjit chaak, naan plung kankar nra ava pme, pdainu nei kwonsat ava naan tun tha kheel sii ngi ka amma tdit naan dodee rang lei.

⁵Pdainu plung kja ku mii khat ma ambi, mma ngi nei daat mdo tapjat ava pme; pdainu maklek suwn thu kparsa reenni kdo thena ava pme, naan akheng in hin ruk va kurthuwk.

⁶Mleija mii knempokki miilai khat hin tha anto lu mraal kpii ava ko khoppa.

⁷Ava leiji mma ngi kheel reenni plung mdo pjat ma nra, ava kchang nga naanni mhin kinle da ado ptlot pik in ungu plung ngam ado piik inni kṭha siira.

⁸Ava leiji naanni mma ava wonsat adolo chaak nowl raan neiji kngei chaakka.

⁹Mleija naanni do khim khai apṭoi inmo pṭoi maanti tdit neiji kdo dee chaak nra aju pirsin naannu hava kdo kjit chaak.

¹⁰Naan do ptlot pik ku mii khat ava nei ruk ku kuptlot pikka. Talu talu daat joso neiji do khat kuptlot pik bi, ava naan tummi Khrista maiṭhuwmmi kdo ptlot pik.

¹¹Nen ntunni seitaanni khut mdo pnen ma nra; mleija mma poibinna nnenni ndee in.

¹²Neiji Troas thung ngi Khrista ki kṭha paumin kparyaam ra kthlen thungta, Mukpu hin nei ktummi thurngot khat mhai pvan pik chda.

¹³Pdainu ava tha ku u knao Titas kdo phaak ma leiji kuplung kja karnga liit chme. Ava leiji neiji mmaanna ma lam thinu, Masidonia tha kunsun cha ping.

¹⁴Pdainu Khrista thu mpha ktai thung ngi kapchaang riimmi mihai ṭhi chaanda, ungta mmun ktai thu Mma kdei cha ki mikrim ava nnen leiji karyaam da, Isowr hin panpaak chaan che.

¹⁵Mleija nnenna mdo ktlan pik rek leh kmawng kcha rek arlakki Isowr hin tha Khrista ki mikrim ava in pmin.

¹⁶Khat hin thangva kdiyou thungki ngi kdiyou kira krim kurthuwk da, ktlok khat hin thangva, rinkhu thungki ngi rinkhu kira krim kurthuwk. Hava tummi kurhui ra ku ka amda?

¹⁷Mleija mii knempok lulu ngi nnenna Isowr pauna kjur in pmin me; pdainu Isowr nong silna plung ktip miirek lulu ngi, Isowr do sut na thu Khrista ktong tha kpau in pmin.