Read Lamkang 2 KORINTHIA 3 Bible Online

2 KORINTHIA 3 - Lamkang bible

2 KORINTHIA 3

¹Nenni ndaksaa kpanpaak ra nupṭhun inmo? Mdit mata naan hinki, mata naan hin tha, mii murson rek lulu ngi kro ki chethi nikriin inmo?

²Mii mkheng ngi deida mdo pat ra, naan plung ril thung ngi kdo kjit chaak dok in, naan ki daksaa ava kro kdi ki neen kchethi.

³Ungta naanna Khrista hinki chethi khat neenni ado kparlaan in tdit naanni tdet inti, ava mukdii do kjit pme pdainu kring Isowr Pthla do kjit, lungphel tun pme pdainu dultimii plung ril thu.

⁴Hanto ngi Khrista thu Isowr hin knetti krin cha tkurthut in.

⁵Neenni do khim khai pchaang da neen kthung ngi kthuwk lulu ngi neenva karbin chmaan ring; neenni kapchaang hep kukurthut naan na Isowr hinki.

⁶Mma ngi ren paurina ki kapchaang kukurthut nraan ki mhai tapchaan inda, tikjit khat ava pme pdainu Pthla, mleija tikjit va mdo eayo pdainu Pthla va rinkhu kpii.

⁷Nowlam ma lungphel tunni kjit da, mpiik mpha thu Isowr laarnee kandang da. Mousi mai ava chuwl chdaat joso, Isreel mii rek tumva mapleu reen leiji mmai ksuw ava pchaang chlamme. Nowlam rukka kapchai reen mkurthut che va kdiyou laarnee mdo thuwṭhi.

⁸Pthla nong tlot ava tija klinni mlaar knei kurthuwk chdaat ta!

⁹Mleija mraal kpii rang ngi mdo pankai ava kunlor langlang ungu rinkindit rang mdo pankai ava tija kheeli kunlor ri kipleu chdaat rang nga!

¹⁰Hava ki mleija chodu ki kipleu sii ava tunva kunlor ame, mleija kheel siiki kunlor laarnee kipleu ava ka am.

¹¹Mleija kchuwl cha ava ngi mapleu bi, ka am thlit daat rang ava kheel siiki kunlor ri kipleu ra.

¹²Neenni hava kdo bin psuk mer lei inni, kuplung inna kheel siingi ktangar.

¹³Isreel mii rekki kchuwl kipleu ava ṭut mdo dee ma nraan, mmai kukhum Mousi lulua neenna kurthuwk maan ring.

¹⁴Pdainu mpoibin inna pchai setset da; mleija snii kpha thu mmaanni, pliw paurina mpat inki mpha thu, maikhum ava mdo lii in pme, mleija Khrista mpha thung rongi mdo lo pthi.

¹⁵Snii kpha thu mmaanni Mousi mpat in mpha thu maikhum ava muplung ril thuwnni ka am daat.

¹⁶Pdainu mii ava ngi Mukpu hin mkinlet mpha thu maikhum ava kurlou cha.

¹⁷Tunva Mukpu ava Pthla kurthuwk, Mukpu Pthla amna mun thungva kintek ka am.

¹⁸Ungta nen nkheng inni nmai in kukhum kma Mukpu laarnee tsut in; ungta laarnee ava kat arling ngi tkarthlen chaak in, mleija hava Mukpu Pthla.