Read Lamkang 2 KORINTHIA 5 Bible Online

2 KORINTHIA 5 - Lamkang bible

2 KORINTHIA 5

¹Mleija mthung ngi nen ta am naan dultipaam ki buw inn mtluk chaak bi, parwaan tha, Isowr hinni khut do sak ma kṭuw knai kma ka am tdit nenni ndee in.

²Ungta nenni hava tha chel chang in minnu, parwaan ki inn kihiil knaa nuwm rekrekki ta am in;

³mleija ava nhiil nnaak inbi ndakchai ji na am daat arlaan inni mi pha in nime.

⁴Mleija hava buw inn thu na am slii daat arlaan inni, tarngai chaak reen lei inni chel tchan chaak in; mdolo pthi nrang lei pme, pdainu kheel setti mido tapnaak chaak nraan ki, mleija kdiyou kro ki rinkhua ava ngi kpinjer ra.

⁵Nen mido tpinjer pik chaak nraan Isowr katti mi purchuwl pik chaanda, Mma do purtuwl mkheng kpha chrang leiji Pthla mi hai pii chaan da.

⁶Ava leiji neenna mpha ktai thu karda in krok; neenni ki inn thaanni ka am in mpha thungva Mukpu hinki lam karlat kchaan ping tdit neenni kdo dee in.

⁷Mleija neenni krin cha thu kchet in ping, kdo dee lei inni kchet pmaan ring.

⁸Ungta ki inn in ma pthii thida Mukpu tu ka amve ava kdo ngei chaak lei inni kdung karda inna krok kcha a.

⁹Ava leiji neenni inn tha am daat jown ring, Mma ningthlun na ktlo neenni kdo ngei chaak in.

¹⁰Mleija nen nkheng inna Khrista ki kekṭewl ku onna ava maiṭhuwmmi tkandan sap raan, mleija nen mii pum ktaiji mma mma nong tlot dil kṭoiji kṭha daat don kṭha kma daat don tarlaan chaak raan.

¹¹Ava leiji, pauṭhat ti neenni miirek kdo archil chaak in; pdainu neenna Isowr hin mhai tdet chaanda, ungta naanki kindit plung ruk va dei naandi kdingi kbin chaak inna.

¹²Neenni naan hin kdaksaan panpaak chmaan ring, pdainu plung ril kma, mduwn daatti miirek napal tlot naanni ado arthaan pchaan nraan, neenki mlei thu naan naarlin chaak nra akpii kchaan ping.

¹³Mleija neen kdaksa inna siir ki mkurthut bi, ava Isowr tum; neen kpoibin inni kindit mkurthut bi, ava naan atum.

¹⁴Mleija Khrista wonsatti mbowl inda, mleija mii mkheng tummi Miilai khatti diyou da; ava ngi mlei kurthuwk da, mii mkheng ngi kdiyou ki ntum in tphaak sap in.

¹⁵Ungta kring miirek ava mdaksaan ki tummi kring ava pme, mmaan tummi diyou da ungu kring kinle Mma tummi kring mkurthut nraan, Mma mii mkheng tummi kdiyou.

¹⁶Ava leiji, tunii ki kupṭhunni, dultimii dak dil kṭoiji ku khat lee mai kjat maan ring, dak dil kṭoiji nenni mpha khat thu Khrista mai kjat jown min, nenni Mma mai takjat kurnowl in ava pme.

¹⁷Ava leiji, ku mii khatti Khrista hin ma ambi, mma ava ren do seem kurthuwk kcha a, pliw ava kvei dokka, asuw in, ren ava kvei sliia.

¹⁸Hava mkheng nga Isowr hinki, nenna kring thu Mma ngi Mma tu kilṭhi ngi mi pipin pik inda, ungta kpipin pik nong ktlo rang ngi mi pii chaan da.

¹⁹Tditta dultimii mkheng nga Isowr ri Khrista thu mdaksaa ngi mi pipin pik chaanda, mmaan pnu ava Mma ngi bin kurnowl me, ungta kpipin pikki paumin ava nen nhin inni mi sil naan da.

²⁰Ava leiji nen nthu Isowr do thiik Khrista tummi pau kuhur thlit ava in pmin. Khrista kchang kdonni neenni aka ktham chaak inna, Isowr hin karpin dok in.

²¹Mleija Mma thu nenni Isowr ki rinkindit tkurthut nraan, pnu kdei cha kma Mma ava nen tummi pnu tpurthuw da.