Read Lamkang 2 KORINTHIA 6 Bible Online

2 KORINTHIA 6 - Lamkang bible

2 KORINTHIA 6

¹Mma tu kilṭhi ngi nong ktlo sap in pmin, naanni Isowr plungnee ava do ksi kma ado arlaan ma nraan neenni kthe kcha in ping.

²Mleija Isowr ri theda, “Mpha kcha kat thu Neiji aryaak pik ni kaan di, ungta kirliinna nitti Neiji abom ni kaan di.” Asuw in, tunva tarlaan chaak na ki mpha; asuw in, tunva kirliinna ki mpha kurthuwkka.

³Neen knong tlot in thung ngi kar mak kdo phaak ma nraan, ku mii khat lee tummi neenni sut pṭoi maan ring.

⁴Pdainu Isowr sra owr rek lulu ngi, neenni kdaksaan na mlam ktai thu kdo panpaak chaak in: kdung ngi kdiil dei cha thu, kja kparteel thu, nong kchil thu, kdung ngi knang cha thu,

⁵kchung karlaang thu, rowng inn thu, kut,lur thu, kpalren da nong ktlo thu, mik khut kahar thu, poitham thu;

⁶plung kseeng kdeiji kdiil dei cha, Pthla Kchiir thu, rinkindit wonsat thu,

⁷rinkindit pauvi, ungta Isowr rutan ni; khut lechang ngi rinkindit ki rawl dona tu kilṭhi ngi;

⁸mii do kjat leh mii do kjat nma thu, krai cha leh kpanpaak thu, plei knei lulu ngi mtlo inda, joso ava kindit;

⁹malpa lulu joso maidee hep daat; kdiyou lulu joso, kring daat in ping, mraal mikpii in lulu, joso me eayou inme;

¹⁰kja langlang lulu, joso mpha ktai thu kanpa kchaan ping; sra lulu joso kdung suwang in ping; do khat lee kthloi kma lulu, joso do khim khai kdo thloi chaak in.

¹¹Korinthia rek, naan hin neen knerra kparvang nga; neen kuplung nga kuprolla.

¹²Naanna neenni vai apchil chmaan ring, pdainu naan adaksaan wonsat adolo lei inni kchil kcha in pti.

¹³Akpinlet pik inni neiji kmo rek hin kpau kcha lulu ngi kpau kcha ping, aplung in ktuprol chaakka.

¹⁴Krin kma rekka plap kurthut ṭhi maan. Mleija rinkindit leh rinkindit kma mii ava tak heppi plap kurthuwk rang da? Mdit mata kleng leh kjiingnu ava tak heppi ka amve rang da?

¹⁵Tak heppi Khrista leh Dijabowlla kulrot nrang da? Mdit mata krin cha mii leh krin kma mii ava tak heppi khdaatti ka amve rang da?

¹⁶Isowr luwbuk Inn na khut do sak pthla tu tak heppi kulrot nrang da? Mleija nnenna kring Isowr luwbuk Inn ava pmin; Isowr do the lulu, “Neiji mmaan thu amda ungu mmaan arlakki tlowng nik di, ungta Neia mmaan ki Isowr kurthuwk nikdi, ungu mmaanna Nei kmii rek lam ra.

¹⁷Ava leiji Mukpu ngi the da, naan ni mmaan thungki thuwk dok inra, ungta asik inni am in, ungu ktobor do khat lee thowng maan, ava dil rongi Neiji akowl nikaan di.

¹⁸Ungta Neia naan ki Apah in nik di, ungu naanna Nei kchapa rek leh Nei kchanu rek naanndi, dida kapchaang riim Mukpu ngi theda.”