Read Lamkang 2 KORINTHIA 7 Bible Online

2 KORINTHIA 7 - Lamkang bible

2 KORINTHIA 7

¹Nei kwonsat lo rek, nenni hava paureel rek ta thloi lei inni, nenni ndaksaan leh pthla kbuwr khim khai partleu dok in chera, ungta ava kchang rang nga Isowr kṭi ngi kseeng deekki kinreel kurthuwk in che.

²Neen kihin aplung in mhai pvan pik chaan; neenni ku mii khat lee plaal maan ring, neenni ku khat lee ea krep maan ring, neenni ku khat lee kat na chmaan ring.

³Neiji naan raal akpii ngi hava the chmaang, mleija kdive kringve rangki naanna neen kuplung ril thuwnni ka am dok in pti dinu chodu ngi ahin thaan kdo the dok ksa.

⁴Neiji kdung plung krippi ado kbin psuk chaak in; kdung ngi naar ado kiplin psuk chaak in; neia plung kngammi kdim kcha ping. Kja kakham kdo parteel in mkheng thu neia kakanpat ti kdim kcha ping.

⁵Mleija neenni Masidonia tha kthlen in mpha thu, neen kdaksaa inna karnga chmaan ring pdainu muktong ktai thu kja parteel innu, mduwn tha rawl karnaak ṭhiinnu, mril thangva kṭi ngi ka am in ping.

⁶Pdainu ktuwl kcha rek plung ngam kpii Isowr ri Titas marvan leiji plung ngam mpii chaan da.

⁷Ungta mma arvan daat kma naan mlei thu mma plung ngam kpii plung ngam ava ngi nei klam ado sut in, kurnung karbaang inti a am in, ungu aplung in klut ava mma ngi song da, ava leiji kheel sii ngi neia kanpa kchaam ping.

⁸Mleija chethi thu neiji naan plung kankar nra kikjit dok kurthuwk daat joring, neiji kansiir chmaang, neiji kansiir mjoring, chethi ngi mpha mruk suwn thung daat joso aplung in kankar munra kdingi neiji kbin chaakka.

⁹Ava lulu ngi, kanpa kchaam ping, naan plung kankar lei pme; pdainu naanni plung ren ado hur nraan kingi plung kpur mkurthut leiji; naanni Isowr ktong tha plung ado pjat in, neen kihin, inni ajat akham in ava maang liit me.

¹⁰Mleija Isowr ktongki plung kja ngi plung ren kuhur amda ungu plung ren kuhur thu kirliing kcha tdit ma am leiji kansiir cha lua ame; pdainu plung kjava kdiyou mdo thuwṭhi.

¹¹Mleija asuw in, Isowr ktong ki plung kja ngi tija thu naanna karme chdaat in pti, ning kakraalli daksaa kartleu nuwm, tija thu plung kthi, tija thu kpiir, tija thu mlam krin, tija thu plung klut, tija thu mraal kpii mthuwṭhi daatta! Mpau lam khim khai thu parmak maan ring tdit adaksaan ni ado rot dok in.

¹²Ava leiji neiji kjit dok daat joring, karmak nong ktlo mii khat lei pme, pdainu neen ktummi naan plung klut ava Isowr dosut na thu naan hin mkandan nrang leiji neiji kdo kjit chaak.

¹³Ava leiji, neenna plung ngam kphaak chaak inna. Ungta neen kdaksaan ki plung ngam daat kma Titas mkanpat leiji neen ruk kheel sii ngi kanpa kchaan ping, mleija naan akheng inni mma poibin tparngat pik chaan tinu.

¹⁴Mleija neiji mma hin naan mlei thu napal ktlot bi, ava ngi neia ningkja pha chmaang; pdainu neenni naan hin mkindit do khim khai kdo the thut dok in, ava leiji Titas maiṭhuwmmi neenni napal kdo tlot in na mkindit kat.

¹⁵Ungta naan hintha mma va kheel sii ngi plung var da, akheng inni tithe kupṭoi akurthut in bin phaak chda, ungta kṭi leh kunchunni mma arlaang chaan tinu.

¹⁶Kheel sii ngi plung ado kbin psuk lei inni kdung kanpa kchaam ping.