Read Lamkang GALATIA 1 Bible Online

GALATIA 1 - Lamkang bible

GALATIA 1

¹Mii rek hinki kma, mii rek thungki kma, pdainu Jisu Khrista ungta kdiyou rek thungki kipring pinlet pik Mpah Isowr ki kenyee khat Poul li,

²ungu nei tu kilṭhi ku u knao rek, mkheng ngi Galatia ki Rinlop rek hintha:

³Nenki Npah in Isowr leh nenki Mukpu Jisu Khrista hinki plungnee leh kdaai naan thu amso.

⁴Nenki Npah Isowr poibin dil kṭoiji hava kum kṭha kma thungki mido ṭenthuw nraan, Mdaksaa ava nen pnu rek tummi mipii chaanda.

⁵Mma hin tha kṭuw knai liit kma ki laarnee ka am ekurthuwk so. Amen.

⁶Khrista plungnee thu naan aku own kchaan, Mma ava kuk notti ma pthi in thiin tinu, kṭha paumin msik khat lik lik thu plung ado pinlet lei inni neia kdung ngi kngak kchaam ping.

⁷Kṭha pauminna msik khat lik lik ava pme, pdainu mii angṭhe ngi naanna apunchul inda, ungu Khrista ki kṭha paumin msik khat mdo purthuw nuwm lei ngaal.

⁸Pdainu neenni naan hin kdo paryaam in kṭha paumin ava naan hin msik khat liklik kṭha paumin khat neen mdit mata parwaan ki waan tamsii ngi mparyaam bi, mma ava pauhur ksudu chra.

⁹Neenni chodu ngi kdo the dok in lulu ngi, tun ruk va neiji kthe chaak nowlla, ku mii khatti naanni ado arlaan dok in thungki msik khat liklik khat kṭha paumin mparyaam bi, mma pauhur kdu chra.

¹⁰Tunva neiji mii rek dosan ra kthlaam mo Isowr dosan ra kthlaam da? Mdit mata neiji miirek ning ktupthlun nuwmmo? Neiji miirek ning ktupthlun bi, neia Khrista sra owr khat kurthuwk nimaang.

¹¹Mleija ku u knao rek, neiji naan hin kdo paryaam kṭha paumin ava miilai ki kṭha paumin ava pme tdit aktip dee chaak inna.

¹²Mleija neiji miilai hinki kdo arlaan chaak pme, kdo purchu ruk ava pme, pdainu Jisu Khrista do pandan thungki kthleng.

¹³Mleija chodu ki Jihu- dia rek dhormo thungki, nei krinkhu ava ado aryaak dok in, mleija Isowr ava neiji tija thu suwk pthuwk nu, kdo ea kre nra tlonu;

¹⁴ungta nei kmii rek arlakki nei kaplap rek knempok pkheel nu neiji Jihudia rek dhormo kchet ping, nei kpah le nopa ava kheel sii ngi chang kdo ptlaak chaak.

¹⁵Pdainu neiji kṭou du liitti Mma ngi mhai pankai dok chda, ungta Mma plungnee thu mo own dok chda.

¹⁶Mleija neiji ktlok chati rek arlakki kdo paryaam chaak nra, nei kihin Mchapa mdo pandan rang nga mning thlungda, neiva daksaa leh hii tu pau saam chmaang.

¹⁷Mdit mata nei kdu ki kenyee rek kpha ra Jerusalem tha hang maang, pdainu neiji Arabia tha kunsunnu; ungu Damaskas tha kinle nowl ping.

¹⁸Audilli kum kdum diltha Sephas kvel ra Jerusalem tha hangnu, ungu nii sowm lei parnga kcheen ṭhinu.

¹⁹Pdainu Mukpu naopa Jeems kma donle neiji kenyee rek ku khat lee kurdut ṭhi chmaang.

²⁰Neiji naan hin kdo kjit chaak ava Isowr maiṭhuwmmi plei knei pmaang!

²¹Audilli neiji Syria leh Silisia paamkowl tha kchet cha ping.

²²Ungta Judia thungki Khrista Rinlop rekki neia mdei lamme.

²³“Mpha khat thu nen suwk mikupthuwk, mpha khat thu mma ngi mdo ea kre nuwm krin cha ava tunva mma ngi paryaam da,” dida karyaa mmaan daat ti theda.

²⁴Ungta neiji mlei kurthuwk nu mmaanni Isowr panpaak chlam da.