Read Lamkang GALATIA 2 Bible Online

GALATIA 2 - Lamkang bible

GALATIA 2

¹Au dilli kum sowm lei plii diltha Barnabas ṭhi nu Titas tu kilṭhi ngi Jerusalem tha kahang ping.

²Mdo tpandan pik dil kṭoiji neiji hang nu; ungta ktlok chati rek arlakki neiji kṭha paumin kdo paryaam ava, ber ksu rek hin neiji kensi tha song chnu. Nei knong nga chodu daat don mdit mata tun daat don do ksi kma ranng nga ngei chmaang.

³Pdainu nei kdo ṭhi Titas daat ruk, Grik mii khat kurthuwk daat joso namtrommi vunmor tipreen nu.

⁴Pdainu nen mido tbowl nraan, Jisu Khrista thu nenni tathloi chaak in nenki kintek ava tup prut siirchang ngi kindit kma nenki nu u nnao rek inni pau kloura lut lamda.

⁵Naan tummi kindit ki kṭha paumin kdo arkhiik nraan, mpha mruk rap klua neenva mmaan tingi lut maan ring.

⁶Ungta ber ksu rek heppi tbin in, mmaan ava ngi do tlo daat lam joso, nei kihinva arleek setti mkarthlei nra ame; Isowr va ksan ksui tlo me, mmaan hin neiji kthe chaakka, ber ksu rek va nei kihin do khat lee tpom lamme.

⁷Pdainu khat ktong thang nowl va, vunmor kreen kma rek hin mmaanni mdee in thungta, kṭha pauminna nei msil nlamda, ava vunmor kreen rek hin tha kṭha paumin tu kilṭhi ngi Pitor mdo sil naan hep daat.

⁸Mleija vunmor kreen rek hin Pitor ri kenyee nong mdo tlot lulu ngi, ktlok chati rek hin ruk va nei ktum rukka mtlot pik chda.

⁹Ungta plungnee nei kihinni mdo tpiik chaak avaa, ber ksu rek Jeems Sephas ungu Johon mmaan- ni mdee in thungta, plap mdo tkurthut ṭhi nraan, nei leh Bar- nabas kukhut in chang ktongki kjowng lamda. Mleija neenna ktlok chati rek arlak tha, ungta mmaanna vunmor kreen rek arlak tha kchet ra kulrot naan ping.

¹⁰Neenni sra miirek kdo bin paphaak raan kdingi kthe ngaal lam kurthuwkda, ava katta ning kakraalli nei kdo tlot nuwm ava.

¹¹Pdainu Sephas ava ngi Antia tha mthlen mpha thu, kindit chelli mma ngi mdo parma leiji, mmaiṭhuwm katti neiji kdo rai chaak.

¹²Mleija Jeems hinki mii rek mthlen dungi, mma ava ktlok chati rek tu maal dok lamda; pdainu mmaan mthlen in thung- ta, vunmor kreen rek lop kṭi kcha ngi, mdaksaa mthi nangi ktlok chati rek hinki kankai chda.

¹³Ungta mma tu kilṭhi ngi Jihu- dia mii rek angṭhe ruk va plung kṭi det dutti tlo lamda, ditta ava leiji Barnabas ruk va plung kṭi det dut ktong tha ṭhi dok lamda.

¹⁴Pdainu mmaanni kṭha paumin mkindit ktong tha setleng ring ngi mchema in ava neiji kdee thungta, mmaan mkheng mai- ṭhuwmmi neiji Sephas hin thenu, “Nang nga Jihudia miilai khat kurthuwkva, Jihudia mii khat am lulu ngi eam lo, ktlok chati miilai khat am lulu ngi a amma, tak heppi ktlok chati rek va Jihudia rek am lulungi ma am nraan apnam psuk lamma?”

¹⁵Nen ndaksaan ava nṭou daat inki Jihudia miirek kurthuwkki taṭou chaak in, ungta pnu ktong kcha ktlok chati rek lulua tkurthut in pme.

¹⁶Anto chdaat joso mii ava Nowlam ki nong mdo tlotti pindit pik me, pdainu Jisu Khrista mdo rin chaak thu. Khrista krin cha thu mido tpindit pik nraan, nenva Jisu Khrista trin chaak in, ungta Nowlam nong rek lei pme, mleija Nowlam nong rek va ku khat lee pindit pik me.

¹⁷Pdainu nnenna Khrista thu mi kpindit pik chaan mkurthut, nen ndaksaan ruk va pnu kirvei tdit nphaak chaak inbi, Khrista va pnu sok mlo mo? Anto liit pme!

¹⁸Pdainu neiji kdo pkui dok hava le ksak nowlbi, nei kdaksaa ngi karmak nong ktlo kat kurthuwk nik di.

¹⁹Mleija neiji Isowr hin kring cha kukur- thut nra, Nowlam leiji neia Nowlam thu kdiyou kcha ping.

²⁰Neia Khrista tu kilṭhi ngi khros leen kuk thoi ping; kring bing daat ava nei nowl pme pdainu nei kthung ngi ka am Khrista ava kurthuwk. Ungta daksaa kring nga tunki nei krinkhu ava, nei wonsat muklo ungu nei ktummi mdaksaa kpii kcha Isowr Chapa krin changi neia kring ping.

²¹Neiji Isowr plungnee pthlei chmaang; mleija Nowlam thu kpindit pik mkur- thut bi, Khrista diyo naki mlei amnime.