Read Lamkang GALATIA 4 Bible Online

GALATIA 4 - Lamkang bible

GALATIA 4

¹Neiji mcharuwl dinu kdo the naki mleija, mii ngi do mkheng ki kpupa kurthuwk chdaat joso, mma ngi nao kdowng mkurthut slii thungva, suwk khat ava hin mma ngi mṭhat bet nra ame.

²Pdainu Mpah ngi mnit mdo palreen mphaak du khim khai mma ava kseel rek leh plung mdo pnet bet rek tingi ka amlu.

³Ava leiji nen rukka kmo nkurthut in mpha thungva, dultipaam ki pthla rek do paalna suwk rek ava tkurthut in.

⁴Pdainu mdo pur- khumna ki mpha mthlen thungta, snu thung ngi kṭou kurthuwkki Nowlam tingi ṭou da, Isowr ri Mchapa ava hanto mi sii pik inda.

⁵tditta ava leiji nenni mchapa rek kurthuwk lulu ngi tarlaan chaak nraan, Nowlam kurdu ngi ka am rek ava ṭen pthuwk da.

⁶Ungta naanna mchapa rek akurthut lei inni, naan plung ril thu, Isowr ri Mchapa Pthla arju siida, “Abba, Apah!” dida ku owng kurthuwk.

⁷Ava leiji suwk khatti naanna Isowr thu am nowl maan ti, pdainu chapa khat, ungta chapa khat akurthut inbi, charuwl in pti.

⁸Chodu ngi naanni Isowr adee ma in mpha thungva, mukpu rek ktaak ki, rowng thu mdo bowl dokki ka am in pti.

⁹Pdainu tunva naanni Isowr dei inti, mata Isowr ri adei inda, tak heppi naanni ksowl leh do ksi kma pthla dopaal na hin kinle inti, avaki suwk rek akurthut raanna angei inmo?

¹⁰Naanni mnit mthla ungu mkum armik ado dan in!

¹¹Neiji naan tummi do ksi kma nong klo chaak mo dinu kṭit ta.

¹²Ku u knao rek, mleija neiji naan alulu kukurthut heppi, naan ruk va nei klulu akurthut nraan, aka ktham chaak inna. Naanni nei kihin kar mak tlo maanti;

¹³kdak kukoi chaak leiji, ru kri reeppi neiji kṭha paumin ava naan hin kdo paryaam chaak; tdit naanni adodee dok in.

¹⁴Ungta kdaksaa anto kukurthut leiji naan apkham chjown ringva naanni mraida mipthlei maanti, pdainu Jisu Khrista lulu ngi, Isowr waan tamsii khatti ado tarlaan chaak in.

¹⁵Hanto jaki akanpat inna tu ungda? Mleija neiji sakhi akuhur pik inna, ditta mkurthut de rangbi, naanni amik in khor pthii thida nei kihinni mhai kpii kchaan kro in pti.

¹⁶Au mkurthuttu mkindit kdo the leiji naan rawlmii kurthuwk nik mo?

¹⁷Mmaan va kdung ngi arda ado tup pro psuk in, pdainu kṭha lei pme; naanni mmaan arda ado pro psuk nraan; mmaanni mdo ṭhen nuwm in.

¹⁸Mleija neiji naan aka am ṭhiin mpha thung daat kma, mpha ktai thu kṭha mlei thung ngi arda kpulro ava ngi kṭha.

¹⁹Nei kwonsat lo knaole, naan thung ngi Khrista arling ma am du khim khai neia nao kuplu rang ngi kdung kṭou lulu ngi naan tum- mi kja chnowl imping.

²⁰Tunva neiji naan aju amṭhiinda ungta kukrowl kdo parthlen rang daat neiji kngei chaakka, mleija neia naan mlei thu kuplung kjiing reenna.

²¹Nei kihin mhai the pik chaan, Nowlam kurdu ngi ka am nuwm naan va Nowlam aryaa maan timo?

²²Mleija Abraham mi suwk nuh khat leh kintek nuh khat thungki chapa rek knii thloida dida mdo kjit dok.

²³Pdainu suwknu chapa ava daksaa dil kṭoiji ṭouda, kinteknu chapa ava paureel dil kṭoiji ṭouda.

²⁴Tunva pau purtol khatta hava; Snu hava rekka paurina knii rek lam. Sinai lownki suwk owr khatta Hagar nao pluk.

²⁵Tunva Arabia thungki Sinai lown na Hagar, mma ngi tun tunki Jerusalem mdo arthaan pik, mleija mma ava mnaole tu kilṭhi ngi suwk owr lam.

²⁶Pdainu Jerusalem khuwluw ava kintek chanu, mleija mma nenki nnuh in.

²⁷Mleija Laaika thu hanto kjit dok da, O nao kuhur kma khat, kdongnu; kanpa cha; nao kuplu ki kdung ksaan kparteel kma nang ngi owng ra kanpa cha; mleija sangtlaakki ka am naole ava ngi, mi innpu tu karnai thlit da ka am naole ava mdo pkheel.

²⁸Tunva ku u knao rek, Isek lulu ngi nenna paureel ki naole in pmin.

²⁹Pdainu mpha authu dak dil kṭoiji kṭou mma ngi Pthla dil kṭoiji kṭou mma ava suwk mdo pthuw lulu ngi, tun rukva anto lu kthuwk ra.

³⁰Pdainu Kchiir Laaika va talu mthe? “Suwknuh leh mchapa ava arei pthi; mleija suwknuh chapa ngi kinteknuh chapa tu alrou mdo phaak ve rang nga rome.”

³¹Ava leiji ku u knao rek, nnenna suwknuh naole pmin me, pdainu kinteknuh naole in pmin.