Read Lamkang GALATIA 5 Bible Online

GALATIA 5 - Lamkang bible

GALATIA 5

¹Mleija kintek rangki Khrista ngi mi pintek inda; ava leiji rip mer chaan, ungta suwk owrki bowr krik thung ngi lut nowl maan.

²Tunva Poul neiji ahin thaanni kthe chaakka, mleija vunmor kreen ava arlaan dok inbi, naan tumva Khrista do khat lee pme.

³Vunmor kreen cha mii pum ktai hin neiji sakhi kpiik chaakka, ditta Nowlam mkheng karkhii rangki mma ava mbowl dokka.

⁴Nowlam do pindit naanna Khrista hinki kdet kchaan pti; naanna plungnee thungki ktluw kcha in pti.

⁵Mleija krin chaki Pthla thu nenni rinkindit ti bin psuk in minnu tardat chaak in.

⁶Mleija Jisu Khrista thungva vunmor kreen ruk mdit mata vunmor kreen kma ruk do khat lee sime, pdainu wonsat thu krin cha nong ktlo ava daat.

⁷Naanni kṭha deekki atlot inna! Kindit dil kṭoira ava ku ngi at mat inda? Tak heppi atap- khaan inda?

⁸Hava ktlo ava naan aku own kchaan Mma hinki pme.

⁹Thowlpen mruk suwnni thowlpen knempok mdo pduwt.

¹⁰Mleija naanni nei mhai pkheel da ktlok mii hin poi reel psuk nimaan ti, kdingi neiji Mukpu hin knetti kbin chaakka; ungta ku ku kurthuwk daat joso, naan ning akpumul inna kekṭewl ra.

¹¹Pdainu ku u knao rek, neiji vunmor kreen ava kparyaam thlit daattu, talu leiji neia suwk ado tupthuw chaak inda? Ava mlei thung ngi khros ki khusiir tparthit na mlo pthiia.

¹²Naan plung pur nra nong ktlo miirek ava mdaksaa mthina inni karchak chlamso.

¹³Mleija ku u knao rek, naanna kintek rang lei ado tu own dok in; naanki kintek ava daksaa tum mdit mata kcha knee thung daatti sinton maan, pdainu won- sat thu khat leh khat sra owr kurthuwk in.

¹⁴Mleija Nowlam mkheng nga pauna khdaat thu kurkhum dok, “Nah adaksaa lulu aveen wonsat alo cha.”

¹⁵Pdainu naanni khat leh khat kparkei da akarchaak inbi, khat leh khat atluk ma nraan cheek asin chaan.

¹⁶Pdainu neiji naan hin kthea, Pthla ngi echet chaan, ungta dak- saa poibin ning pthlung maan.

¹⁷Mleija daksaa poi binna Pthla kipteng, ungu Pthla poi binna daksaa kipteng; mleija naan do tlot nuwm kapkhaan ra, hava lea khat leh khat kulrot nlam ava pme.

¹⁸Pdainu naanna Pthla ngi ati ṭhiinbi, Nowlam tingi am maan ti.

¹⁹Tunva daksaa ki nong rek mpandanna: Nala tartlaang kturkui, kbuwr, pang turkuiji kturkui,

²⁰khut do sak pthla luwkbuk, haimeeng kthloi, khat leh khat karhal, kthe purduk, kheithe, plungthit, kpunmun, ksinchaak, mii kipjiir kṭhen,

²¹changtlaak, ju kip pri, lop loppi ju knee, ungta hava lu mkheng kurthuwk. Chodu ngi neiji ahin thaanni pau kdo kham lulu ngi, pau kakham chaakka, mleija hanto lu nong ktlo mii ava ngi Isowr Kruwngpaam thlung chip pchaang nime.

²²Pdainu Pthla ki thei ava wonsat, kanpa, kdaai, kdiil dei, plung knei, kṭha, lamtrin chaak kurhui,

²³plung kparneem, dak- saa kurjowng, hava le kro kma Nowlam ame.

²⁴Ungta Jisu Khrista ktongki miirek ava ngi mdaksaa do pjor ungu plungbin tu kilṭhi ngi khros leen kukthoi.

²⁵Nenni Pthla ktong tha kring nkurthut inta, Pthla ktong tha tche ruk chet in che.

²⁶Nenni daksaa kpohok, khat leh khat plung kparthit, khat leh khat khei karthe nmaan che.