Read Lamkang GALATIA 6 Bible Online

GALATIA 6 - Lamkang bible

GALATIA 6

¹Ku u knao rek, nong kpar mak ku mii khat akjown inta, Pthla ktongki kurthuwk naandi, plung kparneemmi apindit pik chaan. Naan ruk ado tipthleem ma nraan, cheek asin chaan.

²Khat leh khat bowr krik kurhur pik in, ungta ava ngi Khrista Nowlam kpurkhum ra.

³Mleija do ksi liit kma ku mii khatti mdaksaa ava do ksi dok heppi mkarbin bi, mdaksaa mthina ngi kurhuwng kcha a.

⁴Pdainu mii pum ktaiji mma mma ki nong kpirsin na chso; ungta ava dilli napal mkurtlot naki mlei ava mdaksaa mthina ki hehe daat kurthuwk ra ungu mveen leiki nime.

⁵Mleija mii pum ktaiji mma mma ki bowr kri kuhur kcha kurthuwk ra.

⁶Pauna kpurchuk mii va mdo purchu mii ava tu kilṭhi ngi mdo thloi chaak ava athem ve lamso.

⁷Kirsin chaak maan; Isowr kip pni chaak rome, mleija mii ava ngi chii mdo var dil kṭoiji, ava kat kurkun chra.

⁸Mleija mma mdaksaa kat thu mdo var, mma mdaksaa kat thungki kṭop ava kurkun chra; pdainu Pthla hin kvar cha miiva Pthla thungki kṭuw knai kma rinkhu kpurkuk chra.

⁹Ungta kṭha nong ktlo thu nenni arda pthit maan che, mleija nenni plung nparheel liit maanbi, mpha kat ava thu nenni turkun chaak raan.

¹⁰Ava mkurthut bi, nenni mpha kcha nphaak in thu, mii mkheng hin nenni kṭha nong tlo inche, ungta karkheel sii ngi krin cha rek phungka rek hin kṭha nong nga tlo in che.

¹¹Asuw in, neiji naan hin ku khut katti chethi klinni kikjit chaakka.

¹²Daksaa thu kṭha ngi ktidet ra kngei rek ki vunmor ado reen nraan ado tapnam psuk in. Khrista khros leiji suwk thuw mdo phaak ma nraanki lei ngaal.

¹³Mleija vunmor kreen karlaang dok rek daat rap kluva, mmaan mdaksaan ni Nowlamma arkhii lamme, pdainu mmaanni naan adaksaan thu laarnee mdo phaak chaak nuwm lei inni, vunmor ado tipreen nuwm in.

¹⁴Pdainu nenki Mukpu Jisu Khrista ki khros kma donle laarnee ava nei kihin ki lam karlat chdaat so, ava leiji dultipaam ma nei kihin tha, neiji dultipaam ktong tha khros leen kukthoi.

¹⁵Mleija vunmor kreen ruk mdit mata vunmor kreen kma daat ruk do msit na ava pme, pdainu ren khatti mdo pṭhan.

¹⁶Hava nopa ngi kchet mii mkheng tun, Isowr mii Isreel rek tun kdaai leh wonsat am so.

¹⁷Mṭut na tha ku mii khat lee ngi kning pmul mso; mleija neia kdaksaa tun Jisu ki kbii nam kdo hur dok.

¹⁸Ku u knao rek, nenki Mukpu Jisu Khrista ki plungnee ngi naanki Pthla aju thlop chaan so. Amen