Read Lamkang EPHISIA 2 Bible Online

EPHISIA 2 - Lamkang bible

EPHISIA 2

¹Ungta naanki pnu nong thungki leh pnu rek thu adiyo in mpha thu, Mma ngi apring chaanda.

²Hava dultipaam ki kṭha kma dil ṭoi intinu mpha khat thu naanni kchet in pti, parwaan kurdu ki rutan ava dil ṭoi in tinu, pau kleek chapa rek thu tun tunni Pthla ngi nong mtlot sliia.

³Hava mkheng arlakki mpha khat thu nenni daksaa do pjor dil kṭoiji ka am in pmin, daksaa leh poi bin thu ṭoi in minnu, ungta dultimii murson rek lulu ngi nen rukka nopa plung thit ava naole in pmin.

⁴Pdainu Isowr wonsatti dim chda, mwonsat klin langlang thungki ngi nenna wonsat milo chaanda,

⁵nenki pnu tonni ndiyo in mpha thu, Khrista tu kilṭhi ngi kring ve in min. (Plungnee ngi naanna ado taktlan chaak dok in kurthuwk.)

⁶Ungta Mma tu kilṭhi ngi mipring pinle chaanda, ungu Jisu Khrista tu kilṭhi ngi parwaan ki mun rek thu Mma tu kilṭhi mi pkong chaanda.

⁷Mleija Jisu Khrista thu tpartee pchaan liit ma nen nhin ni muplungnee ki wonsat suwang ava karvang rangki kum thu mido tdet chaak nraan ki.

⁸Mleija plungnee ngi krin cha thu aju ktlan chaanda; ungu hava naan adaksaan kat do tlot ava pme, pdainu Isowr chla,

⁹ungta ku mii khat lee ngi napal mdo tlot ma nra, nong rek lei pme.

¹⁰Mleija mdu ngi Isowr dopurchuwl dok kṭha nong rek thu nenni tche chaak nraan, Jisu Khrista thu mdo seem dok Mma nonglo rek in pmin.

¹¹Ava leiji, abin phaak chaan, mleija choduva naanna ktlok chati rek khat kurthuwkki daksaa thu khut do seem vunmor kreen mdo dit rekki vunmor kreen kma rek kdingi ado tu own in.

¹²Mpha ava thu naanna Khrista hinki ado tiṭhen dok in, Isreel mii rek thungki paam ktlokki mii rek in pti, ungta paureel ki paurina rek thungki malli ka am in pti, plung ngi mdo bin psuk chaak ktaak, ungu dultipaam thu mukpu rek ktaakki a am in ava abin phaak in.

¹³Pdainu tunva mpha khat thu Jisu Khrista hinki lamkla ngi ka am cha naan ava Khrista hii hinni ado tapnai chaak in.

¹⁴Mleija Mma ngi Jihudia ungu ktlok chati tdit knii ki kdaai ava khdaat tpurthuw da, ungta karhal cha kṭhen ki bang ava pkui pthiida.

¹⁵Mma mdaksaa thu paureen ki Nowlam leh nonaat rek ava eakrep pthiida, mleija Mma mdaksaa thu miilai knii ava ren khdaatti seem da, hanto kdaai mi purthuw pik chaan da.

¹⁶Ungta khros thu knii ava Isowr ri daksaa khdaat mdo tpurthut nra, karhal chaki ava mdonna tpurthut pthiida.

¹⁷Ungta Mma ngi thlengda lamkla ngi ka am naan leh lamknai ji ka am hin kdaai paryaam da.

¹⁸Mleija Mma thu nen nikniing inni Pthla khdaatti Npah in kpha kcha tkurthut in.

¹⁹Ava mkurthut bi, naanna mal rek leh paam ktlokki mii rekki am kurnowl maan ti, pdainu naanna kintiing rek tu kilṭhi ngi npaam inki miirek leh Isowr plung kat thungki mii tkurthut chaak in.

²⁰Jisu Khrista mdaksaa arkil ki lung kurthuwkki naanna kenyee rek leh khulpu rek do pṭhan dok tun ni mdo sak avaan pti.

²¹Mma thung ngi mkheng nga jom purdut da ungu Mukpu hin kchiir luwbuk Inn khatti mdo sak dok.

²²Mma thu naan rukka Pthla ngi Isowr am nrangki munra ado ta sak dok in.