Read Lamkang EPHISIA 3 Bible Online

EPHISIA 3 - Lamkang bible

EPHISIA 3

¹Hava ngi mlei kurthuwk da, ktlok chati rek naan kchang rang ngi, Jisu Khrista tummi rowng inn thu mdo khum Poul neiji,

²naan tumra nei kihin mdo tpiik chaak Isowr plungnee ki kvailo ava naanni aryaa mun naan di.

³Tak heppi kukthuk pau ava nei kihin mhai tpandan pik tdit ktoi tekki neiji kikjit chaakka.

⁴Naanni hava apat inki mpha thu, Khrista ki kukthuk pau nei kdo dee pandit chaak ava naanni dei naan di.

⁵Miirek chapa rek leh murson ki charuwl rek hin mdo tdet ma ava Pthla ngi kchiir kenyee rek leh khulpu rek hin tunva mpandan na.

⁶Tditta ktlok chati rekki Jihudia rek tu mtum in phowl kṭha ava kinṭim sappi arlaang chlam da, ungta kṭha paumin ava ngi Jisu Khrista thu paureel karlaan ṭhi sap rek kurthuwk lamda.

⁷Mma rutan ki nong ktlo ngi nei kihin mdo tpiik chaak Isowr plungnee ki chla dil kṭoiji neia hava kṭha paumin ki nong ktlo cha khat ping.

⁸Kintiing rek mkheng thungki kdilsuwn kcha kurthuwk daat joring, hava plungnee ava mhai pii chda, tathlaam pchaan liit ma Khrista ki suwang thuw ava ktlok chati rek hin kparyaam ra, nei kihin ni mpii chda.

⁹Ungta do mkheng kapṭhang dok kum roi ksotti Isowr thu kurdowl daat Mma ki kukthuk pau ava dultimii mkheng hin tpandang da.

¹⁰Parwaan ki mun rek thu ka am rutan kpu rek leh ruktang rekki kheel sii ki Isowr lousing ava Rinlop thung ngi ktidet ra.

¹¹Hava nenki Mukpu Jisu Khrista thu kṭuw knai liit kma Mma plungbin dil kṭoi.

¹²Nenni Mma lamkrin cha thu plung ktangar leh kheel sii ki plung krip ta thloi chaak in.

¹³Mleija naan tummi neiji kja kakham kdo parteel leiji, naanni plung ado parheel ma nraan, neiji aka ktham chaak inna, ava naanki laarnee.

¹⁴Hava leiji Kpah maiṭhuwm mi neiji pkhuppi tardiil nu,

¹⁵parwaan leh dulti ki phungka khim khaiji Mma do thowl pik kindit miing mdo arlaan chaak.

¹⁶Mleija miilai ril thu Mma pthla ngi laarnee ki suwang thuw ngi ru ado taptan pik nraan ki,

¹⁷ungta naan plung ril thu krin cha ma am nra; ditta naanni murjung thloida wonsat thu knetti a am nraan,

¹⁸ava ki mkam leh mdung ungu kchuwng leh kukthuk ava talu tdit kintiing rek mkheng tu kilṭhi ngi kdei pandi ki rutan ado thloi chaak nraan ki.

¹⁹Ungta karkheel li kdeipandi ngi Khrista ado dee nraan, mleija naanna Isowr ki nopa ngi pum dim kdim akurthut nraan ki lei.

²⁰Tunva nen nthung ngi Mma rutanni nong mdo tlot leiji, neen kdo ṭhil chaak in mdit mata kdo bin chaak in mkheng kheel dekki ktlo pchaang ra Mma hin tha,

²¹mpha ktai thu Rinlop thung leh Jisu Khrista thu kṭuw knai liit kma Isowr kpanpaak cha kurthuwk so! Amen.