Read Lamkang EPHISIA 4 Bible Online

EPHISIA 4 - Lamkang bible

EPHISIA 4

¹Ava leiji, Mukpu tummi rowng inn thu mdo khum dok neiji Mma do own dok thu rinkhu kurhui khatti ache nraan aka ktham chaak inna.

²Plung kdowng leh plung kparneem mkheng tu kdiil dei tu kilṭhi ngi khat leh khat kar khaang dei in.

³Kdaai dobowl Pthla ktongki plung kinṭim ava ngi ning kakraal li mhai tlot pik chaan.

⁴Plung bin khdaat thu naan ado tu own in ava lulu ngi daksaa khat,

⁵ungu Pthla khat, Mukpu khat, krin cha khat, baptis ktlo khat ka am,

⁶Isowr khat ungta nen nkheng tun ungu mkheng thu ka am Npah in ava ka am.

⁷Pdainu nen mii pum ktai hin Khrista ki chla ava mdo partee na dil kṭoiji plungnee mipii chaan da.

⁸Ava leiji, Laaika ngi theda, “Mma ngi mhunkal mpha thu suwk rek knempok ṭhi da, ungta Mma ngi mii rek hin chla rek pii chda.”

⁹“Mma ava hungkakal dok,” mdo dit ava tak mdo the nada? Pdainu Mma rukka ti knung rel dulti thu arjung ṭum memo?

¹⁰Arjung kṭum Mma ngi do mkheng ktipdim rang ki parwaan mkheng tun thang ruk va hung kakal.

¹¹Ungta Mma chla rekka angṭhe ngi kenyee rek, angṭhe ngi khulpu rek, angṭhe ngi paumin ksira, ungu angṭhe hin pastor rek leh chukpu rek pii chlam da.

¹²Mleija Khrista ki daksaa mdo punchoi nra, kintiing rekki mnong tlot naan thu, arda krok mkurthut nraan,

¹³nen nkheng in hin krin cha thu plung kinṭim, ungu Isowr Chapa dei chda, plung kurchuwl miilaiji, kparthaang sii ngi Khrista ki arling tphaak chaak nraan ki.

¹⁴Ava leiji plei knei miirek do jomphunni lele tha mi huwn chaak naanda, kindit kma pauvi paurin tirthli khim khai mdo juwn ṭhi kmorek lulu nenna tkurthut kurnowl in pme.

¹⁵Ava kchang nga wonsat thu kindit pau theen minnu, mluw kurthuwk Khrista hin tha mlam khim khai thu tilin tsaan raan.

¹⁶Mma hinki daksaa mkheng nga jomda, ungu mdo purdon tu kilṭhi ngi mkurdut na khim khai tri purdut da, msing khim khaiji nong kṭha ngi mtlot mpha thu, daksaa ngi linsaang don, ungta wonsat thu kpunchoi ra.

¹⁷Tunva neiji Mukpu hin sakhi pii nu hava kthe chaakka, ditta ktlok chati rekki muplung bin in ava do ksi kmatha ma am in lulu ngi naanna am kurnowl maan.

¹⁸Mmaanna mdodee pandit nraan thungki jiing chda, muplung ril mapchai reen leiji dei pandi lam mda Isowr rinkhu thungki ktliing chlamma.

¹⁹Muplung ril in pchai reenda, mdaksaan na kṭha kma nong ktlo thu karpii lamda, ktobor nong ktlo khim khai thu hangmal lamma.

²⁰Naanni Khrista mlei thu akurchu inna hanto pme!

²¹Naanni Mma mlei thu aryaa kat inti, ungta Jisu thung ngi mkindit ka am lulu ngi Mma ado purchu chaak in.

²²Chodu ngi naanki nopa thu ka am kuhuwng kcha ngi aṭhat nma in rinkhu pliw ava ama pthii dok in.

²³Ungu naan plungbin ki kṭha ava ngi ren apurthuw chaanra,

²⁴Isowr lulu ngi kindit ki rinkindit ungta nopa kchiir ren ava ahiil anaa chaan.

²⁵Ava leiji, plei knei ama pthiin, mii pum ktaiji mveen tu kindit pau athe so, mleija nen khat leh khat ava daksaa khdaat in pmin.

²⁶Plung kthira, pdainu pnu tla maan; plung apthit slii arlaan inni kniw ptla maan,

²⁷ungu dijabowl hinni mun pii maan.

²⁸kup pru miiva pru kurnowl mso, pdainu ava kchang nga mkhut ti kṭha nong atlo so, mleija mma ngi kikriing miirek hinni kpurdon pik kap pchaang ra.

²⁹Naan ner thungki kṭhakma pau thuwk mso, pdainu karyaa kcha miirek hin plung mdo pnee pik nra kpurdon pik mkurthut nra kṭha pau thuwk so.

³⁰Ungta Isowr Pthla Kchiir ava pja maan, ado tiṭen thuw naanki nit thu kbii nam ado tnam dok in.

³¹Kakha ungta plungthit ungu plung kthi, ungta ku owng, titi ktadah mkheng ungu khusiir parthit na ava tlo maan.

³²Ungta khat leh khat wonsat kurlo in, plung kparneem mi Isowr ri Khrista thu naan ado tuptlot pik in heppi, khat leh khat kpurtlot pik in.