Read Lamkang EPHISIA 5 Bible Online

EPHISIA 5 - Lamkang bible

EPHISIA 5

¹Ava leiji, mwonsat lo kmo rek heppi, Isowr no apṭoi in.

²Ungta Khrista ngi wonsat milo chaanda, ungu mikrim kdi langlang tlaai kdown ni Isowr hin tha mdaksaa mido tpiik pik in lulu ngi, wonsat thu chet in.

³Pdainu naan arlakki kintiing rek mkurhui in heppi, nala tartlaang kturkui leh kbuwr mdit mata hangmal mkheng mmiing daat rap klua the maan.

⁴Ktobor nong ktlo do ksi kma pau, mdit mata songkho pau kthe ava tlo maan, pdainu ava kchang rang nga apanpaak in.

⁵Hava adodee kat raan, ditta nala tartlaang kturkui, kbuwr miilai, mdit mata hangmal ku mii khat (Tditta ava khut do sak pthla luwkbuk mdo thena) ava ngi Khrista leh Isowr Kruwngpaam thlung chip pchaang nime.

⁶Ku mii khat lee ngi naanna do ksi kma pauvi ahuwng chmaan so, mleija havale leiji pau kleek chapa rek tun Isowr plung thit kthlung ra.

⁷Ava leiji, mmaan tu kurhou maan.

⁸Mleija mpha khat thu naan na kjiing thu ka am in pti, pdainu tunva Mukpu hin mar awng kurthuwk in pti; mar awng ki kmo rek lulu ngi chet in.

⁹Mleija mar awngki thei ava mkheng thu kṭha ungu mkindit ungta kindit deek.

¹⁰Mukpu ningthlun na ava talu tdit akurchu chaak nraan atlo in.

¹¹Thei kchui kma kjiingnu nong tlot ṭhi maan, pdainu ava kchang nga kvaar tha athuw ṭhiin.

¹²Mleija mmaanni tup prut nong mdo tlot in rap klua, tithe rang nga ning kjana a.

¹³Pdainu mar awng ngi do khat mdo pandan ava kandang dok, mleija do kpandang ava mar awng.

¹⁴Ava leiji Laaika thu theda, “O ki iip dok, kardel, ungta kdiyou dok thung ki kardel, ungu Khrista ngi mar awng aju kiplen pik chra.”

¹⁵Anto mkurthut bi ksing kma rek hep daat kma pdainu ksing lulu ngi naanni tak heppi kchet in ping kdingi kṭha ngi kursuw chaan.

¹⁶Mnit rek mṭhat ma leiji mpha ava kṭha ngi asin ton chaan.

¹⁷Ava leiji aak maan, pdainu Mukpu plung binna talu kdingi adei pandi chaan.

¹⁸Ungta ju pri maan, mleija ava plung krip pme; pdainu Pthla ngi dim chaan.

¹⁹Khat leh khat ava Isowr laa leh kpanpaak laa ungu Pthla ktongki laa kthe ngi plungril mkheng tu kilṭhi ngi Mukpu hin kanpa ngi athe in.

²⁰Mlei khim khai thu nenki Mukpu Jisu Khrista miing ngi Npah in Isowr hin tha mpha ktai thu apanpaak chaan.

²¹Khrista kṭi ngi khat leh khat kurdu ngi am in.

²²Numei rek, Mukpu hinki heppi naanki a innpu in kurdu ngi am in.

²³Mleija Khrista ruk va mdaksaa katti, daksaa kṭenthuw pik Rinlop ki mluw mkurthut heppi, innpu ava numei ki luw.

²⁴Rinlop pi Khrista kurdu ngi ma am lulu ngi, numei rek va mmaan ki mi innpu in kurdu ngi do khim khai thu am so.

²⁵Innpu rek, Khirsta ngi Rinlop wonsat loda, ungu mtumra mdaksaa mdo piik chaak lulu ngi, anumei inna wonsat adolo raan.

²⁶Tditta mpanchel deek nra pauna tu kilṭhi ngi dii thu alṭhu da mdo partleu dok.

²⁷Mleija Mma daksaa thu Rinlop ava mrungchen kṭha, kbii ktaak, mdit mata ktivii ktaak, mata do khat lee ktaakki, mma ava Kchiir ungu karmak ktaak liitti mdo piik chaak nrang lei.

²⁸Anto lulu ngi innpu rek ruk va mmaan mdaksaan kat heppi mnumei inna wonsat aloso. Mnumei wonsat klo kcha ava mdaksaa wonsat klo.

²⁹Mleija ku mii khat lee ngi mdaksaa pder chme, pdainu pmaal da tuk mdo sut loi, Khrista ruk va Rinlop pa anto mdo tlot.

³⁰Mleija nenna Mma daksaa ki msing khat in pmin.

³¹“Hava leiji pselpa ngi mpah leh mnuh ma thi donle, mnumei tu ka amve ra, ungta knii ava daksaa khdaatti ka amra.”

³²Hava pauril la kukthuk khat, ungu neiji Khrista leh Rinlop mlei thu kthe cha ping.

³³Anto kurthuwk daat joso, naan mii pum ktaiji adaksaan lulu ngi anumei in wonsat alo in, ungu mnumei ruk va mi innpu mdo kjat ra ava mdo deera.