Read Lamkang EPHISIA 6 Bible Online

EPHISIA 6 - Lamkang bible

EPHISIA 6

¹Kmo rek, Mukpu dil kṭoiji anuh apah in pauthe apṭoi in, mleija hava kindit.

²“Apah leh anuh akjat chaan,” paureel khat tu kilṭhi ngi ru kri reep ki paureen na hava:

³mleija naan aṭhat nraan, ungta dultipaam thu roi ksot betti arin chaak nraan leiki.

⁴Mpahle anaole plung mthit nra dai maan, pdainu Mukpu do archakki kthe kupṭoiji mhai juw pik chaan.

⁵Suwk rek, Khrista hin ado tlot in heppi, kṭi leh kunchunni, plung krip pi, dultipaam ki naanki kpu rek pauthe apṭoi in.

⁶Miirek ningthlun nra ktlo lulu ngi, mik sut daat kira nong tlo maan, pdainu Khrista ki sra owr rek lulu ngi, plungril mkheng tu Isowr poibin ava atlo in.

⁷Mii rek hin kma pdainu Mukpu hin nong ktlo lulu ngi, kdung ado tlot nuwm intu kilṭhi ngi nong thu aplung in aplut chaan.

⁸Mma ngi suwk owr kurthuwk chdaat joso mdit mata kintek kurthuwk daat joso, ku mii khat ti kṭha nong mdo tlot ava, Mukpu hinki ava kat karlaang chra tdit adei in.

⁹Kpu rek, mmaan hin rukva anto lu atlot pik in ungu kipṭit ama dok in, naan leh mmaan mikniing ki Kpupa ava parwaan tha ka am, ungta Mma hin thangva ksan ksui ame.

¹⁰Mṭut na rel tha, Mukpu ngi Mma hinki ruktang ava ngi ru aju ptan pik chaan so.

¹¹Tditta dijabowl rip khaan da, rawl ado kurduk ṭhi pchaan nraan, Isowr ki rawlphow mkheng ngi kirsim in.

¹²Mleija nenni daksaa leh hii ptengda rawl tkurduk ṭhiin pme, pdainu tun knungki paam kpurek ptengda, rutan rek ptengda, hava kjiingnu thungki dultipaam ki paam kpu rek ptengda, parwaan ki mun rek thungki Pthla ktongki kṭha kma luwngrek kipteng ava in pmin.

¹³Ava leiji, naanni kṭhakma nit thu ari pchaan nraan, ungta mkheng kirsim dokki ari nraan, Isowr ki rawlphow mkheng alou in.

¹⁴Ava leiji, kindit tu kilṭhi ngi arkowl in suwlpaar kparyeel inra, ungu rinkindit ki plung arkuw kpurlot da,

¹⁵ungta kdaai ki kṭha paumin kurchuwl li akhu tun inni anaa in.

¹⁶Hava mkheng tu kilṭhi ngi krin cha rawl dona alou inra, kṭhakma khat ki mei kṭuwng mkheng nga archu you pthiin.

¹⁷Ungu kirliing ki rawl luwkhum, ungta Isowr pauna, Pthla ki kaang ksaang alou chaan.

¹⁸Kṭhil cha leh karpii kcha mkheng tu kilṭhi ngi, Pthla ngi mpha ktai thu aṭhil chaan. Mṭut na kpha dekki kdown liit kma kintiing rek mkheng tummi kṭhil pik thu mik khut mhai har pik chaan.

¹⁹Ungta nei ktum rukka kṭha paumin ki kuk thuk pau ava plung ktangarri owngda kdo paryaam chaak nra mhai ṭhil pik chaan.

²⁰Mleija ava leiji neia thiir ri do bowl li pau kuhur cha mii ava ping, tditta neiji kdo the rang kat ava plung ktangar ri kdo the chaak nra, mhai ṭhil pik chaan.

²¹Tunva naan rukva neia tak heppi amnu, talu ktlotta tdit ado dee nraan, Mukpu hin trin chaak nong ktlo ungu nei kwonsat lo ku u knao Tikhikas ava ngi nei ki mlei khim khaija akson pik chraan.

²²Hava nong lei kat tummi neiji mma ava naan hin ksii chaakka, mleija neenna tak heppi ka am in ping tdit ado dee nraan, ungta naan plungril mma ngi akukso pik chraan.

²³Ku u knao rek, naan hin tha, Kpah Isowr leh Mukpu Jisu Khrista hinki kdaai ungu ado rin chaak in tu kilṭhi ngi wonsat am so.

²⁴Kdiyou liit kma ki wonsat ava ngi nenki Mukpu Jisu Khrista wonsat klo kcha mii mkheng nga plungnee ngi aju ṭhi chaan so.