Read Lamkang PHILIPPIA 1 Bible Online

PHILIPPIA 1 - Lamkang bible

PHILIPPIA 1

¹Jisu Khrista ki sra owr rek Poul leh Timothi ngi, ber ksu rek leh dikan rek tu kilṭhi ngi, Philippia tha ka am Khrista ki kintiing rek mkheng hin tha:

²nenki Npah in Isowr leh Mukpu Jisu Khrista hinki plungnee leh kdaai naan thu am so.

³Neiji naan akbin phaak in mpha thu, mkheng thung ngi neiji Isowr kpanpaak chaakka.

⁴Neiji kṭhil chaak mpha ktai thu, kanpa tu kilṭhi ngi naan akheng in tummi kdo ṭhil chaak.

⁵Ru kri reeppi snii kpha thu kṭha paumin tummi plap ado tkurthut ṭhiin leiji kanpa kchaam ping.

⁶Ungta hava anto kat ra ditta naan thung ngi kṭha nong kupṭhun Mma ngi Jisu Khrista nit kpha thu ava kup ṭuw ra.

⁷Naan akheng in mlei thu neiji kdo bin chaakki mlei ava naanna nei kuplung thu ado kurpom chaak mer in, mleija neia rowng inn thu mtukhum lam thu ungu kṭha paumin kthe loi leh ktipnet thu, naan akheng inna nei tu kilṭhi ngi plungnee kpha sap tkurthut in.

⁸Mleija neiji Jisu Khrista ki wonsat tu kilṭhi ngi naan akheng in plung ado kapkham psuk chaak in ava Isowr ri sakhi kurthuwk.

⁹Ungta nei kdo ṭhil chaakka hava, mleija kdei pandi leh kindit poibin mkheng tu kilṭhi ngi naan wonsat ado klo in ava kheel set setti mnem nra,

¹⁰tditta ava leiji kinreel sii ava naanni ado rot nraan, ungu Khrista nit rek tummi kchiir deek ungta kupsul ktaak akurthut nraan leiki.

¹¹Jisu Khrista thu kurjung rinkindit ki thei rek ava ngi adim chaak nraan, Isowr laarnee hin kpanpaak kcha kurthuwk so.

¹²Ku u knao rek, nei kleen kthuwk ava kṭha paumin kbom rangki, kindit ava sok klo cha tdit naanni adodee raan neiji kngei chaakka.

¹³Tditta ava leiji neiji rowng inn thu ka amma Khrista tum tdit paamkpu lusang inn kseel mkheng leh mii mkheng ngi mdo dee nra.

¹⁴Ungta neiji rowng inn thu ka am ava leiji Mukpu hin plung knet betti, ku u knao rek mii maknem hin kṭi ktaak liitti Isowr pauna ava kheel setti kpau cha kukurthut nrang lei.

¹⁵Mii murson va kheithe leh kar ai kalrai paryaam da, pdainu murson rek va kṭha poibin ni Khrista paryaam lamda.

¹⁶Mii angṭhe va hava thu nei mdo tukhum ava kṭha paumin ksanloi tum tdit deida, dil thang rongi wonsat ki nong tlo lamda.

¹⁷Mii murson va plung klutti Khrista paryaam lamme, pdainu neiji rowng inn thu ka am slii daat thu kja kakham mdo tpiik nlamra poi bin lamda.

¹⁸Ava mkurthuttu talu rang? Mlam ktai thu ktlo do tlot tlo daat joso mdit mata kindit ktlo kurthuwk daat joso, Khrista kparyaam kurthuwk; ungta ava thu neia kanpa kcha ping.

¹⁹Ungu tkanpat ruk kanpa chnik di. Mleija neiji kdee ditta naan do ṭhil chaak thu ungta Jisu Khrista Pthla do bommi, nei mdo tiṭen thuw nrang tha kur owl ra.

²⁰Neiji kdung mlam suwnu kbin chaakka, ditta neiva do khat lee kjat maang, pdainu mpha ktai thu kdung plung ktangar ri ka am ava lulu ngi, tun ruk va ring joring diyou joring nei kdaksaa thu Khrista kpanpaak cha kurthuwk nik di.

²¹Daksaa thu rinkhu mkurthut bi, nei knong tlot na thei kurkun kurthuwk. Anto daat joso nei kdo kchol chaak ra ava neiji thethuw pchaang chmaang.

²²Neiji daksaa rinkummi ka amthlit daat kukur thutbi, ava neiki thei, anto joso kdo kchol ra ava neiji the pchaang maang.

²³Neia knii arlakki kdung mhai parchip chda, sunda Khrista tu kilṭhi ava kdo bin chaak, mleija ava ngi kṭha sii.

²⁴Pdainu daksaa thu ka am chdaat ava naan tumva kheel sii ngi do ksi.

²⁵Hava Kindit katta hava, mleija krin cha thu naan tummi mkursom nra, ungu kanpa akurthut nraan, neiji am daat da naan akheng in tu kilṭhi ngi am nowl nik di tdit neiji kdee chaakka.

²⁶Tditta ava leiji neiji naan hin kthlen nowl ra ava naanni Jisu Khrista tu ka amve ki kanpa kheel sii ngi ado phaak nraan ka amra.

²⁷Naan rinkhu ki nopa ava Khrista ki kṭha paumin kurhuiji a am nraan hava hehe daat kurthuwkka, ditta ava leiji neiji naan hin thlengda adei jown ring mdit mata thleng mjoringva, kṭha paumin tummi krin cha thu lee leh chang ngi plung khdaat tu kilṭhi ngi Pthla khdaatti ari raan ava neiji karyaak chaak nuwmma.

²⁸Ungta naan ak kro kma rekki do khat lee kma thu aju pṭit maan so. Hava ava mmaan muk kro chaak nraan ki titinna khat kurthuwk, pdainu naan akirliin nraan ava Isowr hinki.

²⁹Mleija Khrista tummi Mhin ado rin chaak in daat kma pdainu Mma tummi kja kakham kparteel rang ruk ado trot pik dok in.

³⁰Chodu ngi rawl kdo karnaak ṭhi naan dodee dok, ava tun rukku neiji kdo karnaak ṭhi slii ava ado aryaak in thu mhai karnaak ṭhi chaan.