Read Lamkang PHILIPPIA 2 Bible Online

PHILIPPIA 2 - Lamkang bible

PHILIPPIA 2

¹Ava leiji Khrista thu kursop, wonsat ki plung ngam kpii, Pthla thu kurku ṭhi, plung knei leh wonsat kthloi ma am luwngbi,

²plung bin kinṭim sappi wonsat khdaat kthloiji plung khdaat, ungu poi bin khdaatti nei kakanpat ava mhai pdim pik chaan.

³Mthina ki kparning mdit mata napal poithuw ngi do khat lee tlo maan, pdainu plung kparneem mi naan adaksaan hinva ktlok mii rek ava ngi kṭha bet kdingi mhai bin pik chaan.

⁴Naan mii pum ktaiva mma mma arda ro ntha khuwsuw mso, pdainu ktlok rek arda ro nthang rukva asuw so.

⁵Jisu poi bin ava naan arlak ruk va am so.

⁶Mma ngi Isowr arling lou chdaat joso, Isowr tu kinṭimmi do khdaat pre arlaang me.

⁷Pdainu sra owr khat ki arling louda, dultimii rek kdu jikki ṭouda mdaksaa ava ktlong ngi am chda.

⁸Ungta dultimii arling kdu jikki Mma ngi mdaksaa ava plung kparneem mi khros leen kdiyou kpha thu Mma ngi pau pṭoida diyou da.

⁹Ava leiji, Isowr va kparthaang siingi khiingda, ungta miing khim khai tunni Mmiing ava Mma hin pii da.

¹⁰Mleija parwaan tha ungu dulti leen leh dulti ril tha ka am pkhup khim khaiji Jisu miing hin mtardiil nra,

¹¹ungu Mpah laarnee ra, plei khim khaiji Jisu Khrista ava Mukpu di donle kthe thuw ra.

¹²Ava leiji, nei kwonsat lo rek, naanni mpha ktai thu kthe kupṭoi akurthut in lulu ngi, neiji aka am ṭhiin thung daak kma, pdainu nei ktaakki tun rukva kṭi leh kunchun tu kilṭhi ngi naan adaksaan akirliin chaak nraan nong atlo in.

¹³Mleija naan thung ngi Mma ningthlun nra bin da, ungu ado tlot raan mikniing ava Isowr ri mtlot sliia.

¹⁴Kho kthe mdit mata ktlou liit kma do mkheng ava atlo in.

¹⁵Mleija naanni kunkoi leh plung ksel charuwl thungki mraal ktaak liitti, kparmak kma Isowr naole kurthuwk da, mmaan arlakki mar awng lulu ngi dultipaam thu alen nraan,

¹⁶rinkhu ki pauna ava knet merri arpom chaan, mleija ava leiji Khrista nit thu neiji napal kdo tlot chaak nra, neiva do ksi kma ngi chen maang, mdit mata do ksi kma nong tlo maang.

¹⁷Naan lamrin chaakki tlaai down tunni kpii cha lulu ngi nei kihii kpubu kurthuwk daat joso, neia kuplung kngam rekrek kcha a, ungu naan akheng in tummi kanpa kchaam ping.

¹⁸Anto lulu ngi naan ruk va plung kngammi nei tu kilṭhi ngi akanpat raan.

¹⁹Naanki pauren kdee dok le nei kuplung mngam nra, neiji naan hin Timothi kbeiji kdo sii chaak nra, kdung ngi Mukpu Jisu hin kbin psuk chaakka.

²⁰Naan ki mlei thu hanto ja ngi plung kakham mma hep daat ku khat lee neiji thloi chmaang.

²¹Mmaan mkheng ngi Jisu Khrista ktongki kma mma mma arda rona ktongtha khuw suw lamda.

²²Pdainu naanva Timothi ngi mkurhui chaak ava ado dee in, tija thu mchapa ngi mpah sok mdolo lulu ngi, mma ngi nei tu kilṭhi ngi kṭha paumin ava sok mdolo chaak.

²³Ava leiji, nei kihin tak hep kdu ki nong kthuwk rang tdit adodee teng chaak nraan, neiji mma ava ksii nuwm chaakka.

²⁴Ungta nei kdaksaa rukka kbei sekki thleng nik di dinu neiji Mukpu hin lam krin chaak ka.

²⁵Ungta neiji neiki ku u knao, ungu knong suk ṭhi, ungta rawlmii kdo kurthut ṭhi, ungu naanki tamsii, ungta nei kdo kriin thu sok klou Epaphraditas rukka naan hin kdo sii ngi kṭha rangmo kdingi kbin chaakka.

²⁶Mleija mma ngi naan akheng in plung aju pkham psuk inda, ungta kheelli plung apjiin psuk inda, mleija mkoi naanni ado aryaak dok in.

²⁷Kdiyou daat rang ngi koi chkat kat da. Pdainu Isowr ri wonsat lo chda, ungu ava daat kma, neiji kja kakham tun kja kakham kdo dut ma nra, nei rukka wonsat mlo chda.

²⁸Tditta naanni mma ado dee lei inni akanpat chaak nraan, ungu nei kjat kakham mtlowm bet nrang lei kurthuwk da, neiji mma ava kheel sii ngi kdo sii chaak nuwm.

²⁹Ava leiji kanpa mkheng tu kilṭhi ngi, mma ava Mukpu hin mhai kowl pik chaan, ungu anto lu hep daat mii ava ado kjat raan.

³⁰Mleija nei ki hin tha naan sok lo mkurkhum nra, mma ngi mrinkhu vardeen da, Khrista nong leiji kdiyou sou cha.