Read Lamkang PHILIPPIA 4 Bible Online

PHILIPPIA 4 - Lamkang bible

PHILIPPIA 4

¹Ava leiji, neiji wonsat lonu plung pkhamnu kdo bin psuk, neiki ku u knao rek, nei kakanpat leh laar luwkhum rang ngi Mukpu hin knetti mhai ri pik chaan.

²Mukpu hin ado kulrot nraan neiji Eudia leh Syntikhas kaktham chaak lamma.

³Ungta kindit nong kdo tlot ṭhi naan rukva, hava snu rek ado bom chaak nraan akatham chaak inna, mleija kṭha paumin tummi lee leh chang ngi nei knong tlot ṭhi Klement leh nei knong suk ṭhi mii murson rek tu kilṭhi ngi mmaan miing nga rinkhu ki Laaika thu ka am dok.

⁴Mpha ktai thu Mukpu hin kanpa chaan; vei khat nowlli neiji kthe a, kanpa chaan.

⁵Mii mkheng ngi naan do diil de ava adei so, Mukpua knai tekka.

⁶Naanni do khat lee mlei thu plung pjiin maan, pdainu do khim khai thu kpanpaak tu kilṭhi ngi ado ṭhil ado ktham chaak inna Isowr hin ati det chaan.

⁷Ungta Isowr ki kdaai mkheng nga ktip pdepandit Jisu Khrista ngi naan plung ril ungu apoibin in ava karkhii ra.

⁸Mṭut na relli ku u knao rek, kindit khim khai, takjat kurhui khim khai, mkindit khim khai, kchiir khim khai, mrungchen kṭha khim khai, mman klu ungu kheel sii ngi kinreel ava ma amta, tpanpaak ra kuhui ma amta, havale mlei thu abin phaak in.

⁹Nei kihin ni naan do kurchu naan ungta ado arlaan in, ungu ado aryaak in, ado dee in ava atlo in; ungta kdaai ki Isowr ri aju kurthlo ṭhi chraan.

¹⁰Mukpu hin neia kdung ngi kanpa kchaam ping, ditta tunva naanni nei ktummi roi ksotti ado tbin pik in; naanni nei ado tbin pik kat kat in, pdainu mpha kcha ava naanni thloi chmaan ti.

¹¹Neiji kdo ngei leiji kthe kcha ava pmaang; mleija talu talu thung daat joso ka am na mun thu kning kthlung ngi kurchuk kcha ping.

¹²Tak heppi tikkriin tdit neiji kdee, ungu tak heppi knemmi tathloi rang tdit ruk kdee chaak; mleija do khim khai ungta mlei mkheng thu kekleem lut lut daat don mdit mata poitham daat don, knempok daat don ktlowm suwn daat don, kurdowl li neia kurchuk chdok ping.

¹³Nei kihin ru mkaptan pik Mma hin do mkheng nga neiji tlo pchaang chnik di.

¹⁴Anto daat joso naanni nei kjat na thu awonsat inni mhur ṭhi chaan tinu.

¹⁵Ungta Philippia naan adaksaan kat daat ruk va ado dee in ditta kṭha paumin mupṭhun daat le, neiji Masidonia ki kukunsun mpha thu, naan kma donle Rinlop ku khat lee ngi kpii ki ungu karlaang chaki mlei thu kmii ṭhira ka am pme.

¹⁶Mleija Thessalonikia thung ruk va, naanni nei mukbom chrang ngi kurnowl kurnowl inti ado siin.

¹⁷Neiva chla ra thlaam maang; pdainu naan tumra kheel bet ava kthlaam cha ping.

¹⁸Neiji ava mkheng arlaang dok chnu, ungu mdo kheel dok, naanki chla ava reidii mikrim kdi langlang, Isowr dorot kro ungta mning thlunna tlaai down kurthuwk ki Epaphraditas hin ado puhur in neiji arlaang chnu, neia pum dimmi kdim kchaam ping.

¹⁹Ungu neiki Isowr ri naan do kriin khim khai, Jisu Khrista thu Mma laarnee ki suwangthuw dil kṭoiji aju kpurdon pik chraan.

²⁰Nenki Isowr ungu Npah in hin kṭuw knai liit kma kpanpaak kurthuwk so. Amen.

²¹Jisu Khrista hinni kintiing khim khai kurvui chaan. Nei tu kilṭhi ngi ku u knao rekki naanna leer khatti aturvui chaak inna.

²²Kintiing rek mkheng, kheel siingi Kaesar phungka rekki naanna aturvui chaak inna.

²³Mukpu Jisu Khrista ki plungnee ngi naan ki Pthla aju kurthlo ṭhi chaan so.