Read Lamkang KOLOSSIA 2 Bible Online

KOLOSSIA 2 - Lamkang bible

KOLOSSIA 2

¹Naan tum ungu Laodesia tha ka am rek leh nei kmai kdei cha kma rek tummi kdung kpalren nu nong kdo suk chaak naanni ado dee raan neiji kngei chaakka.

²Mleija wonsat thung ngi muplung bin kinṭimmi arda krok ungu suwang thuw mkheng thloida ungta Isowr ki kukthuk pauvi Khrista dei dok da, mmaan plungril kuk sop mkurthut nrang lei.

³Mma thungva lousing ki alrou mkheng kurdowl daat da ka am.

⁴Ku mii khat leengi naanna pauna ngi ado tup sum ma nraan, neiji hava kthe cha ping.

⁵Mleija neiji daksaa ngi am mjoringva Pthla va naan tu kilṭhi nu ka am daat ping, Khrista hin ado rin chaak in knet ava deida kṭha ngi a am in dei da kakanpat nrang ki lei.

⁶Ava leiji, naanni Mukpu Jisu Khrista ado arlaan chaak in lulu ngi, Mma thu am in.

⁷Mma thu arjung avar inra apunchoi in, ungta naan hin ado tpurchu in lulu ngi, naan lamrin chaak thu kdung knetti kheelli apanpaak chaan.

⁸Khrista ktongki dil kṭoi kma, dultimii nopa dil kṭoi, dultipaam ki pthla rek ki mkinreel naanki nopa ava dil kṭoiji, ku mii khatti mma kurchu chaak leh do ksi kma pauvi ado tuk kjown ma nraan tuk kursut chaan.

⁹Mleija mma thu Isowr ktongki daksaa mkheng kdimmi ma am nra,

¹⁰ungu Mma thu rinkhu kdimmi naanni ado thloi chaak in. Mma ava paamkpu mkheng ki Isowr ungta rutan kthloi mkheng ki Mluw kurthuwk.

¹¹Khrista ki vunmor kreen thu daksaa ktongki dak ava ma pthiida, khut do seemma vunmor kreen khat tu kilṭhi ngi, Mma thu naanna vunmor ado reen dok in.

¹²Ungta baptis ktlo thu Mma tu kilṭhi ngi ado tulruwl dok in, ungu kdiyou thungki Mma kipring pinle Isowr nongtlot tingi naan rukka Mma tu kilṭhi ngi kring kinle chdok in pti.

¹³Ungta naanna apnu ton rek in leh adaksaan thu vunmor ado reen ma inni kdiyou chdok in pti, nen pnu ton mkheng mi ptlot pik inda, Mma tu kilṭhi ngi Isowr ri mido tip prin pinlet chaak in.

¹⁴Nen nraal mipii da ka am Nowlam tikjit ava Mma ngi knuwl pthiida, khros tun jowtpi tha kthenda, Mma ngi siirri mdo thiik pthii.

¹⁵Mma ngi Pthla ktongki rutan rek leh ru ktang rek rutan ava lou pthiida, ungu Mma ngi dultimii mdo tdet nangi mmaan ava mdaksaa ngi pchaang riim da.

¹⁶Ava leiji, kchaa knee mdit mata kmaal kakam thu mdit mata thla ren mdit mata sabath mlei thu ku mii khat lee ngi naanna aju kṭewl maan so.

¹⁷Hava lea kurjung rangki arlim khat ngaal; pdainu mpaulam katta Khrista hinki.

¹⁸Naanna daksaa kpirlin kcha ungu waan tamsii rek luwkbuk ku mii khat lee ngi do ksi kma thleerri atlot nmaan so, mma ngi mik kleng tun tarsan louda mlei ktaak liitti kpunmun ni naar klinni Khrista kbin thungki kdown pthii kurthuwk.

¹⁹Ungta daksaa ki mluw kurthuwk Khrista ava knetti kjowng me, mdaksaa mkheng ava mkurjom na thu Khrista ngi tri purdut da klin ksaang ngi mdojuw plin, ungu Isowr do ngeiji klin ksaang.

²⁰Dultipaam Pthla paal thu Khrista tu kilṭhi ngi adiyo innu, talu leiji dultipaam ktong ki mii rek heppi ka am thlit daat in pti? Talu leiji Nowlam kurdu ngi ka am in pti?

²¹“Kmei maan, partem maan, thowng maan,”

²²Mkheng ava kmawng chrangki do mmaanni mdo sin ton in ava mdo thena. Hava lea dulti mii ki nopa leh paurin dil kṭoi pmemo?

²³Havalea waan tamsii luwkbuk ungu ningkja na ungta daksaa suwkthuw nrangki ngi lousing tarsan klou, pdainu daksaa tukjown nrang kia mmaanna do ksi ava pme.