Read Lamkang 1 THESSALONIKIA 2 Bible Online

1 THESSALONIKIA 2 - Lamkang bible

1 THESSALONIKIA 2

¹Mleija ku u knao rek, ditta neenni ado kvel chaak inna do ksi kma lua kurthuwk me tdit naan adaksaan katti ado dee in.

²Pdainu neenni Philippia thu kja kakham pha innu, ungta ningkja du chdaat jown ringva, naan dodee lulu ngi, neenni naan hin Isowr ki kṭha paumin kthethuw cha thu kdung mhai kipteng kchaan ava maiṭhuwm mi nenki Isowr hin tan kdolo chaak in.

³Mleija neen kdo the inna kar mak mdit mata ktobor mata kindit kma ava pme.

⁴Pdainu Isowr ki kṭha paumin tu kilṭhi ngi msil naanda mdo trot pik in ava lulu ngi, neenva kpau kchaan ping, dultimii ningthlun nra ava pme, pdainu nen plung ril kpirsin ndok Isowr ning thlun nrang lei.

⁵Mleija naan dodee lulu ngi pauna rek kip pnii chaak mdit mata pau parnaal duwk duwkda kthe pmaan ring, ava Isowr ri sakhi kurthuwkka.

⁶Neenni Khrista ki kenyee lulu ngi ṭhilda ngeen daat jown ringva, mii rek hin mdit mata murson rek hinki laarnee ava thlaam maan ring.

⁷Pdainu mnuh ngi mnaole mdo sut pṭoi chaak lulu ngi, neenna naan arlakki plung kdowng ngi ka am in ping.

⁸Ava leiji naan wonsat ajulo reen innu, neenni naan hin Isowr ki kṭha paumin ava daat kma, pdainu neen kdaksaan kat rukka kdo piik chaak nuwm in, mleija naanna neen kwonsat lo in pti.

⁹Mleija ku u knao rek, naanni neen knonglo in, ungta knongtlot in na bin phaak naandi, neenni Isowr hinki kṭha paumin ahin inni kparyaam slii thuwn, ditta naan ku mii khat hin bowr krik ado kpiik ma nraan, suwn jaan knai kma nong kdo suk chaak in.

¹⁰Krin cha rek naan hinni tak heppi neenni kchiir, ungta rinkindit ungu kupsul ktaak liitti ka am in ping tdit ava naan leh Isowr ri sakhi.

¹¹Mleija naanni ado dee in, naanna Isowr Mma mdak kat ki Kruwngpaam ungta laarnee thu ado tu own naan thu kurhuiji ache chaak nraan.

¹²Neenni aju ksop innu, plung aju tipchai pik innu, pau kham innu mpah ngi mnaole hin mdo tlot lulu ngi, naan mii pum ktai hin ado ktlot pik dok in.

¹³Ungta hava tummi neen ruk va kdet liit kma Isowr kdo panpaak chaak in, tditta naanni neen kihin ki Isowr pauna aryaan ti arlaan chaak in mpha thu, mii rek pauna lulu va arlaang maan ti, pdainu krin cha rek naan thu nong aju kup ptlot pik in Isowr ki pauna kdingi mlo pik inti nu, ava mkindit kat.

¹⁴Mleija ku u knao rek naan, Judia thu ka am, Jisu Khrista hin ka am Isowr ki Rinlop rekki, ava nopa kupṭoi cha kurthuwk lam; mleija mmaanni Jihudia rek hinki kja kakham mdo parteel in lulu ngi, naan rukka anto jikki akhuwpaam inki miirek hinki aparteel chaak inna.

¹⁵Mukpu Jisu leh khulpu rek mikniing ke eayou, ungta nen mi krei pthiin, ungu Isowr ning kupthlung kma, ungta mii mkheng kro kma ngi,

¹⁶ktlok chati rek mdo ktlan pik nra, pau kthe thu nen mi pkhaan inda, ava leiji mmaanna mpha ktai thu tparteena kdimmi pnu marvee chaak inna. Pdainu mṭut na relva mleen thaanni Isowr plung thit kthlung nga.

¹⁷Pdainu ku u knao rek, plungril kma daksaa ngi, mpha mruk tummi kinṭhen in minnu, kdung ngi aṭei chaannu, ungu naan mai kdeira kdung plung kdo purdun chaak in.

¹⁸Mleija neenni, Poul neiji kurnowl kurnowl nu naan hin kthleng kcha nuwm ping, pdainu seitaanni mapkhaan thlit da.

¹⁹Mleija nenki Mukpu Jisu murjun mpha thu, Mma maiṭhuwm mi nen tbin chaak thuwn, mdit mata kanpa mata napal ktlo ki luwkhum ava talu da? Ava naan pmemo?

²⁰Mleija naanna neenki laarnee leh kanpa ava in pti.