Read Lamkang 1 THESSALONIKIA 3 Bible Online

1 THESSALONIKIA 3 - Lamkang bible

1 THESSALONIKIA 3

¹Ava leiji, neenni kdiil pchaan nowl maan thungta, Athenia rek hin tha ksangtlaak ki mdo tmaak raan ngei chnu.

²Ungta naan do rin chaak thu ru aju kaptan pik chraan, ungu akuk ksop chraan, Khrista ki kṭha paumin thu Isowr sra owr ungta neenki ku u knao in Timothi kdo sii chaak in.

³Tditta kja kakham kparteel thu naan ku khat lee akanvei ma nraan, naan adaksaan kat daat ruk va kbowr in krik naanni ado dee dok in.

⁴Mleija neenni naan aka am ṭhiin mpha thu, neenni kja kakham kdo parteel raan ava mdu ngi ado kthe pik dok in, anto hep heppi thuwk da ava naanni ado dee in.

⁵Mleija hava leiji neiji kdiil pchaan ma nowl thungta, naan do rin chaak ava kdo dee nra kdo sii chaak, mleija kepthleem mi aju kipthleem dok raan, ungu neen knong suk chaak inna do ksi kma kurthuwk kro kdingi kṭi im ping.

⁶Pdainu tunva Timothi ngi naan hinki thlengda, ungu naan do rin chaak leh wonsat mson pik inda, ditta neenni plung kdong ngi ado kdee chaak nuwm in lulu ngi naan rukva mdei chnuwm in tinu, mpha ktai ado tbin phaak inki wonsat ki kṭha paumin mhur pik chaan da.

⁷Mleija hava leiji ku u knao rek, neen ksuwk thuw in ungu kja kakham kdo parteel in mkeng thung ngi naanki mlei ungta naan do rin chaak ava ngi plung ngam kdo phaak chaak in.

⁸Mleija naanni Mukpu hin knetti ari chaak inbi, tunva neenna kring kchaan ping.

⁹Mleija naan tummi neenni Mukpu hin kpanpaak chaak inna. Mleija nenki Isowr maiṭhuwm mi ka kanpat in mkheng kvar deen chaak inna.

¹⁰Suwn jaan knai kma plung klutti neenni ṭhil chaannu, tditta naan leh neen nmai in kurdu da ungu naan do rin chaak thu kvaat ava aju purdon pik chni maan ring mo?

¹¹Tunva nenki Npah in Isowr mdaksaa kat ungta nenki Mukpu Jisu ngi naan ktong tha klam in mtikhew pik chaanda.

¹²Ungu neenni naan wonsat ado klo in lulu ngi, naan ni khat leh khat hin ungta mii mkheng hin wonsat knemmi ado lo nraan kheel set setti mhai tlot pik chaan.

¹³Ava leiji nenki Mukpu Jisu ngi kintiing rek mkheng tu kilṭhi ngi, murjun mpha thu, nenki Npah in Isowr maiṭhuwm mi, naan plung ril thu kupsul ktaak ungu kchiir deekki ado tpunchoi pik nraan ki kurthuwk.