Read Lamkang 1 THESSALONIKIA 5 Bible Online

1 THESSALONIKIA 5 - Lamkang bible

1 THESSALONIKIA 5

¹Pdainu ku u knao rek, mpha leh mkum mi mlei kurthuwk da, naan hin kdo kjit nrang ki arleek set do ame.

²Mleija Mukpu ngi kup pru khat thlen lulu ngi jaanni nii khat thu kurjung ra tdit naan adaksaan katti kmin ni ado dee dok.

³“Kdaai ungta tiṭit traan nra arleek set do ame,” dida mii rekki mthe mpha kat thu, snu khatti nao kuplu rangki mukdung kṭou ava heppi, tun kat daatti muk kro chaak nraan mmaan leenni arjung kṭumra, ungu mmaan ava karthlet pchaang liit lam nime.

⁴Pdainu ku u knao rek, naanna kjiingnu thungki pmaan ti, mleija ava nit va naanna kup pru hep va aju kṭhowng in nime.

⁵Mleija naanna mar awng ungu suwnki naole in pti, nnenna jaan ki mdit mata kjiingnu ki in pminme.

⁶Ava leiji anto daat joso, murson rek do tlot lulu ngi, nenni iip maan che, pdainu mik khut har in chera, plung knetti am in che.

⁷Mleija ki iip rekka jaanni ki iip lam, ungu ju kipri rekva jaanni kipri lu lam.

⁸Pdainu nenna suwn nao tkurthut lei inni, plung pnet inche, ungta krin cha leh wonsat ki plung arkuw hiilnaa inche ungu kirliing ki tbin chaak in rawl luwkhum khum in che.

⁹Mleija Isowr ki plung thit ksudu rang ngi mido tpankai in ava pme, pdainu nenki Mukpu Jisu Khrista thu kirliing kpha chrangki.

¹⁰Nenni har jown min mdit mata iip jown minva, Mma tu kilṭhi ngi kring tphaak chaak nraan, nen ntummi Mma ava kdiyou.

¹¹Ava leiji, naanni ado tlot in nong ngi khat leh khat kursop in ungta khat leh khat kpunchoi in.

¹²Pdainu ku u knao rek, Mukpu hin naan arlakki nong ksu ungta tunni ka am, ungu aju kpurchuk kchaan mmaan ava kdung ngi ado kjat pik raan.

¹³Ungu mmaan nong leiji kdung kparthaang ki wonsat ava ngi mhai tlot pik chaan diinnu neenni aka ktham chaak inna. Naan asingreel in arlakki kdaaiji am in.

¹⁴Ungta ku u knao rek, neenni naan akuk kso chaak inna, howngkva rekka mhai arko pik chaan, plung kdil rekka plung atiplin pik chaan, ksowl rek abom in, mkheng nga adiil ṭhi sap in.

¹⁵Kṭha kma ktlo tummi kṭha kma ngi naan ku mii khat lee ngi ado purthul ma nraan cheek asin dei chaan, pdainu khat leh khat hin ungu mkheng hin kṭha ado tlot nraanki mpha ktai thu athlaam dei chaan.

¹⁶Mpha ktai thu kanpa chaan,

¹⁷Kdet liit kma aṭhil dei chaan,

¹⁸Mlei mkheng thu apanpaak in; mleija hava naan tummi Jisu Khrista thu Isowr plung bin ka am.

¹⁹Pthla ser maan;

²⁰pau kphuwng miia do ksi kma ngi bin pik maan.

²¹Pdainu do khim khai aparsin naan; kṭha ava knetti akjown chaan,

²²kṭha kma nong khim khai aser in.

²³Kdaai ki Isowr mdaksaa katti mkheng apinchel pik inda, ungta naanni Pthla ungu raothla ungta daksaa ava nenki Mukpu Jisu Khrista murjun mpha thu, kurhui deek ungta tupsul nra ktaak liitti am in.

²⁴Naan ako own kchaan Mma ava lam trin chaak kurhui, ungu Mma ngi ava ktlora.

²⁵Ku u knao rek, neen ktummi mhai ṭhil pik chaan.

²⁶Kchiir khat do put tu kilṭhi ngi ku u knao rek mkheng nga mhai arvui pik chaan.

²⁷Hava chethi ava ku u knao rek mkheng hin ado tpat pik chaak nraan, neiji Mukpu miing ngi aka ktham chaak inna.

²⁸Nenki Mukpu Jisu Khrista ki plungnee ngi, naanna aju kurthlo ṭhi chaan so.