Read Lamkang 2 THESSALONIKIA 1 Bible Online

2 THESSALONIKIA 1 - Lamkang bible

2 THESSALONIKIA 1

¹Poul, Silvanas ungta Timothi ngi nenki Npah Isowr ungu Mukpu Jisu Khrista thu ka am Thessalonikia rek Rinlop hin tha:

²Npah Isowr ungu Mukpu Jisu Khrista hinki plungnee leh kdaai ava ngi aju kurthlo ṭhi chaan so.

³Ku u knao rek, naan tummi mpha ktai thu neenni Isowr kdo panpaak raan ava kurhui, mleija naan do rin chaak ava kheelli klin ksaang kurthuwkka, ungta naan mii pum ktaiji khat leh khat hin wonsat akurlo in ava karkheel set setta.

⁴Ava ngi mlei kurthuwk da, naanni suwk kthuwk ado phaak in leh kja kakham ado phaak in mkheng thu ado diil dei in, ungu krin cha thu akurnowl thlit daat lei inni neen kdaksaan ni Isowr Rinlop rek thu kparlin kchaan ping.

⁵Hava Isowr rinkindit do kṭewl mdo tdet na, tditta naanni Isowr Kruwngpaam kira kurhui akurthut nraan, ava leiji naanni kja kakham ado parteel in.

⁶Isowr ri rinkindit kat mdo tlot tu kilṭhi ngi tun tun naan hin kja kakham akpii kchaan rek hin, kja kakham kpinlet pik lamra,

⁷ungta Mukpu Jisu ngi mei kṭuwng thu Mma ki waan tamsii rek ruktang sii tu kilṭhi ngi, parwaanki murjun mpha thu, kja kakham kparteel naan ava neen tu kilṭhi ngi mido trot pik nraan,

⁸Isowr kdei kma rek ungu nenki Mukpu Jisu Khrista ki kṭha paumin kleek mii rek tun mraal kpiira.

⁹Mmaan ava kṭuw knai kma kuk krop chrangki kja kakham ksudu lamra, ungta Mukpu maiṭhuwm leh Mma laarnee ki rutan ava thungki kikneng pthii lamra,

¹⁰Mma ki kintiing rekki Mma murjun mpha nit thu mdo panpaak nlamra, ungta krin cha mii mkheng plung mdo psum nrang lei, mleija naanni neenki rinpaumin naanni ado rin chaak dok in.

¹¹Hava mṭut na kpha dekki neenni naan tumra mpha ktai thu kdo ṭhil chaak in, tditta nenki Isowr do own thu akurhui chaak nraan, ungta kṭha khim khai ungu Mma lamkrin chaki nong ado tlot in ava mrutan tu kilṭhi ngi kurkhumra.

¹²Tditta ava leiji nenki Isowr leh Mukpu Jisu Khrista ki plungnee dil kṭoiji, naan thung ngi nenki Mukpu Jisu miing ungta Mma thung ngi naan ado tpanpaak nraan leiki kurthuwk.