Read Lamkang 2 THESSALONIKIA 2 Bible Online

2 THESSALONIKIA 2 - Lamkang bible

2 THESSALONIKIA 2

¹Tunva ku u knao rek, nenki Mukpu Jisu Khrista kurjung leh nenni Mma kurdut ṭhira nkunpun nraanki mlei thu, neenni aka ktham chaak inna,

²kuk knot reenni aplungbin in mkunchun ma nra mdit mata lungdep akpurthlown ma nraan, Pthla daat don mdit mata pauna daat don, mata neen kihin inki chethi kdujik daat don, Mukpu nit kurjung ava plung chei karche ngi ado bin raan pme.

³Talu talu thung daat joso naanna ku mii khat lee ngi ahuwng chmaan so; mleija ru kringi rutan kipteng thlengda ungu Nowlam kleek kmawng chapa mkandan du khim khai mnit ava thlung liit nime,

⁴mma ava mukpu ping ngi kardi da mdit mata luw mdo buk, do khim khai tun ni kipteng, ungu mdaksaa kparlin kcha, tditta ava leiji mma ava Isowr ki luwbuk Inn thu ko ongda, mdaksaa ava Isowr ping ngi kdingi kparyaam da.

⁵Neiji naan aka amṭhiin mpha thu ahin thaanni hava pau kdo saam dok ava bin phaak maan timo?

⁶Ungta tunva Mma ki mpha thu mkandan nra mdo pkhaan pthii ava naanni ado dee in.

⁷Mleija Nowlam kleek ki kukthuk pau ava mdo tlot dok; tun mdo pkhaan mma ava mlo dok du khim khai kapkhaan kcha ngaal.

⁸Ungu audil rongi Nowlam kleek ava kandangra, ungta Mukpu Jisu ngi Mma ner thungki tdaal ava ngi ke eayou ra ungu Mma kandang donle Mma arjunni ke eakrep ra.

⁹Nowlam kleek khat thlen ava seitaan nong tlot tu kilṭhi ngi rutan mkheng ungu titinna rek do tlot ktlo ungta tngana rek,

¹⁰ungu kmawng chrangki tummi kṭha kma plei knei rek mkheng tu kilṭhira, mleija mmaan mdo ktlan pik nrangki kindit wonsat ava mmaanni pthlei lamda.

¹¹Ava ngi mlei kurthuwk da mmaanni kar mak mdo rin chaak nraan mmaanni kar mak nong mdo tlot nraanki Isowr ri mhin thaanni rutan siida,

¹²tditta ava leiji krin kma mkheng nga mraal mdo piik nlamra,rinkindit kma thu ṭhek kinṭheu tir chlamra.

¹³Pdainu Mukpu wonsat lo ku u knao rek, neenni naan mlei thu Isowr hin kdo panpaak chaak kat raan, mleija mupṭhun daat ki Isowr ri ado taktlan chaak nraan Pthla ngi ado tpinchel in ungu kindit ava ado rin chaak nraanki ado tukchol dok in.

¹⁴Hava leiji Mma ngi nenki Mukpu Jisu Khrista ki laarnee ado phaak chaak nraan, kṭha paumin thu ado tu own chaak in.

¹⁵Ava mkurthut bi, ku u knao rek, knetti rip in ungta neen kner thungki pauna daat don mdit mata chethi daat don naan hin ado kpurchu chaak in nopa ava knetti arpom chaan.

¹⁶Tunva nenki Mukpu Jisu Khrista mdaksaa ngi nenna wonsat milo chaan da, kṭuw knai kma ki plung ngam mikpii kchaan, nenki Npa Isowr ri plungnee thu kbin cha,

¹⁷ava naan plung thu plung kngam akpii kcha in kurthuwk so, ungta kṭha nong khim khai leh pau khim khai thu aju kpunchoi pik chraan.