Read Lamkang 2 THESSALONIKIA 3 Bible Online

2 THESSALONIKIA 3 - Lamkang bible

2 THESSALONIKIA 3

¹Mṭut na relli ku u knao rek, tditta naan arlakki lulu ngi Mukpu pauna ava kuk notti kurjou da ungta kinreel sii mkurthut nra mhai ṭhil pik chaan.

²Ungu kṭha kma leh kṭha kma mii rek thungki mido ṭenthuw chaak nraan; mleija mkheng nga krin cha mkurthut ma leiji mhai ṭhil pik chaan.

³Pdainu Mukpua lamtrin chaak kurhui; Mma ngi kṭha kma thungki ru aju ptan pik in don ungu akseel chraan.

⁴Ungta neenni pau ado kreen pik inna naanni tlo inti ta tlot ruk tlo naan di kdingi naan mlei thu Mukpu hin plung kapngam psuk chaak inna.

⁵Mukpu ngi naan plung ava Isowr wonsat leh Khrista kdiil dei kcha thu aju ktikhew pik chraan.

⁶Tun va ku u knao rek, naanna nenki Mukpu Jisu Khrista ki miing ngi neenni pau akreen pik inna, tditta howngkva ungu naanni neen kihin ki ado arlaan chaak in nopa kupṭoi kma ku mii khat a u anao in ava aser chaan.

⁷Mleija naan adaksaan ni neen kno ava tak heppi kurchuk nikaan di tdit ado dee dok in; neenni aka am ṭhiin mpha thungva neenna howngva maan ring.

⁸Neenni ku mii khat lee hinki thenpen leemna ngi chaa maan ring, pdainu kdung kpalren innu nong kdo lo in, suwn jaan knai kma nong kdo suk in, tditta neenni naan hin bowr krik ado kpiik maan nrang lei.

⁹Mleija neenki rutan ma amma lei pme, pdainu naanni neen kno akurchu chaak nraan, neen kdaksaan thu akurchu nraan leiki.

¹⁰Mleija neenni naan aka amṭhiin mpha thu hava paureen na ado kpiik dok in: ku mii khatti nong msuk mata, chaa mso.

¹¹Mleija naan arlakki ku mii khatta howngkva ngi amda, nong khat lee sume tdit neenni aryaan nu.

¹²Tunva hanto lu hep daat mii ava ngi rim kdi nong suda ungu mdaksaa rin nra ava atlo so kdingi neenni mmaan ava Mukpu Jisu Khrista miing ngi paureen innu kuk kso chaak inna.

¹³Ku u knao rek, kṭha nong ktlo thu kja ngi karbin maan.

¹⁴Ku mii khatti hava chethi thungki neen kdo the ava mupṭoi nuwm mabi, mii ava atin chaan, ungu mma ningkja nra, naanva mma ava nong suk ṭhi maan.

¹⁵Mma ava akahal kchaan heppi suw maan, pdainu a u anao in khat lulu ngi arkowk in.

¹⁶Tunva kdaai ki Mukpu Mma mdaksaa katti mpha mkheng thu mlei khim khai thu kdaai aju pii chaan so. Mukpu ngi naan akheng inna aju kurthlo ṭhi chaanso.

¹⁷Poul nei kukhut katti hava kjit nu akurvui chaak inna. Nei kchethi khim khai thu hava ngi titinna kurthuwk, neiji hanto kdo kjit kcholu.

¹⁸Nenki Mukpu Jisu Khrista ki plungnee ngi naan akheng nga aju ṭhi chaanso.