Read Lamkang 1 TIMOTHI 1 Bible Online

1 TIMOTHI 1 - Lamkang bible

1 TIMOTHI 1

¹Nen mika ktlan pik Isowr ungta nenni plung tbin psuk chaak in Jisu Khrista paureen dil kṭoiji, Jisu Khrista ki kenyee khat Poul li,

²Krin cha thu kindit nei kchapa Timothi hin: Kpah Isowr hinki ungta Mukpu Jisu Khrista hinki plungnee leh wonsat ungu kdaai am so.

³Neiji Masidonia tha kvan mpha thu ado kaktham chaak lulu ngi Ephisia thu am daat, tditta msik khat liklik paurin khat kpurchuk mii angṭhe ka am ava, apdown pthii dok lamra pau apṭum pik lam.

⁴Mmaan mdaksaan na nopa paumin leh kṭuw knai kma charuwl paumin thu muplung inna kdim kcha a, tditta krin cha thu Isowr ktong ki kurchuk rang kchang nga plung kpurdun susu ktong tha ka am chlamma.

⁵Nenni ptuwn in minnu pau tupṭum in plung kchiir ungu kṭha poibin ungta krin cha thu plung klut ava wonsat thungki kthuwk jesang.

⁶Mii angṭhea havale thungki mdil in kinle chlamda do ksi kma pau karteen psuk thu kparvai kcha lamma.

⁷Mmaanni tak kthea mdit mata talu leiji pau dak kma kthea tdit kdeipandi kma, Nowlam ki chukpu rek kurthuwk nuwm lamma.

⁸Tunva ku mii khatti Nowlam ava anto katti msintonbi, Nowlam ava kṭha tdit nenni ndee in.

⁹Hava ndee in, tditta rinkindit mii tumra Nowlam ava mdo seem pme pdainu Nowlam kleek leh pau kleek tum, Isowr kdei kma rek leh pnu kirvei rek tum, kchiir kma leh Pthla ktongtha ka am kma rek tum, mpah ke eayou ungu mnuh ke eayou ungu mii ke eayou rek tum,

¹⁰pang turkuiji kturkui charek, cham turkuiji kturkui, mii kupru rek, plei knei rek, pauhur klou, ungu ktlok murson ava paurin tu kinṭim kma jesang.

¹¹Phowl kṭha kpii dei kunlor langlang ki Isowr kṭha paumin nei kihin kthe rang lei mdo tsil ndok dil kṭoiji kurthuwk so.

¹²Nei kihin rutan mikpii kcha, nenki Mukpu Jisu Khrista Mma ava kpanpaak chaakka, mleija sok kloura neia mhai kchol chda, lam trin chaak kurhui khatti Mma ngi makṭewl da,

¹³chodu va neiji Mma kjowm kcha ngi paunu ungu suwk pthuwk nu ungta ning er lo psuk nu; pdainu neiji Mma wonsat kdo arlaan chaak leiji kdei chdok kma ngi lamkrin kma heppi neiva ktlo dok ping.

¹⁴Ungta nenki Mukpu plungnee ngi Jisu Khrista thu ka am lamrin leh wonsat tu kilṭhi ngi nei ktumra mhai pluwn pik chda.

¹⁵Jisu Khrista ngi pnu ktong rek mdo ktlan pik nra dultipaam thu kurjung dida mdo the pau ava mkindit kat kurthuwk ungu kdung ngi tarlaan chaak ra kurhui. Ungta neia pnu ktong rek arlakki kheel dek cha ping;

¹⁶pdainu kṭuw knai kma ki rinkhu ava Mma krin cha rek hin mkurchu chaak nraan kheel sii ngi nei ki hintha Jisu Khrista Mma ngi mkinreel ki kdiil dei kcha ngi mdiil pik chda, hava leiji neiji wonsat kdo arlaan chaak.

¹⁷Kṭuw knai kma ki Kruwng, kmaang liit kmara, tdee pchaan ma, khdaat chrel Isowr hin tha, tak kjat chaak ra ungu kṭuw knai liit kma kpanpaak kurthuwk so! Amen.

¹⁸Kchapa, Timothi nangki mlei thu khulpu rek pauphuwn dok dil kṭoiji, hava pauva nah hinni ksil chaak na a, tditta kṭha ngi ado karnaak ṭhi nra hava pauna rekka asin ton cha,

¹⁹ungu alamrin chaak leh kṭha pauna ava arpom cha. Mii angṭhe rek va kṭha poibin pthlei lamda mlamrin chaak in thungki arkuwngpii kukui heppi kukui chlamma.

²⁰Mmaan arlakki Hymenas leh Alekjandar ri, Isowr kjowm kcha ngi mpau ma nraan mmaanni mkurchu chaak nraan, neiji seitaan hin kparlaan pthii lamma.